2 Corintios 13
13
1Rutzij Upixab ri Dios jewa' cubi'ij: «We e c'o queb oxib caquijiquiba' uwach rumac junok ma xquilo echiri' camacunic, cak'at c'u tzij ri' puwi raj mac.»#Dt. 19:15 E urox laj wa' quinopon uc' alak, 2yey c'o cuaj cambi'ij che onoje alak y chique ri na cok'otam ta can ri quimac. Wa' e ri nubi'im chi can che alak echiri' xinopon chucalaj uc' alak y wo'ora cambi'ij tanchic tob na in jinta uc' alak: We xinopon tanchic, na qui'nto'o ta wi' alak. 3Canc'ut c'u ri' chiwach alak ri catz'onoj alak, wa' e ri c'utubal re we pakatzij wi ri nutzij ri'in e utzij ri Cristo. Ma Rire na cuxi'ij ta rib yey lic c'o uchuk'ab re cusuc'upij ri binic silabic alak. 4Pakatzij wi ri Cristo echiri' xcamisax chwa cruz e pacha' na jinta uchuk'ab, pero wo'ora Rire c'aslic ruma ruchuk'ab ri Dios. Jec'uri'la' we ri'oj xa jun ka'anom ruc' ri Cristo, e pacha' na jinta kachuk'ab ruma ri c'ax cakatijo, no'j cojc'asi' ruma ruchuk'ab ri Dios c'o kuc' yey cakac'ut na c'u ri' wa chuk'ab echiri' cojopon uc' alak. 5Ch'obo alak rakan we pakatzij wi c'o c'utubal re ri cubulibal c'u'x alak ruc' ri Kanimajawal Jesucristo y c'o c'u alak puk'ab Rire. ¿Na eta'am ta neba alak Rire c'o pa anima' alak? ¿O c'axtaj na jinta ne c'ana c'utubal re wa' chupa ri binic silabic alak? 6Ec'u cuaj ri'in queta'maj alak wa': Che ri kabinic kasilabic cak'alajinic c'o ri Cristo pa kanima' y Rire caqui'cot ruc' ri ka'anom. 7Cakatz'onoj c'u che ri Dios cha' ralak na catzak ta c'ana alak chupa ri na utz taj. Na cakatz'onoj ta wa' re yacbal kak'ij ri'oj, ma xew cakaj ca'an alak ri utz, tob e c'o ri caquic'ak bi kak'ij ri'oj.#13:7 “Tob e c'o ri caquic'ak bi kak'ij ri'oj”: We ri aj Corinto caquiyijba' quib, na cajawax ta chic cak'at tzij paquiwi'. We jec'ula' ri' xu'ano, laj e c'o jujun caquibi'ij na jinta uchuk'ab ri Pablo ma na xuk'at ta tzij paquiwi' jela' pacha' ri ubi'im lok. 8Ma ri'oj na jinta pakak'ab cakac'ak bi quik'ij ri quebin chupa ri K'ijsak. Ri caka'ano e cojchacun ne ruma ri K'ijsak cha' conoje quebin chupa. 9E uwari'che lic cojqui'cot che we cac'oji' chuk'ab ralak che u'anic ri utz, tob quilitaj c'ut pacha' e na jinta chi kachuk'ab ri'oj. Cakatz'onoj c'u che ri Dios cha' e cuchomaj chi utz ri binic silabic alak. 10Ruma c'u wa', quintz'iban apanok xalok' c'amaja' quinopon uc' alak, cha' we xinoponic, na cajawax ta chi c'ax quinch'aw pawi' alak. Ma ri chac uya'om ri Dios chwe e re q'uiyibal alak, na re ta sachibal wach alak.
Q'uisbal uch'a'tem ri Pablo che riglesia c'o Corinto
11Q'uisbal c'u re hermanos, cambi'ij wa' che alak: C'ola qui'cotemal pa anima' alak, suc'upij ri binic silabic alak chwach ri Dios, nimarisaj c'u'x alak chiwach alak, chu'ana xa jun c'u'x alak y c'ola alak chi utzil chomal. Y ec'u ri Dios, ri aj ya'l utzil chomal y rutzil c'u'xaj, cac'oji' uc' alak. 12Ya'a rutzil wach alak chiwach alak ruc' jun sakil tz'ubuj chi'aj chwach ri Dios.#13:12 Ri Pablo jewa' xubi'ij ma rique e caqui'an wa' chiquiwach echiri' caquiya rutzil quiwach. 13Conoje ri hermanos wara caquiya pan rutzil wach alak. 14C'ulu c'u onoje alak ri unimal rutzil uc'u'x ri Kanimajawal Jesucristo y ri rutzil uc'u'x ri Dios, yey chu'ana xa jun c'u'x alak ruma ri Santowilaj Ruxlabixel. Amén.
Currently Selected:
2 Corintios 13: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.