1 Juan 1
1
Ri Tzij re c'aslemal
1Cakatz'ibaj pan wa carta che alak chwi ri Jun xex chi c'o lo wi echiri' c'amaja' ne ca'an ruwachulew, puwi sa' tak ri xubi'ij yey puwi ri kilom ruc' ri kawach. Ma pakatzij wi xkil uwach y xkachap ne ruc' ri kak'ab. Cojtz'iban c'u ri' puwi ri Jun pakatzij wi e ri Tzij,#Jn. 1:1 ri cuya c'aslemal. 2Wa Jun cuya c'aslemal xc'un che ruwachulew yey ri'oj xkil uwach. E uwari'che cakabi'ij sa' ri kilom y cakak'alajisaj c'u che alak puwi wa Jun na jinta utakexic ruc'aslemal. Rire xex chi c'o lo wi ruc' ri Kakaw Dios yey xuk'alajisaj c'u rib chikawach ri'oj. 3Janipa c'u ri kilom y ri katom, e cakak'alajisaj pan che alak; ma e cakaj cu'an alak xa jun kuc' ri'oj jela' pacha' ri'oj pakatzij wi xa jun ka'anom ruc' ri Kakaw Dios y ruc' Ruc'ajol, wa' e ri Kanimajawal Jesucristo. 4Cakatz'ibaj pan wa carta che alak cha' junam caqui'cot alak kuc'.
Ri lic chirajawaxic wi e cojbin chupa ri K'ijsak
5Ec'u wa tzij katom che ri Kanimajawal Jesucristo e cakak'alajisaj che alak: Ri Dios e K'ijsak yey ruc' Rire na jinta c'ana k'eku'malil. 6We cakabi'ij xa jun ka'anom ruc' ri Dios yey cojbin chupa ri k'eku'malil, ri' cojelic xa oj aj rak'ul y na cojbin ta c'u chupa ri K'ijsak. 7No'j we cojbin chupa ri K'ijsak jela' pacha' ri Dios c'o pa ri K'ijsak, ri' xa jun ka'anom chikawach. Yey ronoje ri kamac cach'ajtaj#1:7 Echiri' cubi'ij cach'ajtaj ronoje ri kamac, wa' e que'elawi, ri Dios cucuy ri kamac y na cape ta chi c'u ruk'atbal tzij pakawi'. c'u ri' ruma ruquiq'uel ri Kanimajawal Jesucristo, Ruc'ajol ri Dios. 8Pero we cakabi'ij na jinta kamac, ri' xa e cakasoc kib chikibil kib y na katzij ta ri cakabi'ij. 9No'j we cakak'alajisaj ri kamac chwach ri Dios, Rire cucuy kamac y cojuch'aj che ronoje ri na utz taj c'o pa kanima', ma Rire lic jusuc' y ujiquibam uwach cu'an wa' yey Rire na cu'an ta rak'ubal. 10We cakabi'ij na oj ta macuninak, ri' e pacha' caka'an aj rak'ul che ri Dios, ma cakabi'ij na katzij ta ri ubi'im can Rire.#Pr. 20:9; Ec. 7:20
Currently Selected:
1 Juan 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.