1 Timoteo 6
6
Añpaꞌ ñeñth poktetsa ñeñthchaꞌ ateth pha ñeñth atarwasatareth eꞌñe attha
1Theꞌpaꞌ oꞌch notaph poꞌpoñ ñeñth poktetsa ñeñthchaꞌ ateth pha ñeñth atarwasatareth eꞌñe attha ñeñthara ñeñth oꞌ ameꞌñerrana Cristo. Añ pokteꞌ ñetpaꞌ kowenchaꞌ eñchet poꞌpatronar, atthoch eꞌñe ñothothetpaꞌ amach errothenoth eñalle atthoch achmhareꞌtachet Yompor, ñamha ñeñth ateth yeyxhaten Cristokop. 2Ñamha ñeñth atarwasatareth eꞌñe attha, ñerraꞌm poꞌpatronarpaꞌ ameꞌñenet ñametpaꞌ elloña allempopaꞌ amach athpareꞌtatscheto amaꞌt mamesha, tharroꞌmar oꞌ paꞌmoꞌnasheñ peret eꞌñe pameꞌñeñothet Yompor. Amach otaphsaꞌtatsteto “theꞌpaꞌ amaꞌtchaꞌ ama eꞌñe nameꞌñyo nepatronarñaꞌ oꞌ ameꞌñerrapaꞌ amach erroth phaꞌno.” Elloña theꞌpaꞌ eꞌñech yemorrenteñeshaꞌ yesherbeñ yemoꞌnasheñ eꞌñe kowen. Masheñe Timoteo, añpaꞌ xhokmach peyxhatanet, ñamha oꞌch photanet ñeñthchaꞌ ateth pet.
Kothaphñats ñeñth ama poꞌñoxhoyaye
3Ñerraꞌm eseshaꞌ yexhatats poꞌpoñ kothaphñats ñeñth ama attheyaye ateth yexhateney Yepartseshar Jesucristo ñeñth poꞌñoxh ateth moenen Yomporpaꞌ 4ñeñth acheñ atethpaꞌ atthach ommoꞌchena, poꞌñoxh ñeñthpaꞌ ama xhoyeꞌ es eñoteno. Ñeñth ateth acheñerpaꞌ añekpach ateth pena atthoch es otnareꞌtyesan acheñeneshaꞌ eꞌñe poꞌpoñ kothaphñatsoꞌmara. Eꞌñe potnareꞌtannaꞌteñothetpaꞌ oꞌch attha atsrreꞌmareꞌtet, ñamha oꞌch attha eꞌmoñeꞌtannaꞌtet, ñamha oꞌch attha sasareꞌtannaꞌtyeset, ñamha allempopaꞌ oꞌwañchaꞌ eñorannaꞌtet. 5Poꞌñoxh añ acheñ ñeñth attha kothapeꞌchatseꞌtets eꞌñe ñañeña pokthaphñothpaꞌ poꞌñoxhpaꞌ amach kothapeꞌchenano amaꞌt mamesha ñeñth kowentetsa ñamha amach eñotenano ñeñth poꞌñoxh alloch yekeshperra. Ñetpaꞌ atthach xhokma moeneñet oꞌch es otnareꞌtannaꞌtyeset. Ñamha ñetpaꞌ añekpach moeneñet oꞌch serrpareꞌtet Yomporekop atthoch ganet esokmañen. Ñeñthoꞌmarña ñeñth ateth acheñpaꞌ amach peyemtatscho. 6Ñewa, poꞌñoxh yapaꞌ yeñoteñ eꞌñe yameꞌñeñoth Cristopaꞌ shonteꞌ yechen esokmañen. Ñeñthoꞌmarña yapaꞌ ñeñthach nanak yokshena. 7Tharroꞌmar allempo yeꞌñalleta awathpaꞌ attha yeꞌñalleta moelleꞌmkoth. Theꞌpaꞌxhoꞌña ñerraꞌm esempo yerromoenpaꞌ amach errothenoth yawanmo yechekom. 8Ñeñthoꞌmar yapaꞌ amach es yellkatsto. Ñerraꞌm yechen ñeñthchaꞌ yerraꞌ ñamha ñeñthchaꞌ yechorrapaꞌ ñeñthach yokshena. 9Tharroꞌmar ñeñth moenets oꞌch echan esokmañenpaꞌ amach errothenoth awantano attho topatyeney oneñeth. Atthach paꞌnamen yeꞌchatseꞌtyenet ñeñth ama es sherbetso. Elloña ñeñthpaꞌ ñeñthchaꞌ anmawet chenkëñtso esempowañen. 10Tharroꞌmar eꞌñe yeyeꞌchapreteñoth kellepaꞌ alloth wenaña esokmañen sosyaꞌtsañ. Tharroꞌmar poesheñaꞌtets ñeñth nanak moenets oꞌch ganet shonteꞌ kellepaꞌ attheñapaꞌ oꞌwañchaꞌ ameꞌñyet Yompor. Ñeñthoꞌmarña akophonethpaꞌ oꞌch wapanet shonteꞌ ñeñthchaꞌ nanak llekatawet.
Añach patherr yemaꞌyoxhra ñeñth kowentetsa Yomporekop
11Tharraña phapaꞌ amach ateth pephatsto tharroꞌmar phapaꞌ anaretheph Yomporekop. Ñeñthoꞌmarña phapaꞌ añach pemaꞌyoxhra ñeñth kowentetsa Yomporekop, ñamha xhokmach peyerepya Yompor, ñamha xhokmach phameꞌñya kowen, ñamha xhokmach pemorrencha phamoꞌts, ñamha xhokmach phaꞌwantaꞌwanom ñeñth atarr echarr pentyen amach phañeña eꞌñe kowen entatstatso. 12Ñamha xhokmach phameꞌñya kowen Yompor ateth ñerraꞌm xho pekhllarena Yomporekop. Allochñapaꞌ eshekchaꞌ peñoch phapaꞌ korretsaphach thayotheñ eꞌñe errponañowen. Ñeñthoꞌmar Yomporpaꞌ xhoreꞌtaph awaña allempo peñotach allowen acheñeneshaꞌ attho phapaꞌ oꞌ phameꞌñerra. 13-14Theꞌpaꞌ oꞌch, masheñe, noterrperr poꞌpoñ ñeñthchaꞌ ateth pepha. Xhokmach petsotwa ora ñeñth ateth oteneph Yompor. Amach phokthapeꞌchatsto poꞌpoñoneth atthoch amach eñalle atthoch thanmareꞌtapha acheñeneshaꞌ. Añpaꞌ atethchaꞌ pepha tharrempowa esempowañenchaꞌ werra Yepartseshar Jesucristo. Tharroꞌmar amaꞌt theꞌ Yomporpaꞌ enteneph, ñeñthara Yompor ñeñth yapoeneꞌ yokrreña themeꞌttsen, ñamha allowen ñeñth yentyen. Ñamha Poechemer Jesucristopaꞌxhoꞌña enteneph, añ ñeñthara Cristo ñeñth eñosets eꞌñe kowen allempo aꞌphthoꞌtareꞌteñ Poncio Pilato. 15Esempowañenchaꞌña pokteꞌ enter Yomporpaꞌ allempochña moeñerranerr alla Poechemer arr patsro, ñeñthara Yompor ñeñth eꞌñe pathrra, ñamha ñeñthara ñeñth atarr yaꞌyeꞌchoxhtatyen alloweney, ñamha ñeñthara ñeñth nanak awamenkath, ñeñth Pompor pen amaꞌt allowen ñeñth amhchaꞌtarethetyetsa, ñamha allowen ñeñth ayochreshathetyetsa. 16Ñamha ñeñthara Yompor ñeñth ñapoeth ama arromñatheshayaye, ñeñthara Yompor ñeñth yexhetsa alloꞌtsen poetareꞌ ñeñth nanak aꞌrrechatañ all amach errothenoth yexhapo. Amaꞌt poesheñarra acheñpaꞌ ama poentare all, tharroꞌmar amatheꞌ errothenoth yexhapo. Ñeñthoꞌmarña yaꞌyeꞌchoxhtatoñepaꞌch Yompor, ñamha awamenkathepaꞌch thayotheñ errponowañen. Ñeñthpaꞌ atthetepaꞌch, Nompore.
Arrpaꞌ all kothapeꞌchatan ñeñth nanak ekhllayoreth
17Theꞌpaꞌ oꞌch notaph poꞌpoñ. Ñeñth nanak echekmathtetsa añ patsropaꞌ oꞌch photanet amach ommoꞌchatsteto eꞌñe poꞌchekmoth, ñamha amach kothapeꞌchatsteto ñatoꞌ pokhllayorothpaꞌ amach es pallterreto, tharroꞌmar ñeñthpaꞌ wañerrchaꞌ esempowañen. Añña yemchetepaꞌ Yompor ñeñth ama arromñatheshayaye ñamha ñeñth yapoeneꞌ shonteꞌ esokmañen ñeñthchaꞌ xhokma yokshateneꞌ. 18Ñamha oꞌch photanet petepaꞌ eꞌñe kowen Yomporekop, ñamha es apaꞌyesetepaꞌ ñeñth es palltetsa, ñamha amoerañtetepaꞌ. 19Ñerraꞌm atethchaꞌ petpaꞌ eñallchaꞌ shonteꞌ alloch koshaterranet tsapathoneth Yompor. Ellopaꞌ oꞌch apanet ñamha atthochña ñetpaꞌ korretsetach poksheñeshokmañen thayotheñ eꞌñe errponañowen.
Ñeñth ateth otan Timoteo eꞌñe allowanen
20Eꞌñe allowanenpaꞌ oꞌch, masheñe Timoteo, noterrperr alla: Xhokmach petsotwa ora ñeñth ateth oteneph Yompor. Amach peꞌmhñotatsche ñeñth xhokma moenets oꞌch es otnareꞌtannaꞌtyesa. Ñeñthpaꞌ ama sherbeno amaꞌt mamesha Yomporekop. Amaꞌt ñetpaꞌ otenetañ poꞌñoxhoꞌ es eñotenetpaꞌ tharraña yapaꞌ yeñoteñ ñeñthpaꞌ ama poꞌñoxhoyaye. 21Tharroꞌmar poesheñaꞌtets ñeñth kotheneꞌ atethpaꞌ ama xhenaneto poeyoxhro ñeñth ateth yameꞌñeña Cristo.
Theꞌpaꞌ Yomporepaꞌch phaꞌnataya. Ñeñthach notaph, ñeñthpaꞌ atthetepaꞌch Nompore. Allowa.
Pablo
Currently Selected:
1 Timoteo 6: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.