2 Corintios 11
11
Ri caqui'an tako'n chiquibil quib
1Chincuyu c'ana alak we quinch'a't q'uenok pacha' junok ch'u'jerinak. 2Can'an c'u wa' ma lic c'ax canna' alak, yey wa c'axna'bal nuc'u'x che alak e ri Dios cojoyom pa wanima'. Ma ri'in nuya'om alak puk'ab ri Cristo y xew puk'ab Rire cuaj c'o alak. E pacha' juna achi echiri' cuya rumi'al puk'ab juna ala pa c'ulaniquil. Ri caraj rachi e cuya puk'ab rala jun sakil k'apoj ali. Jec'ula' ri cuaj ri'in che ralak e na jinta c'ana ch'ul che alak chwach ri Cristo. 3Lic cubisoj nuc'u'x ma c'axtaj cac'ulumaj e alak jela' pacha' ri xuc'ulumaj ri Eva ojertan echiri' xsocotaj ruma ri tzel uno'jibal ri cumatz. Ma c'axtaj cajalc'ataj ri na'oj alak, quesaj c'u ib alak puk'ab ri Cristo y na catakej ta chi alak ruc' ronoje c'u'x alak. 4Cambi'ij wa' ma echiri' copon junok uc' alak, tob junwi ri tzijonic cu'an puwi ri Jesús chwach ri tzijonic ka'anom ri'oj che alak, ¡lic cac'ul c'u alak ri'! Y cac'ul ne alak ri petinak ruc' juna chic uxlabixel, tob na e ta ri Ruxlabixel ri Dios c'ulum chi alak. Cac'ul ne alak jun chic tzij, tob junwi chwach ri Utzilaj Tzij cojom chi alak.
5C'o ri caquibi'ij e nimak tak tako'n yey caquitac'aba' quik'ij. ¿C'o neba más quiwach rique chinuwa ri'in? Canch'ob ri'in, na jintaj. 6Ma tob na quinch'a't ta ri'in ruc' nimak tak ch'a'tem pacha' ri caqui'an rique, pero ri'in más c'o weta'am chiquiwa rique; y wa' nuc'utum chiwach alak ruc' ronoje ri nu'anom chixo'libal alak.
7Laj c'o ri caquich'ob rakan na jinta nuwach; ma echiri' xintzijoj ri Utzilaj Tzij re ri Dios che alak, na xintz'onoj tane c'ana rajil ri nuchac. ¿C'o neba numac ri' chiwach alak ruma wa'? Ma we xin'an ch'uti'n che wib, e cha' canimarisax k'ij ralak chwach ri Dios. 8Echiri' ri'in xinc'oji' uc' alak, e jujun chic iglesias ri xquitak lo puak chwe. Ec'u xinc'am puak chique rique cha' utz xink'alajisaj ri Utzilaj Tzij chiwach ralak. 9Ma echiri' in c'o uc' alak yey c'o c'u xajawax chwe, na jinta xintz'onoj che ralak. Ri xeto'w we e ri hermanos e petinak Macedonia. Na jinta c'u xinc'am che ralak ma na xuaj taj xinya alc'ayew che alak y na cuaj tane can'an wa' chikawach apanok. 10Yey pakatzij wi ri K'ijsak re ri Cristo pa wanima' c'o wi; ruma c'u ri' canjiquiba' uwach wa': E na jinta junok chila' Acaya quesan re ri qui'cotemal canna'o ruma na canya ta alc'ayew che alak. 11Chiwach ralak, ¿sa' nawi ube na cantz'onoj ta wajil che alak? ¿Ruma nawi na c'ax ta canna' alak? Na e ta ri', ma ri Dios lic reta'am sa' ri c'o pa wanima'.
12Ec'u ri na cantz'onoj ta wajil che alak, na canwok'otaj ta u'anic cha' jela' cak'alajinic na junam ta cojchacun ri'oj pacha' ri jujun chic, ri caquijunimaj ri quichac ruc' ri kachac ri'oj xa re yacbal quik'ij. 13Rique xa e socoso'nel, na e ta sakil tako'n ma qui'anom che quib pacha' e tako'n re ri Cristo. 14Macam c'u anima' alak che wa'; ma jenela' cu'an ri Satanás, cu'an che rib pacha' e jun ángel re K'ijsak. 15E uwari'che macam anima' alak che we ri e aj chac re ri itzel winak caqui'an che quib pacha' e 'anal re ri jusuc'. Pero copon c'u ri k'ij echiri' caquic'ul na ri tojbal re ri na utz taj qui'anom.
16Jumul chic cambi'ij: Mach'ob alak we ri'in xinch'u'jeric. Yey we c'o junok che alak jela' cuch'obo, chuya'a luwar chwe cantac'aba' c'ana nuk'ij pacha' junok ch'u'jerinak. 17Ri cakatac'aba' kak'ij na e ta uc'utu'n ri Kanimajawal chike; pero cantac'aba' c'ana nuk'ij pacha' junok na jusuc' ta runa'oj. 18Lic e q'ui ri caquitac'aba' quik'ij ruma ri caqui'an che ruwachulew, yey wo'ora can'an c'ana we ri'in. 19Ralak lic c'o na'oj alak; na ruc' ta c'u ri', lic quec'ul alak ri sachinak quina'oj. 20E cuyum c'u alak ri' rique tob lic quetakan pawi' alak, caquichap ri e alak y caquiq'uis ne rubitak e alak, yey lic caqui'an nim che quib chiwach alak. ¡Cuyum ne alak tob caquipach' k'ab chipalaj alak! Ronoje wa' cuyum alak y na jinta cabi'ij alak che. 21Laj q'uixbal c'u chwe ri'in ma na xinch'ij ta u'anic pacha' ri caqui'an rique.
Pero we rique na queq'uix ta che caquitac'aba' quik'ij, jec'ula' ri' can'an ri'in, tob ruc' wa' pacha' in ch'u'jerinak. 22Rique caquitac'aba' quik'ij ma e aj hebreo; jela' ri'in, in aj hebreo yey canrik ri ch'a'tem hebreo. Rique caqui'an nim che quib ma e cuq'uil ri tinamit re Israel, jela' ri'in in cuq'uil ri tinamit re Israel. Rique caquiyac quik'ij ma e ralc'o'al can ri Abraham; jela' ri'in, in ralc'o'al can ri Abraham. 23Rique caquibi'ij e aj chac re ri Cristo, jela' ri'in pakatzij wi in aj chac re ri Cristo yey más nim ri chac nu'anom ri'in chiquiwa rique. Tob quinch'a't pacha' in ch'u'jerinak, cambi'ij c'u wa': Ri'in más in chacuninak y más nutijom c'ax chiquiwach rique. Ma uq'uiyal laj balac'um nupa, uq'uiyal laj inya'om pa cárcel, uq'uiyal laj xtewun ri camic panuwi'. 24Raj judi'ab wo'ob laj xquijich' nupa pa treinta y nueve asial.#Dt. 25:3 25Yey oxib laj in 'anom pa barijon, julaj in 'anom pa'baj.#Hch. 14:19 Oxlaj ya laj in jik'inak pa ya' ruma xmukutaj ri barco in c'o chupa, yey xinch'ij ne jun ak'ab ruc' jun k'ij in c'o chwi ri mar. 26Uq'uiyal laj nu'anom unimal be. Ya laj in jik'inak pa tak nimaya'. Ya laj in caminak paquik'ab elek'omab y paquik'ab ri na e ta cuq'uil ri nutinamit. Ya laj incamisam cuma ne ri watz-nuchak'. Ya laj incamisam pa tak tinamit, pa tak luwar catz'intz'otic y chwi ri mar. Ya laj ne incamisam cuma ri caquibi'ij cubul quic'u'x ruc' ri Cristo, tob wa' na katzij taj. 27Nutijom c'axlaj chac y cosic. Uq'uiyal laj nucuyum waram, numic y tzajin chi'. Ruma tak ri lic c'o can'ano, uq'uiyal laj na utz ta chi ne xinwa'ic. Nutijom c'axc'olil tew y xincanajic na jinta chi ne nuk'u'. 28Y xaki uwi chi wa', ri jujun k'ij lic sa'chi rubis nuc'u'x cuma tak riglesias; e canna' ri'in wa' e pacha' jun eka'n c'o panuwi'. 29We c'o junok c'o pa c'ax y na jinta uchuk'ab, e canna' ri'in pacha' in ri inc'ulumayom re wa'. We c'o junok cumin junok chic pa ri mac, wa' cuya woyowal.
30We chirajawaxic c'ut canyac nuk'ij, ri tac'abal nuk'ij can'ano e cantzijoj tak ri cuk'alajisaj, ri'in na jinta nuchuk'ab. 31Ec'u ri Dios, Rukaw ri Kanimajawal Jesucristo ri na jinta utakexic nim uk'ij, e eta'mayom re na rak'ubal ta wa cambi'ij. 32Tape c'u alak ri xinc'ulumaj Damasco: Ri aj wach c'o chwach ri rey Aretas xtakan che quicojic e aj chajal re ri tinamit cha' quinquichapo. 33Yey ruma c'u ri' xinkasax lo chupa jun nimalaj chacach, ximom lo ruc' lazo chwi jun nimalaj tapia c'o ventana che.
Currently Selected:
2 Corintios 11: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.