2 Corintios 10
10
Ri Pablo cuto'bej rib chiquiwach ri caquic'ak bi uk'ij
1Ri'in in Pablo cuaj cancoj wib chiwach alak chupa rubi' ri Cristo, ri na cu'an ta nim che rib y lic utz uc'u'x. Ma e c'o jujun chixo'libal alak quech'a't chwij, caquibi'ij echiri' in c'o uc' alak, pacha' canxi'ij wib canch'a'bej pa alak; yey echiri' in c'o naj y quintz'iban c'u pan uc' alak, na canxi'ij ta c'ana wib can'an wa', quecha'. 2Cantz'onoj c'u che alak choca alak il che wa cantz'ibaj pan che alak, cha' we xinopon uc' alak na cajawax ta chic canch'a'bej quipa jujun che alak. No'j we cajawaxic, can'an na c'u ri' wa' chique ri caquibi'ij xa pa ke ri'oj cojtakanic. 3Katzij, ri'oj xa oj ticawex, pero na caka'an ta ke'oj pacha' ri caqui'an ri winak re ruwachulew. 4Ma echiri' cojch'o'jin chirij ri na utz taj, na caka'an ta ruc' kachuk'ab o kana'oj ri'oj, ma e caka'an ruc' ruchuk'ab y ruto'bal ri Dios cha' jela' cakasach uwach ronoje ri cayactaj chirij ri Dios; 5wa' e ri itzel tak na'oj y tac'abal k'ij, ri quebuk'atej ri ticawex cha' na caqueta'maj ta uwach ri Dios. Cakaya c'u ronoje tak no'jibal puk'ab ri Cristo cha' cu'an pacha' runa'oj Rire. 6Echiri' cakilo lic cacoj alak utzij ri Cristo, c'a tec'uchiri' cakak'at tzij paquiwi ri e aj palajiy tzij.
7Ralak xew catakej alak ri quilitaj uwach. We c'o c'u junok ujiquibam uwach chiribil rib lic c'o puk'ab ri Cristo, e chuch'obo chi utz wa': Na xew ta rire c'o puk'ab ri Cristo, ma jenela' ri'oj. 8Y na xew ta ri', ma na quinq'uix tane che tob canjiquiba' uwach ri takanic caka'an pawi' alak, ma wa' e ri Kajawal ya'yom pakak'ab. Y wa' na re ta sachibal wach alak, ma re q'uiyibal alak chwach ri Dios. 9Na cuaj taj cach'ob alak rakan e canxibij pa alak ruc' ri cantz'ibaj pan che alak. 10Ma c'o quebi'n re: «Ri Pablo chupa tak rucartas lic c'ax ri cubi'ij, pacha' lic c'o uchuk'ab; no'j echiri' c'o chikawach, cuxi'ij rib y na il tane uwach ruch'a'tem» quecha'. 11Ec'u ri quebi'n re wa' chirajawaxic caqueta'maj na je ta la' u'anom, ma e janipa ri cakatz'ibaj pan che alak, junam ubi'xiquil caka'ano echiri' oj c'o chiwach alak.
12Ri'oj na cakach'ob tane cakajunimaj kib cuc' ri jujun xa caquitac'aba' quik'ij chiquibil quib. Ma rique xa caquijunimaj quib cuc' ri cachbi'il. Ri quebanaw re wa', na jusuc' ta ri quina'oj. 13No'j ri'oj na cakatac'aba' tane kak'ij ruma juna chac na ka'anom taj, ma e caka'an ri uya'om ri Dios pakak'ab. Yey e Rire ri xuya chike xojopon c'a chila' uc' alak ruc' ri Utzilaj Tzij. 14We tamaji e ri Dios ya'yom chike cojopon uc' alak, ri' xa pa ke ri'oj caka'an ri chac uc' alak. Pero na e ta ri'. Lic c'u takal chike cakapixabaj pan alak wo'ora, ma ri'oj oj ri nabe xojopon uc' alak ruc' ri Utzilaj Tzij re ri Cristo. 15Na cakatac'aba' tane kak'ij xa pa ke ri'oj ruc' ruchac jun chic. Ri koye'em e jalan canimar ri cubulibal c'u'x alak, jec'ula' canimar ri kachac chixo'libal alak e chirij ri uya'om ri Dios pakak'ab. 16Tec'uchiri' we xutzin ri kachac chixo'libal alak, utz c'u ri' cojel bi y coj'ec pa c'amaja' catzijox wi ri Utzilaj Tzij re ri Cristo, y jela' na que'kamina ta kib pa ri chac re jun chic, cha' na cakatac'aba' ta kak'ij ruc' ri chac na ka'anom ta ri'oj.
17China c'u ri caraj cuyac uk'ij,
e chuk'alajisaj ri' janipa ri u'anom
ri Dios Kajawxel che rubinic usilabic Jer. 9:23-24
18Ma we jun cutac'aba' uk'ij xa chiribil rib, ri' na jinta uchac ri cu'ano; no'j we e ri Dios cayacaw uk'ij, e k'alaj ri' utz ri chac u'anom.
Currently Selected:
2 Corintios 10: acrT
Highlight
Copy
Compare
Share
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
