2 Timoteo 1
1
Attho Pablopaꞌ alla kellkërranerr carta Timoteokop
1-2Masheñe Timoteo, ñeñtheph nanak nemoerena tharroꞌmar ateth nenteneph ñerraꞌmrratheꞌ eꞌñe nechemer nepeneph. Na Pablon oꞌch alla nekellkërrnaperr poꞌpoñ carta, ñeñthen Jesucristo poellsensaren tharroꞌmar ateth moenen Yompor atthoch nach eñotatyeseꞌ allowen acheñeneshaꞌ ñeñth ateth oteney Yompor: Eꞌñe yeyemteñoth Poechemer Cristo Jesúspaꞌ yañapaꞌ korretsayach yoksheñeshokmañen thayotheñ eꞌñe errponañowen. Theꞌpaꞌ eꞌñe newomhchaꞌteñothephpaꞌ oꞌch notaph: Yomporepaꞌchña pebensareꞌtampeneꞌ ñeñth nanak Parets epoet Poechemer Cristo Jesús ñeñth Yepartseshar yepen. Ñetepaꞌchña pemoerenaya. Ñetepaꞌchña phokshateneꞌ eꞌñe pha peyoxhro.
Attho Timoteo eꞌñe kowen ameꞌñena
3Eꞌñe neyerpoeñothephpaꞌ napaꞌ xhokma neparasyosoꞌteñ Yompor phokop, yetho amaꞌt ñamha tsapo allempo xhokma nemaꞌyocheña Yompor phokop. Ñeñthara Yompor ñeñth xhokma neñmañeshaꞌ nesherben, ateth sherbeꞌth ñamha awath natañneshañ. 4Ñamha napaꞌ xhokma neyerpoena allempo peyaꞌnaꞌtapoen awañmoꞌcha. Ñeñthoꞌmar theꞌ napaꞌ nemneñ errothenowakaꞌ yentannerra atthotheꞌ phokshaterren. 5Ñamha xhokma neyerpoenpha attho phapaꞌ eꞌñe kowen phameꞌñena, ñamha ateth ameꞌñena ñamha phaknor Loida ñamha phachor Eunice. Ñeñthoꞌmarña napaꞌ neñoteñ phapaꞌxhoꞌña xhokmatheꞌ phameꞌñena eꞌñe kowen.
Attho ama apenkaꞌpawo eꞌñe yeserrpareꞌteñoth Yompor poꞌñoñ
6Ñeñthoꞌmar napaꞌ nemneñ oꞌch alla neyerpaterrperr attho awañmoꞌcha Yomporpaꞌ awamenkath phaph allempo nenaꞌ namha not pesho. Ñeñthoꞌmarña theꞌpaꞌ amach pemoenmeꞌchatstoñe ñeñth ateth otaph Yompor. 7Tharroꞌmar Yomporpaꞌ ama añekpayeꞌ chorratenyoña Poekamkëñ atthoch yapaꞌ oꞌch xha yemhchaꞌt, añekopña chorratenya atthoch awamenkath phaꞌy, ñamha atthoch yemorrentannaꞌta alloweney, ñamha atthoch eꞌñe kowen yorrtatyen ñeñth ateth moenen Yompor. 8Ñeñthoꞌmarña theꞌpaꞌ amach pepenkatsto attho peserrpareꞌteññañ ñeñth ateth pena Yepartseshar Cristo. Ñamha amach pepenkatsto eꞌñe noꞌmar attho napaꞌ oꞌ cárceleꞌterrnet eꞌñe nameꞌñeñoth Cristo. Elloña xhochña pokteꞌ peñch phamha oꞌch pemoeroxhtapretna eꞌñe peserrpareꞌteñoth Cristo poꞌñoñ tharroꞌmar Yomporpaꞌ atthoña awamenkath peneph. 9Ñeñthara ñeñth oꞌ aꞌkeshphaterrey, atthoña oꞌ xhoreꞌterrey atthoch yemaꞌyoxhra ñeñth kowentetsa Partsokop. Tharraña añmapaꞌ ama añotheyaye attho eꞌñe kowen es yephaꞌyeseꞌth awath, añmapaꞌ tharroꞌmar ateth moenen ña. Yomporpaꞌ nanak morrentyeꞌth ñeñthoꞌmar amaꞌt awathotheñpaꞌ awoꞌt oꞌpatatya Poechemer Cristo Jesús. 10Ñeñth wapatsa atthoña theꞌpaꞌ oꞌ yeñoter attho nanak morrentya Pompor. Ñeñthara Poechemer Jesucristo ñeñth Yaꞌkeshphatañer yepen, tharroꞌmar ñach yaꞌkeshphaterreꞌ yerromñoth atthoch elloch yokrraꞌwerra, allempopaꞌ amach alla yaꞌrromñathterreꞌthe. Ñeñthoꞌmarña yoten theꞌña yapaꞌ oꞌ aꞌwañamperrey Cristo attho oꞌpatyeꞌth rromoeñets. Theꞌpaꞌ oꞌ yeñoter tharroꞌmar ateth yexhateney kowen ñoñets ñeñth wetsa Yomporeshoth.
11Ñeñthña añ kowen ñoñetspaꞌ ñeñthekop allsensarethen atthoch nach aꞌpotheꞌ allemeñ acheñenesheshoꞌmar amaꞌt ñamha ñeñth ama judioneshayaye, ñamha atthoch nach yexhatyesawet ñeñthara añ ñoñets. 12Ñeñthoꞌmarña theꞌpaꞌ eꞌñe neserrpareꞌteñoth añ ñoñetspaꞌ moeroxhtatennet, tharraña napaꞌ ama nepenkëno tharroꞌmar napaꞌ neñoteñ Yompor ñeñth neyemtenapaꞌ nanak awamenkath. Ñeñthoꞌmarña neñoteñ eꞌñe poꞌwamenkothpaꞌ oꞌch kowamphson ora all nethorraꞌyeseꞌth ñokop ñeñth ateth yechenna amaꞌt thayotheñ esempowañenchaꞌ werra.
13Phapaꞌ xhokmach phokthapeꞌch ñeñth ateth oꞌ neyxhatwanmaph, ñeñthara ñoñets ñeñth eꞌñe paxharr kothaphñats. Ñamha peparrokmateñoth Cristo Jesúspaꞌ xhokmach phameꞌñya kowen, ñamha xhokmach phaꞌmoerañta. 14Ñamha xhokmach peñota, amach phaꞌpoꞌpoñetatstoñe Yompor pokthaphña ñeñth ateth yechenpha Yompor. Eꞌñe poꞌwamenkoth Parets Poekamkëñ ñeñth yexhetsa yeyoxhro ñepaꞌchña peyenpoeꞌ.
Attho poesheñaꞌtetspaꞌ aꞌypoꞌñaꞌwaneret Pablo
15Napaꞌ oꞌ notaph ateth tharroꞌmar amaꞌt phapaꞌ peñoteñtheꞌ shonteꞌ acheñ ñeñth yexhaꞌyetsa Asioꞌmarpaꞌ oꞌ sowanerrnet, ateth ñerraꞌm Figelo ñamha Hermógenes. 16Theꞌpaꞌ aña xhokma nokshateneꞌ Onesíforo tharroꞌmar ñapaꞌ ama penkënno amaꞌt napaꞌ cárceloꞌtsenen. Ñeñthoꞌmarña Yomporpaꞌ aꞌnatanepaꞌ Onesíforo pamoꞌtseshaꞌ. 17Awañmoꞌcha allempo xhap Onesíforo arr Romopaꞌ ñapaꞌ nanak eꞌnameꞌterren atthoth enterren. 18Amaꞌt phapaꞌ nanak peñoteñ, awañmoꞌcha Efesopaꞌ ñapaꞌ nanak yenpaꞌy. Ñeñthoꞌmarña Yomporpaꞌ moeraꞌwerepaꞌch esempowañenchaꞌ werra poꞌyoroxhenñoth.
Currently Selected:
2 Timoteo 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.