2 Timoteo 2
2
Ñeñthchaꞌ ateth yethorra eꞌñe kowen Jesucristokop
1Nechemere Timoteo, eꞌñe peparrokmateñoth Cristo Jesúspaꞌ womenkëpaꞌch pephaꞌ peyoxher tharroꞌmar ñapaꞌ xhokmach yenpaph. 2Allpon peꞌmoneꞌth ñeñth ateth neserrpareꞌtacheꞌth shonteꞌ acheñeneshaꞌpaꞌ phapaꞌxhoꞌña theꞌpaꞌ atthekmach peyxhach poꞌpoñexhno ñeñth ameꞌñetsa atthoch ñetpaꞌxhoꞌña eñochet yexhatet allowen pamoꞌtseshaꞌ.
3Ñamha oꞌch notaph poꞌpoñ. Phapaꞌ amach pemhchaꞌtatsto atthoch pemoeroxhtapretya. Xhochña pokteꞌ peñch oꞌch pemoeroxhta ateth ñerraꞌmrratheꞌ xho pekhllarena eꞌñe kowen Jesucristokop. 4Ñatoꞌ oꞌch netmaꞌntacha ñeñth ateth pena solltarneshaꞌ. Solltar ñeñth ejércitoꞌtsenpaꞌ amach es kothapeꞌcheno poꞌpoñoneth ñeñth ateth pena ñeñth ama ejércitoꞌtseno. Añach patherr kothapeꞌchen atthoch koshatan ñeñth mandeneꞌ. Añ tomaꞌntena yapaꞌxhoꞌña añach patherr yokthapeꞌchen atthoch yokshach Jesucristo ñeñth yeyechenaya yamha. 5Ñatoꞌ oꞌch netmaꞌntatererr poꞌpoñ ñeñth ateth pena ñeñth atarr juegëtsa. Ñeñth atarr kowen juegëtsa xhokmach juegënet eꞌñe kowen eꞌñe ateth anarethtenet ñokpoet atthoch eꞌñe kowen ganet. Ñerraꞌm ama eꞌñe ateth juegëto eꞌñe ateth anarethtenet ñokpoet, amach errothenoth aparethtetoña ñeñthchaꞌ koshatawet ñeñthekop atarr juegënet. Ñeñthpaꞌ añ tomaꞌntena yapaꞌxhoꞌña ñerraꞌm amach ateth yeperro ñeñth ateth anareth Yompor poꞌñoñ yokop, amach errothenoth apoerrye ñeñthchaꞌ nanak yokshaterreꞌ. 6Oꞌch netmaꞌntatererr poꞌpoñ. Ñeñth nanak tarwasets paꞌmropaꞌ ñapaꞌ ñanomchaꞌ rreꞌ ñeñth nareꞌten. Ñeñthpaꞌ añ tomaꞌntena ñeñth nanak thorretsa Yomporekop ñapaꞌxhoꞌña nanakchaꞌ koshateñ poꞌtarwas ñeñth ateth thorrena Yomporekop. 7Ñewa, phokthapeꞌch ñeñth ateth noteneph tharroꞌmar Yepartsesharpaꞌ xhapatonaphchaꞌ peyoxhro ora ñeñth ateth tomaꞌntena añexhno.
Añ pokteꞌ xhokmach yeyerpoeña Jesucristo
8Amach pepsatsto attho Jesucristopaꞌ tanterra allempo rroma, ñeñthara ñeñth poꞌmhreneñ David, ñamha ñeñthara Cristo ñeñth xhokma neserrpareꞌten atthoch yekeshperra. 9Ñeñthoꞌmarña napaꞌ atthothña wankaꞌnet attho theꞌpaꞌ nanak nemoeroxhtena ateth ñerraꞌmrratheꞌ amtsañen. Tharraña Yompor poꞌñoñpaꞌ amach errothenoth wankëto. 10Ñeñthoꞌmarña napaꞌ xhokma naꞌwanten attho nemoeroxhtena, allochñapaꞌ ñerraꞌm erraꞌtsenchaꞌ akrerr Yompor ñeñthchaꞌ ameꞌñerrayapaꞌ keshperretchaꞌ eꞌñe pameꞌñeñothet Cristo Jesús. Ñamha all Yompor poꞌkowenñopaꞌ korrerretchaꞌ errponowañen.
11Añ ñoñets allo xhokma yaꞌxhoteñ Yomporpaꞌ eꞌñe poꞌñoxh ateth:
Ñerraꞌm eꞌñe yameꞌñeñoth Cristo yerromapaꞌ yeyxherrach parro epay Cristo.
12Ñamha ñerraꞌm xho yemoeroxhtaprecha Cristopaꞌ yaꞌmhchaꞌtarethtapreterach esempowañen. Tharraña ñerraꞌm xha yaꞌnasoteñapaꞌ, ñapaꞌxhoꞌña aꞌnasoterryach esempowañen.
13Amaꞌt allempo yapaꞌ ama yeyemteño, tharraña poꞌñoñ ñeñth ateth otenpaꞌ xhokma poꞌñoxh ateth, tharroꞌmar amach errothenoth alla aꞌpoꞌpoñeterrano ñañeña poꞌñoñ.
Attho Yomporpaꞌ eꞌñech kowen paꞌtarwasañer peney
14Oꞌch alla noterrperr poꞌpoñ: Xhokmach peyerpacha acheñeneshaꞌ ñeñth ateth oꞌ notwaph, ñamha oꞌch photanet eꞌñe Yompor poꞌwamenkoth amach alloꞌna otnareꞌtannaꞌtyesneneto eꞌñe ñañeñeta pokthaphñoꞌmaret. Tharroꞌmar attho es otnareꞌtannaꞌtyenetpaꞌ amaꞌt mameshapaꞌ ama es sherbeno. Ñerraꞌm atthach penetpaꞌ attheñapaꞌ oꞌch alla poerrwerra allowen acheñeneshaꞌ ñeñth eꞌmhñotenawet. 15Tharraña phapaꞌ añchaꞌña pemaꞌyoxhra ñeñth kowentetsa Yomporekop atthoch ñapaꞌ entaph eꞌñe kowen atarwasañeph. Amach eñalle ñeñthchaꞌ pepenkateꞌ all pethorraꞌyena ñokop. Atthochña xhokmach pesherbhatoñ poꞌñoñ ñeñth eꞌñe poꞌñoxh ama shekëñtsoyaye. 16Ñamha phapaꞌ amach phaꞌna otnareꞌtatstaweto ñerraꞌm esempo es otnareꞌtannaꞌtyenet. Tharroꞌmar ñeñth ateth serrpareꞌtatyenetpaꞌ ama añeyaye alloch womenk yephaꞌ yeyoxher Yomporekop. Ñamha ñeñth ateth petsapaꞌ attheñapaꞌ oꞌch alloꞌna senet poeswanmoet ñeñth ateth yexhateney Yompor. 17Ñamha ñerraꞌm alloꞌnach yexhatnenet ñeñth ama es sherbetsopaꞌ, attheñapaꞌ ñerraꞌm oꞌchña epaꞌwa orapaꞌ alloꞌnach senet poeswanmoet ñeñth ateth moenen Yompor. Ñatoꞌ oꞌch netmaꞌntacha ñeñth ateth pena atsnañets ñeñth otenet cáncer ñeñthpaꞌ mamesha oꞌch epaꞌwa ora yechtso oꞌch moetsay. Ñeñthpaꞌ ateth pha epsheña ñeñth paꞌsoꞌcheñ Himeneo ñamha Fileto, tharroꞌmar ñetpaꞌ aña yexhatenet poꞌpoñ kothaphñats. 18Ñetpaꞌ attha ayxhaꞌnatateññañet Yompor poꞌñoñ all oteney esempopaꞌ yetanterrach. Ñetpaꞌ awoꞌt serrpareꞌtatyeset acheñeneshaꞌ ateth: “All oteney Yompor atthoch yetanterra esempopaꞌ ñeñthpaꞌ tomaꞌnteñtsa. Ñeñthpaꞌ aña tomaꞌntena attho yapatarethta awaña oño.” Ñeñthoꞌmarña patantaꞌtets ñeñth ameꞌñetsapaꞌ alla kexhpaꞌweret attho ameꞌñeñet Yompor. 19Amaꞌt ateth phañ patantarrpaꞌ tharraña Yompor poꞌñoxhpaꞌ ama poeno poꞌñoñ. Amaꞌt Yompor poꞌñoñ ñeñth akellkareth awathotheñpaꞌ ateth eñotateney eñallach patheꞌtets acheñ ñeñth poꞌñoxh ameꞌñenaya. Ñeñthpaꞌ ateth oten: “Yomporpaꞌ chemeꞌtenan ñeñth poꞌñoxh ameꞌñenaya.” Añpaꞌ arr eñotateney poꞌpoñ Yompor poꞌñoñ ñeñth akellkareth awathotheñ, ñeñthpaꞌ ateth oten: “Alloweney ñeñthey kotheneꞌ Cristopaꞌ yekexhpaꞌwerrepaꞌ allowen sosyaꞌtsañ.”
Oꞌch netmaꞌntacha ñeñth ateth pena pokoll
20-21Poꞌñoxhpaꞌ xhoch yeswanom allowen sosyaꞌtsañ, allochñapaꞌ atthoch añach yemaꞌyoxhra atthoch yesherbeꞌ eꞌñe kowen Yompor. Tharroꞌmar alloweney ñeñthey ameꞌñetsapaꞌ ama eꞌñe atthekmayeꞌ yesherbeñe Yompor. Ñatoꞌ poesheñaꞌtetspaꞌ nanakchaꞌ kowen sherbeñet Yompor, ñatoꞌ poꞌpotantaññapaꞌ amach. Ñatoꞌ oꞌch netmaꞌntacha ñeñth ateth pena pokoll. Ñeñth acheñ ekhllayorethpaꞌ arrña paꞌpakllopaꞌ shonteꞌch eñall paꞌnamen koymexhno. Ñatoꞌ patantarrpaꞌ ororroꞌch ñatoꞌ poꞌpotantañpaꞌ asrerroꞌch, ñatoꞌ poꞌpotantaññapaꞌ tsachrroꞌch, ñatoꞌ poꞌpotantaññapaꞌ patsrroꞌch. Tharraña allowenpaꞌ amach eꞌñe atthekmayeꞌ sherbenano pamoꞌmteꞌ. Ateth ñerraꞌm ñeñth ororroꞌpaꞌ nanakchaꞌ koxhneshoth sherbenan pamoꞌmteꞌ, tharraña ateth ñerraꞌm patsrroꞌpaꞌ amach tama koxhneshotheyeꞌ sherbenano pamoꞌmteꞌ. Ñeñthoꞌmarña yapaꞌxhoꞌña ñerraꞌm yemneñ oꞌch yesherbeꞌ eꞌñe koxhneshoth Yamoꞌmteꞌ Cristopaꞌ añ palltetsa xhoch ñanom yeswanom allowen sosyaꞌtsañ atthoch añach yemaꞌyoxhrena ñeñth kowentetsa Yamoꞌmtayekop. Allochñapaꞌ amaꞌt erraꞌtsena es yephaꞌyenpaꞌ eꞌñech kowenakma yokshateñ Yamoꞌmteꞌ Cristo.
22Ñeñthoꞌmarña phapaꞌ noteneph oꞌch peswanom allowen sosyaꞌtsañ ñeñth ateth moenatseꞌtyen wepaneshaxhno ñeñth ama poꞌñoxhayeꞌ sherbenaye Yompor, allochña phapaꞌ añach pemaꞌyoxhrena ñeñth kowentetsa Yomporekop, ñamha xhoch phameꞌñya Yompor eꞌñe peñmañeshaꞌ, ñamha xhokmach pemoerya allowen phamoꞌtseshaꞌ. Allochñapaꞌ atthoch peparrokmat epaph allowen ñeñth eꞌñe kowen poeyoxher peneꞌ Yepartsesharekop. 23Ñamha ñerraꞌm esempo es otnareꞌtannaꞌtyenetpaꞌ phapaꞌ amach peꞌmhñotatstaneto, tharroꞌmar ñeñth ateth otatseꞌtyetspaꞌ eꞌñe orrena ateth penet. Amaꞌt phapaꞌ peñoteñ ñerraꞌm xho es yotnareꞌtannaꞌtapaꞌ alloth wena shonteꞌ atsrreꞌmoeñets. 24Tharroꞌmar ñeñth thorretsa Yepartsesharekoppaꞌ ama pokteyaye oꞌch attha atsrreꞌmareꞌtyesa allemeñ. Elloña xhochña yaꞌmoerañta allowenakop. Ñamha xhochña yeyxhatyes eꞌñe kowen acheñeneshaꞌ ñeñth ateth kowen enten Yompor. Ñamha amaꞌt ñetpaꞌ erroth phaꞌyetpaꞌ yapaꞌ eꞌñe yemorrenteñothpaꞌ oꞌch yaꞌwantoñ. 25Ñamha añ pokteꞌ oꞌch alla yokthapeꞌchater kowen ñeñth yeꞌmoñeꞌteneꞌ. Tharraña eꞌñech akopha yokthapeꞌchatyerranet eꞌñe kowen. Ñamha oꞌch yekwenanet eꞌñe akopha esempowañenchaꞌ xhapanet poeyoxhro ñeñth eꞌñe poꞌñoxh kowen enten Yompor. Ñamha oꞌch yekwenanet esempowañenchaꞌ kothapeꞌcherret ello eꞌñe kowen Yomporekop. 26Ñerraꞌm ateth yephapaꞌ ñatoꞌ atthothpaꞌ oꞌch aꞌrroyerranet oneñeth attho wankënanet attho theꞌpaꞌ phaꞌyenet sosyaꞌtsañ ñeñth ateth moenatenanet ña.
Currently Selected:
2 Timoteo 2: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
