Los Hechos 17
17
Allempo xhap Pablo ñamha Silas Tesalónico
1Allempoña awanerret allothpaꞌ awanmoet anetso Anfípoliso, allothñapaꞌ awanmoet ñamha anetso Apolonio. Allothñapaꞌ oꞌ xhapoet ñamha anetso ñeñth paꞌsoꞌcheñ Tesalónica. Allñapaꞌ alloꞌtsen judioneshaꞌ poꞌprawaꞌ. 2Pabloñapaꞌ oꞌ beꞌthosos ñeñth atthekma pena. Allñapaꞌ serrpareꞌtatosanet Yompor poꞌñoñ. Allñapaꞌ maꞌpanerr semana. Allempoña xhen yeth allempo amesenetpaꞌ oꞌchxhoꞌ serrpareꞌtatanet Yompor poꞌñoñ ñeñth ateth akellkareth. 3Allpaꞌ añ yexhatanet ateth anarethta ñeñthchaꞌ Cristotats ñerraꞌm esempoch wapa añ patsropaꞌ nanakchaꞌ moeroxhtachet. Tharraña oꞌch moeroxhtatwetpaꞌ elloch alla tanterra amaꞌtchaꞌ rroma. Ateth otanet:
—Theꞌñapaꞌ oꞌch notas, añ Jesús ñeñthara ñeñth oꞌ neserrpareꞌtatwaspaꞌ ñeñthña Cristotets.
4Poesheñaꞌtetspaꞌ pokteꞌ eñchet oꞌ ameꞌñyet Jesús ñeñthoꞌmar ñetpaꞌ yemteñet Pablo ñamha Silas. Ñamha shonteꞌ griegoneshaꞌ ñeñth awathotheñ kowen kothapeꞌchets Partsokoppaꞌ oꞌ ameꞌñeñet Jesús. Ñamha shonteꞌ koyaneshaxhno ñeñth eꞌñe kowen entyen acheñeneshaꞌ ñetpaꞌxhoꞌña oꞌ ameꞌñerret ñamhet. 5Judioneshaꞌña ñeñth ama ameꞌñetsopaꞌ ama pokteyeꞌ enteñeto atthoch acheñeneshaꞌpaꞌ oꞌch yemchet Pablo, ñeñthoꞌmarña poesopeꞌcheñothetpaꞌ oꞌ eꞌmoñeꞌchet. Ñeñthoꞌmarña aꞌsechet poesheñaꞌtets acheñ ñeñth ama tama es sherbetso ñeñth attha ellapetseꞌth anorrets all shontena acheñeneshaꞌ. Aꞌsechet oꞌch apxhachet shonteꞌ acheñ atthoch eꞌmoñeꞌtachet Pablo. Ñetña paꞌtsrreꞌmoeñothetpaꞌ awanmoet Jasón paꞌpakllo all aꞌposa Pablo ñamha Silas. Oꞌpachet errothenothpaꞌ oꞌtheꞌ xhaꞌnmaxhaꞌtet aꞌyoth atthoch acheñeneshaꞌpaꞌ oꞌch rromoet. 6Allempoña xhaxhaꞌtet Jasón paꞌpakllopaꞌ tharraña ama entarethteto. Ñaptha rromoet Jasón ñamha poꞌpoñexhno acheñeneshaꞌ ñeñth ameꞌñetsa. Ñetaña anmarethtatset amhchaꞌtarethesho. Paꞌtsrreꞌmoeñothetpaꞌ nanak amaꞌtoxhetnomoet atthothaxhoꞌ xhapoet alloꞌtsen amhchaꞌtarethneshaꞌ. Allñapaꞌ ateth otoset:
—Oꞌ xhap acheñ ñeñth moeneneꞌ oꞌch aꞌpoꞌpoñeterrnay yokthaphña. Atthoꞌ phowanmoet amaꞌt poꞌpoñ anetsoꞌmar, theꞌpaꞌ oꞌ xhapoet ñamha arr.
Oꞌ alla oterreterr:
—Añ Jasónpaꞌ oꞌ agapanet eꞌñe kowen theꞌpaꞌ ñaña paꞌpakllo aꞌpoenet. 7Ñetpaꞌ ama pokteyeꞌ enteñeto attho amhchaꞌtareth oꞌch nan ñoñets all anetso Romo. Ñetpaꞌ aña otenet eñalloꞌ poꞌpoñ amhchaꞌtareth ñeñth nanak awamenkath ñeñthpaꞌ añoꞌ paꞌsoꞌcheñ Jesús.
8Acheñeneshaꞌñapaꞌ ñeñtha eꞌmoetpaꞌ nanak atsrreꞌmoet ñamha amaꞌt amhchaꞌtarethneshaꞌ. 9Allempoña Jasón ñamha poꞌpoñexhno acheñpaꞌ oꞌ ayoramphsarethtet allpon poꞌkhllayoret. Allothpaꞌ otarethtet:
—Añ kellepaꞌ allach yapoerres atoꞌt awerraꞌ Pablo ñamha Silas.
Allempoñapaꞌ aꞌrroyeret Jasón ñamha poꞌpoñexhno acheñ.
Allempo xhap Pablo ñamha Silas anetso Bereo
10Allempoña acheñeneshaꞌ ñeñth ameꞌñetsapaꞌ oꞌ moeñeret Pablo ñamha Silas Bereo. Tsapokma amñarethtenet aꞌnawa. Oꞌ xhapoet Bereopaꞌ beꞌthosxhaꞌtoset judioneshaꞌ poꞌprawo.
11Añña judioneshaꞌ ñeñth Bereoꞌtsaꞌyenpaꞌ ñetñapaꞌ eꞌñe kowen kothapeꞌchenet ama attheyayeto ateth ñerraꞌm judioneshaꞌ ñeñth Tesalónicoꞌtsaꞌyen. Eꞌñe poksheñeshaꞌ eꞌmhñotoñet Yompor poꞌñoñ, allothña ñetpaꞌ oꞌ eꞌnyeset Yompor poꞌñoño all akellkareth awathotheñ. Tharroꞌmar ñetpaꞌ moeneñet oꞌch eñochet ñatoꞌ poꞌñoxhtheꞌ ateth serrpareꞌten Pablo ñamha Silas. Patheꞌtets yethpaꞌ atthekma peteꞌth. 12Ñeñthoꞌmarña shonteꞌ acheñeneshaꞌ ñeñth ameꞌñatsa. Shonteꞌ ñamha koyaneshaxhno ñeñth griegoneshaꞌ ñeñth nanak sherbetspaꞌ oꞌ ameꞌñenet ñamet. Ñamha poꞌpotantañ shonteꞌ yakmaneshaꞌ oꞌ ameꞌñenet. 13Añña judioneshaꞌ ñeñth yexhetsa Tesalónicopaꞌ oꞌ eꞌmareꞌchet Pablo oꞌ alla serrpareꞌtwerranerr Yompor poꞌñoñ ñamha Bereo. Ñeñthoꞌmarña waxhaꞌtet ñamet all atthoch atsrreꞌmatachet acheñeneshaꞌ oꞌch eꞌmoñeꞌtachet Pablo. 14Añña acheñeneshaꞌ ñeñth oꞌ ameꞌñapaꞌ oꞌ moeñet Pablo tepaꞌtoꞌ ontapo alloꞌtsen saꞌp atarr. Añña Silas ñamha Timoteopaꞌ alla aꞌpa Bereo. 15Poesheñaꞌtets acheñpaꞌ oꞌ kothaꞌnmet Pablo. Ñetpaꞌ alla neñetaꞌ Pablo anetso ñeñth paꞌsoꞌcheñ Atenas. Allña soꞌtannaꞌtwet Pabloñapaꞌ ateth otanet:
—Oꞌch sotwer Silas ñamha Timoteo onetepaꞌ ñamet eꞌñe thayekma.
Allempo xhap Pablo ñamha Silas Atenso
16Pabloñapaꞌ alla kowanet Atenso. Allña kowanetpaꞌ shonteꞌ entosan ayexhkatarethexhno all Atenso, ñeñth poꞌyomporer phaꞌyen acheñeneshaꞌ. Ñañapaꞌ nanak llekachet. 17Pabloñapaꞌ moeneñ oꞌch beꞌthos judioneshaꞌ poꞌprawo atthoch serrpareꞌt epoet parro judioneshaꞌ ñamha poꞌpoñexhno acheñ ñeñth kowen kothapeꞌchets Partsokop. Patheꞌtets yethpaꞌ oꞌchxhoꞌ awoꞌ all shontena acheñeneshaꞌ poeblo allñapaꞌ oꞌchxhoꞌ serrpareꞌtet parro ñeñth alloꞌtsaꞌyen. 18Parrochpaꞌ aña wapatsa ñeñth ameꞌñenaya Epicuro pokthaphña, allothpaꞌ oꞌ wapa ñamha ñeñth ameꞌñenaya poꞌpoñ kothaphñats ñeñth otenet estoico. Ñetñapaꞌ ateth otet:
—¿Estheꞌkaꞌye kothapeꞌchenña añ acheñ ñeñth attha nanak eñets?
Poꞌpotantaññapaꞌ ateth otet:
—Ñatoꞌ añtheꞌ moenen oꞌch yexhatey poꞌpoñ poꞌyomporer ñeñth ama yentare ya.
Tharroꞌmar Pablopaꞌ añ serrpareꞌtatenanet ateth pena Jesús ñamha amaꞌt attho tanterra Jesús. 19Ñetñapaꞌ oꞌ anmet Pablo all oteñet Areópago allekma apxhena eñotañneshaꞌ. Allñapaꞌ otoset:
—Ñewa, theꞌpaꞌ oꞌch photey estheꞌña phokthapeꞌchen pha. Yapaꞌ theꞌpaꞌ yemneñ oꞌch yeñoch. 20Tharroꞌmar ñeñth peserrpareꞌtenpaꞌ ama yeꞌmare. Yapaꞌ yemneñ oꞌch yeñoch estheꞌ nanak photen.
21Ñewa, allowen atensoꞌmarneshaꞌ ñerraꞌm añ serrpareꞌtats ñeñth ama poentaretopaꞌ ellapenetchaꞌ eꞌmhñotet. Ñeñthach patherr maꞌyoxhret. Ñamha ñeñth yexhaꞌwerra Atensopaꞌ ñeñth wapyetsa poꞌpoñ anetsothpaꞌ theꞌpaꞌ attha penet ñamet.
22Allempoña Pablopaꞌ thomos rroxho all oteñet Areópagopaꞌ ateth otanet:
—Atensoꞌmarneshachaꞌ napaꞌ neñotenes sapaꞌ aña atarr semaꞌyoxhrena ñeñth seyomporer sephaꞌyen. 23All naswanempaꞌ shonteꞌ nentyesnom ñeñth semaꞌyochyena ñeñth seyomporer sepen. Patherr allekma semaꞌyochenapaꞌ napaꞌ nent all oten añ ñoñets: “Añpaꞌ añekop Yompor ñeñth ama yeñotenaꞌ.” Ñeñth semaꞌyochena ñeñth ama señotenaꞌpaꞌ ñeñthara Yompor theꞌpaꞌ ñeñthchaꞌña neserrpareꞌtatas.
24‘Añ ñeñthara Yompor ñeñth yexhkateꞌ añ pats. Ñamha yexhkatan allowen ñeñth yentyen añe patsro. Ña Pamoꞌmteꞌ pen enet ñamha pats. Ñeñthoꞌmarña ya ñeñthey arromñatheypaꞌ ama pallteno oꞌch yeyexhkatoñ allchaꞌ yexha. 25Ñamha ama pallteno oꞌch es yaph. Ñokop ama es palltetso. Elloña ñaña yapoeneꞌ alloweney attho yokrrena, apoeney ñamha attho yoꞌrrerrena. Ñapaꞌ apoeney ora esokmañen.
26‘Ora allpon paꞌnamen acheñ ñeñth yexhaꞌyetsa añe patsro Yomporpaꞌ ña yexhkatweꞌ eꞌñe poesheñarrotha acheñ. Ñapaꞌ oꞌ nowanet eꞌñech allempowa korraꞌyeset. Ñamha oꞌ naꞌyeswanet eꞌñech erra yexhaꞌyeset añe patsro. 27Tharroꞌmar Yomporpaꞌ yexhkatan paꞌnamen acheñ tharroꞌmar añ kothapeꞌch allochñapaꞌ allowen acheñpaꞌ ñerraꞌm eꞌñe akopha eꞌneretpaꞌ poꞌñoxhpaꞌ enteretchaꞌ. Ñapaꞌ allameꞌttsoꞌtsenatheꞌ yeshoth. 28Tharroꞌmar eꞌñe ñeshoth theꞌpaꞌ yokrrena ñamha eꞌñe ñeshothpaꞌ yechopeꞌchen, ñamha eꞌñe ñeshothpaꞌ yeꞌñalleta. Amaꞌt ateth kellkëꞌth awath poesheñarr samoꞌts sa ñeñth etsotayeꞌth ñoñets. Añmapaꞌ ñeñth kellkëꞌth samoꞌts awath: “Theꞌña poꞌñoxh Yomporpaꞌ poechemereshaꞌ peney.”
29Alla oterrerr Pablo:
—Ñewa, ñerraꞌm poꞌñoxh Yompor poechemereshaꞌ peney ya, ama pokteyaye oꞌch yoch Yomporpaꞌ arroth ayexhkatareth oroth, amapaꞌ arroth ayexhkatareth asretoth, amapaꞌ arroth ayexhkatareth mapyoth. Añmapaꞌ ñeñth ayexhkatarethpaꞌ eꞌñe ya yokthaphñotha ayexhkatareth, ateth es yetmaꞌntatena ya. 30Awath acheñpaꞌ amaꞌt ama eñotenano ñeñth kowentetsa Yomporekop, Yomporpaꞌ amach erroth phaneto. Tharraña theꞌñapaꞌ oteney yokthapeꞌcherrepaꞌ ello kowen Yomporekop, alloweney acheñey ñeñthey korraꞌyetsa añe patsro. 31Yomporpaꞌ tharroꞌmar moeneñ oꞌch yokthapeꞌcherr etserra tharroꞌmar ñapaꞌ oꞌ neꞌ esempoch alloweneypaꞌ yorrterrach ñesho. Theꞌpaꞌ oꞌ nan Jesús ñach akrerreꞌ allowen acheñ ñeñth eꞌñe poꞌñoxh ateth peteꞌth. Akranchaꞌ ñeñth kowen acheñ ñamha amaꞌt ñeñth ama koweno acheñ. Ñeñthoꞌmarña theꞌpaꞌ oꞌ eñotatway Jesúspaꞌ ñach akrerrets tharroꞌmar Pomporpaꞌ oꞌ tantater amaꞌt oꞌ rromwa ñamha Jesúspaꞌ eꞌñe pokteꞌ es pen. Theꞌpaꞌ oꞌ eñotatway alloweney acheñey.
32Allempoña serrpareꞌtan Pablo atthoch yetanterra ellopaꞌ añña poesheñaꞌtets acheñpaꞌ oꞌ achmhareꞌchet. Tharraña poꞌpotantaññapaꞌ ateth otet:
—Ñewa, ñatoꞌ esempochña yeꞌmhñoterrperr poꞌpocheño.
33Allempoñapaꞌ awerr Pablo. 34Tharraña poesheñaꞌtetspaꞌ yemchet Pablo ñamha oꞌ ameꞌñet. Añña poesheñarr ñeñth ameꞌñatsa añ paꞌsoꞌcheñ Dionisio ñeñthara ñeñth amhchaꞌtarethtetsa ñeñth aꞌpoktateneꞌ ñoñets all oteñet Areópago. Ñapaꞌ oꞌ ameꞌña, ñamha poꞌpsheñeñ koyaneshaꞌ ñeñth paꞌsoꞌcheñ Dámaris. Ñamha poꞌpoñexhno acheñ oꞌ ameꞌñet ñamet.
© 2014, Wycliffe Bible Translators, Inc. All rights reserved.