1 Juan 2

Ri Kanimajawal Jesucristo cach'aw pakawi' chwach ri Dios

1Ralak alak walc'o'al chupa rubi' ri Dios, cantz'ibaj c'u pan wa' che alak cha' na camacun ta alak. Yey we c'o junok che alak camacunic, cheta'maj alak c'o Jun cach'aw pakawi' chwach ri Kakaw, wa' e ri Kanimajawal Jesucristo, yey Rire lic jusuc'. 2E Rire ri xuya rib xcam pakac'axel re tojbal ri kamac. Y na xew ta re tojbal ri kamac ri'oj, ma re tojbal ri quimac conoje ri e c'o che ruwachulew.

3We caka'an ri takanic cuya ri Dios chike, cak'alajin c'u ri' pakatzij wi keta'am uwach Rire. 4We c'o cabi'n re: «Ri'in weta'am uwach ri Dios» yey na cu'an ta janipa ri takanic cuya ri Dios che, ri' xa aj rak'ul y na jinta ri K'ijsak ruc'. 5No'j ri cutakej ri cubi'ij ri Dios, ri' cak'alajinic pakatzij wi lic c'ax cuna' ri Dios. We jec'ula' caka'an ri'oj, k'alaj c'u ri' pakatzij wi xa jun ka'anom ruc' Rire. 6We c'o junok cubi'ij xa jun u'anom ruc' ri Dios, chirajawaxic c'u ri' chu'ana che rubinic jela' pacha' rubinic ri Kanimajawal Jesucristo.

Ri takanic puwi ri sakil rutzil c'u'xaj

7Hermanos, na cantz'ibaj ta jun c'ac' tzijpixab#2:7 Wa tzijpixab e ri c'ax cakana' kib chikawach ruc' ri sakil rutzil c'u'xaj xuc'ut ri Jesús. Jn. 13:34 che alak, ma e cantz'ibaj chwi ri xex chi c'o uc' alak chwi ri petinak lok. Wa ojer tzijpixab e ri xex chi tom wi lo alak. 8Na ruc' ta c'u ri', e pacha' c'ac' wa cantz'ibaj che alak, ma wa' lic xk'alajin che rubinic ri Jesús yey cak'alajin c'u che ri binic silabic ralak, ma ri k'eku'malil catajin upacatajic y ri sakil K'ijsak cawon chic.

9We c'o junok cubi'ij c'o chupa ri K'ijsak yey tzel caril ri ratz-uchak', ri' c'a c'o pa k'eku'malil. 10No'j we junok c'ax cuna' ri ratz-uchak', ri' c'o chupa ri K'ijsak y na jinta c'o caminow re pa mac. 11Pero ri tzel caril ri ratz-uchak', ri' c'a c'o pa k'eku'malil y cabin c'u chupa wa'. Ruma la', na reta'am taj pachawi que'ec wi, ma ruma c'o chupa ri k'eku'malil e junam ruc' pacha' potz'.

12Cantz'ibaj pan wa' che alak, ralak walc'o'al chupa rubi' ri Dios,

ma cuytajinak chi mac alak ruma ri xu'an ri Kanimajawal Jesucristo.

13Cantz'ibaj pan wa' che alak ri c'o alc'o'al alak,

ma xeta'maj alak uwach ri Kanimajawal,

ri xex chi c'o lo wi echiri' c'amaja' ne ca'ani' ruwachulew.

Cantz'ibaj pan wa' chiwe ri ix alabo-alito,

ma ich'ijom chi uchuk'ab ritzel winak.

Cantz'ibaj pan wa' che alak, ralak walc'o'al chupa rubi' ri Dios;

ma xeta'maj alak uwach ri Kakaw.

14Xintz'iban c'u pan che alak ri c'o alc'o'al alak,

ma eta'am chi alak uwach ri Kanimajawal,

ri xex chi c'o lo wi echiri' c'amaja' ne ca'ani' ruwachulew.

Xintz'iban pan chiwe ri ix alabo-alito,

ma lic c'o ruchuk'ab ri Dios iwuc'

y Ruch'a'tem ri Dios lic tiquil chupa ri iwanima'

yey lic ich'ijom chi uchuk'ab ritzel winak.

15Me'ec c'u'x alak ruc' ri c'o che ruwachulew ruc' tak ri xa re ruwachulew. Ma we c'o junok e que'ec uc'u'x ruc' tak wa', ri' na c'ax ta cuna' ri Kakaw. 16Ma e ronoje ri na utz taj c'o che ruwachulew, na ruc' ta ri Dios petinak wi, xa e re ruwachulew. Yey wa' e tak ri rayinic re ri kati'jil, ri rayinic re caka'an ke'oj che janipa ri cakilo y ri rayinic re yacbal kak'ij. 17Ec'u ruwachulew xa caq'uisic junam ruc' ronoje ri rayinic na utz taj c'o chwach; no'j c'u ri ca'anaw janipa ri caraj ri Dios, ri' na jinta utakexic ruc'aslemal.

Kachajij kib chiquiwach ri e aj socoso'nel

18Alak walc'o'al chupa rubi' ri Dios, oj c'o chi che ruq'uisbal k'ij. Keta'am chi wa', ma tom chi alak e cac'un lo ri jun cayactaj chirij ri Cristo, ri cabi'x “anticristo”#2 Ts. 2:3-4 che. Yey wo'ora lic e q'ui chi ri eyactajinak chirij ri Cristo. 19Rique tob xquimol quib junam kuc' ri'oj, na junam ta quic'u'x kuc' ri'oj. Ma we ta e ri', xecanaj ta can kuc'. Pero xebel c'u bi chikaxo'l ri'oj, y ruc' wa' cak'alajinic na jinta junok chique rique e kuq'uil ri'oj.

20Ec'u ralak na alak ta jela' pacha' rique, ma ya'tal che ralak ri Ruxlabixel ri Jun lic nim uk'ij Santo y ruma c'u wa' onoje alak eta'am alak ri K'ijsak. 21Cantz'ibaj pan wa' che alak, na e ta ruma na eta'am ta alak ri K'ijsak re ri Dios, ma e ruma ne ri eta'am alak wa' yey eta'am chi c'u alak na jinta juna rak'ubal no'jital lo che ri K'ijsak.

22¿China tak ri lic e aj rak'ul? E tak ri caquibi'ij: «Ri Jesús na e ta Rucha'o'n lo ri Dios.» Ec'u tak ri caquibi'ij wa', na xew ta eyactajinak chirij Ruc'ajol ri Dios, ma jenela' eyactajinak chirij ri Kakaw Dios. 23E junok cubi'ij: «Ri Jesús na e ta Uc'ajol ri Dios,» ri' na jinta ri Kakaw Dios ruc'. No'j ri cuk'alajisaj: «Ri Jesús e Uc'ajol ri Dios,» ri' c'o ri Kakaw Dios ruc'.

24Ec'u ri xex chi tom wi lo alak puwi ri Cristo, e tiquila ri' chupa ri anima' alak. Yey we e u'anom ri', c'o chi alak puk'ab ri Kakaw Dios y puk'ab Ruc'ajol. 25Ec'u bi'tisinic wa' u'anom can ri Kanimajawal Jesucristo: E ri cuya ri c'aslemal na jinta utakexic chike.

26Cantz'ibaj c'u pan wa' che alak, ma e c'o ri cacaj caquisoc alak. 27No'j ralak c'o chi pa anima' alak ri Uxlabixel ya'tal che alak ruma ri Kanimajawal Jesucristo. E uwari'che na cajawax taj cac'un lo junok ruc' c'utunic lic junwi chwa ri k'alajisam chi che alak, ma ri Ruxlabixel ri Dios e cac'utuw che alak ronoje ri K'ijsak re ri Dios. Y janipa ri cuc'ut Rire, lic katzij, na rak'ubal taj. Ruma c'u ri', tiquila alak chi utz chupa ri majom alak che ri Ruxlabixel ri Dios. 28Ec'u wo'ora, ri alak walc'o'al chupa rubi' ri Dios, mesaj ib alak puk'ab ri Kanimajawal Jesucristo, cha' ruc' cubulibal kac'u'x cakoy'ej Rire y na cojq'uix ta chwach Rire echiri' cak'alajin uwach pa ruc'unibal. 29Ralak eta'am chi alak wa': Rire lic jusuc'. Cheta'maj c'u alak ri': E janipa ri caqui'an ri lic jusuc', ebalaxinak chi chupa rubi' Rire.

Currently Selected:

1 Juan 2: acrT

Highlight

Copy

Compare