1 Pedro 2
2
1E uwari'che ya'a can alak ronoje ri na utz taj: ri socoso'nic, ri xa queb palaj alak chiwach alak, ri cu'an c'ax c'u'x alak chiquij jujun chic y ri canuc' alak ch'a'tem chiquij jujun chic. 2Jela' pacha' juna ne' c'ac' alaxinak lic e caraj rutz'um ruchu; jec'uri'la' ralak, e lic rayij alak ri sakil Uch'a'tem ri Dios, cha' ruma wa', ri Dios cuya ri q'uiyibal alak y cucolobej c'u alak chwach ronoje ri na utz taj. 3E 'ana c'u alak wa' ma na'om chi alak ri rutzil uc'u'x ri Kanimajawal pa anima' alak.
Ri jun abaj c'aslic
4Kib c'u alak ri' ruc' ri Kanimajawal Jesucristo. Rire e pacha' jun abaj c'akital can cuma ri winak, ma chiquiwach rique na jinta uchac; no'j chwach ri Dios e jun chomilaj abaj c'aslic#2:4 “Abaj c'aslic”: Ri Cristo c'aslic y cuya c'aslemal chike. y cha'talic, pa catiqui' wi lo ri ja cayaquic. Yey juna abaj na jinta uc'aslemal, no'j Rire c'aslic. 5Jec'uri'la' ralak alak pacha' abaj c'aslic tz'akom bi che ri ja catajin ri Dios che uyaquic re cajeki' chupa. Rojertan raj chacunel xeniman pa Rocho Dios, ec'u wo'ora ri Dios uya'om che ralak caniman alak chwach Rire y ruma c'u ri Kanimajawal Jesucristo ca'an alak ri cuc'ul uc'u'x Rire. 6E uwari'che jewa' tz'ibital can pa Ruch'a'tem ri Dios:
Cancoj c'u chila' Sion
ri jun chomilaj abaj cha'talic,
cha' puwi wa' catiqui' ri ja canyaco. Is. 28:16
China c'u ri cacubi' uc'u'x ruc',
ri' na caq'uixbesax taj
ma cuc'ul na ri roye'em che Rire Is. 49:23
cacha'. 7Che ralak ri cojom alak rubi', Rire lic c'o uwach; no'j chique ri na quecojow ta re, e cu'ana pacha' ri tz'ibital can pa Ruch'a'tem ri Dios:
E rabaj c'akital can cuma raj yacal ja,
e abaj ri' wa' xajawaxic cha' catiqui' lo ri ja.#Is. 28:16 Sal. 118:22
8Yey cubi'ij:
Rire e ri jun abaj cojotal chiquiwach ri ticawex,
yey lic e c'o ri caquichik quib che,
y lic ec'o ri quetzak puwi' Is. 8:14
cacha'. Jec'ula' xquic'ulumaj rique, ma e pacha' “caquichik quib” chwi Ruch'a'tem ri Dios echiri' na caquicoj taj.
9No'j ec'u ralak alak cha'tal lo ruma ri Dios, alak aj chacunel chwach ri Nimalaj Takanel Dios, alak jun tinamit ya'om ib alak che ulok'nimaxic ri Dios#Éx. 19:6 y lok'otal alak ruma ri Dios re cu'ana alak utinamit#Dt. 7:6; Is. 43:21 cha' catzijoj alak chique ri ticawex janipa tak ri u'anom ri Dios, ri xresaj lo alak chupa ri k'eku'm y xuya alak chupa ri chomilaj K'ijsak. 10Ralak ojertan na alak ta utinamit ri Dios, no'j wo'ora alak chi utinamit Rire. Ma ojertan na xeta'maj ta alak puwi ri relej uc'u'x ri Dios; no'j wo'ora ri Dios uc'utum chi wa' che ralak.
Ri jusuc' binic silabic chwach ri Dios y chiquiwach ri winak
11Hermanos ri lic c'ax canna' alak, c'una chic'u'x alak, ralak na alak ta re ruwachulew, ma alak xa ic'owel. E uwari'che campixabaj alak, maya ib alak che tak ri rayibal re ri ti'jil alak ma wa' cach'o'jin pa anima' alak cha' cuyoj ri c'aslemal alak. 12Ri 'ana alak e c'utu alak jun binic silabic lic jusuc' chiquiwach ri winak na queta'am ta uwach ri Dios. Jec'ula' echiri' cac'un tanchi ri Kanimajawal, rique caquiyac uk'ij ri Dios ruma quilom ri chomilaj chac 'anom alak, tob wo'ora quech'a't chi'ij alak. 13Ruma c'u ri Kanimajawal, lic cojo alak quitzij conoje ri ya'tal paquik'ab quetakan che ruwachulew, e pacha' ri nimalaj takanel c'o paquiwi uq'uiyal tinamit 14y tak ri e aj wach ecojotal ruma ri nimalaj takanel re quequiya pa c'ax ri caqui'an ri na utz taj y re caquiyac quik'ij ri caqui'an ri utz. 15Ma ri lic caraj ri Dios che alak e ca'an alak ri utz cha' e cak'atej alak tak ri ch'a'tibenic ca'an chi'ij alak cuma ri ticawex na jinta quina'oj. 16Pak'ab alak c'o wi sa' ri ca'an alak; yey wa' na e ta re ca'an alak ri na utz taj, ma e re cu'ana alak aj chaquib re ri Dios y jec'ula' e ca'an alak ri caraj Rire. 17'Ana alak chique conoje ri ticawex janipa ri takal chique; mac'ak bi alak uk'ij junok. C'ax chena'a alak ri hermanos. C'ola xi'in ib pa anima' alak chwach ri Dios. Lok'nimaj alak ri rey.
18Ralak alak aj chaquib, cojo alak quitzij ri patrón alak y ya'a ib alak chitakic cuma rique. Wa' na xew ta ca'an alak cuc' ri lic utz quic'u'x ma jenela' 'ana alak cuc' ri lic na jinta cacuyuw que. 19Ma e lic utz ri' we junok ruma cuna' chuc'u'x e cu'an ri caraj ri Dios che, cuya ranima' cuch'ij tak ri c'axc'obic cape puwi' tob wa' na takal ta che. ¡Yey ri Dios cuyac uk'ij ri ca'anaw wa'! 20No'j we e la' lic chirij mac alak xch'ay can alak yey lic xcuy alak wa', ¿sa' c'u ri' ri yacbal k'ij alak? ¡Na jintaj! No'j we cacuy c'u alak ri c'ax ca'an che alak ruma ri utz catajin alak che u'anic, ri' lic c'o yacbal k'ij alak chwach ri Dios. 21E ne ruma wa' xusiq'uij alak ri Dios, ma ri Cristo xutij c'ax kuma ri'oj; yey tak ri xu'ano e c'utubal chike ri'oj cha' cojbin jela' pacha' xbin Rire. 22Ma jewa' tz'ibital can puwi ri Cristo pa Ruch'a'tem ri Dios:
Rire na xmacun taj,
y na jinta ne c'ana socoso'nic xel puchi' Is. 53:9
cacha'. 23Echiri' ri winak lic xquic'ak bi uk'ij ruc' itzelilaj ch'a'tem, Rire na xuc'ul ta uwach ruc' itzelilaj ch'a'tem. Yey echiri' quiya'om pa c'axc'olil, Rire na xubi'ij taj cu'an uc'axel chique ri caqui'an c'ax che; ri xu'ano, e xuya ronoje puk'ab ri Dios, ri cu'an k'atbal tzij chi jusuc'. 24Ec'u ri Cristo xuc'am bi ri kamac che rucuerpo echiri' xcam chwa ri cruz. Xu'an c'u wa' cha' jela' cakaya can ri mac y e cakaya kib che ri jusuc' binic silabic.#2:24 Pa ri ch'a'tem griego cubi'ij “cha' oj caminak chi chwa ri mac yey oj c'as che ri jusuc' binic silabic”. Ma jewa' tz'ibital can pa Ruch'a'tem ri Dios:
Ruma c'u ri c'ax xutij Rire,
xixcunutaj ri'ix Is. 53:5
cacha'. 25Rojertan, alak pacha' bexex e sachinak; no'j wo'ora xtzelej lo alak ruc' ri Cristo, ri Aj C'amal Kawach y ri Chajinel re ri kac'aslemal chwach ri Dios.
Currently Selected:
1 Pedro 2: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.