SAKARAIA 1
1
Sa vakarota na veivutuni ko Sakaraia, 1-6. A raivotu ni ose, 7-11. Sa masulaki Jerusalemi na agilose, ka sa qai vakacegui e na vosa ni yalayala, 12-17. A raivotu ni kaukamea e va, kei na matai e lewe va, 18-21.
1E nai kawalu ni vula, e nai karua ni yabaki i Taraiase, sa yaco na vosa i Jiova vei Sakaraia, na luve i Parakaia, na luve i Ito, na parofita, ka vaka,
2Sa cudru vakalevu ko Jiova vei ira na nomudou qase. 3O koya oqo mo kaya kina vei ira, Sa kaya vakaoqo ko Jiova ni lewe vuqa; Dou lesu mai vei au, sa kaya ko Jiova ni lewe vuqa, au na qai lesu vei kemudou, sa kaya ko Jiova ni lewe vuqa. 4Dou kakua ni vakataki ira na nomudou qase, ka kaci kina ko ira na parofita eliu, ka vaka Sa kaya vakaoqo ko Jiova ni lewe vuqa; Dou lesu mada mai na nomudou i tovo ca, kei na nomudou i valavala ca: ia era a sega ga ni rogoca, se vakarorogo vei au, sa kaya ko Jiova.
5A nomudou qase, era tiko evei? kei ira na parofita, era sa bula li ka tawa mudu? 6Ia na noqu vosa kei na noqu i lesilesi, ka'u a vunautaka vei ira na noqu i talatala na parofita, sa sega ni vauci ira li na nomudou qase? io, era a lesu mai, ka kaya, Me vaka na ka sa nanuma ko Jiova ni lewe vuqa me cakava vei keimami, me vaka na neimami tovo, kei na neimami valavala, sa caka vakakina vei keimami.
7E nai karuasagavulu ka va ni siga e nai katinikadua ni vula, na vula ko Sipati, e nai karua ni yabaki i Taraiase, sa yaco na vosa i Jiova vei Sakaraia, na luve i Parakaia, na luve i Ito, na parofita, ka vaka,
8Au a vakaraica e na bogi, ka raica, sa dua na tamata sa vodoka e dua na ose damudamu, a sa tu ko koya e na loma ni veimateli e na buca; ia mai dakuna sa tu eso na ose damudamu, ka veivolavolai, ka vulavula. 9Au a qai kaya, A cava na ka oqo, noqu turaga? A sa kaya vei au na agilose keirau sa veivosaki kaya, ka vaka, Oi au ka'u na vakaraitaka vei iko se sa cava na ka oqori. 10A sa kaya na tamata sa tu e na loma ni veimateli, Ko iratou oqo sa tala ko Jiova me veilakoyaki voli e vuravura. 11A ratou sa qai kaya vua na agilose i Jiova ka tu e loma ni veimateli, ka vaka, Keitou a veilakoyaki voli e vuravura, ka raica, sa tiko ga ko vuravura kece, ka sa sautu.
12Sa qai kaya na agilose i Jiova, ka vaka, Kemuni Jiova ni lewe vuqa, a cava na kena dede ko ni na sega kina ni yalololoma kina ki Jerusalemi, kei na veikoro vaka-Juta, ko ni sa cudruva tiko ka yabaki vitusagavulu? 13A sa vosa ko Jiova vua na agilose keirau sa veivosaki kaya e na vosa vinaka, io, e na vosa ni veivakacegui. 14A sa kaya vei au na agilose keirau sa veivosaki kaya, Mo kaci mada, ka vaka, Sa kaya vakaoqo ko Jiova ni lewe vuqa; Au sa vuvu vakalevu sara e na vuku i Jerusalemi kei Saioni; 15ia ka'u sa rarawa dina vei ira na veimatanitu era tiko vakacegu wale: ni'u a rarawa vakalailai ga koi au, ia ko ira era sa vakabibitaka na ca. 16O koya oqo, sa kaya kina ko Jiova; au sa lesu mai ki Jerusalemi e na yalololoma: a noqu vale ena tara kina, sa kaya ko Jiova ni lewe vuqa, ia na wa i vakarau ena dre ga yani e Jerusalemi. 17Mo kaci tale, ka vaka, Sa kaya vakaoqo ko Jiova ni lewe vuqa; Ena tete yani na noqu veikoro e na vuku ni kedra vinaka; ia ena vakacegui Saioni tale ko Jiova, ka digitaki Jerusalemi tale.
18Au a qai ta cake, ka vakaraica, ka raica, sa va nai leu. 19Au a qai vaka vua na agilose keirau sa veivosaki tiko kaya, A cava oqori? A sa kaya vei au ko koya, Oqo nai leu sa dui vakasevi kina ko ira na Juta, kei ira na Isireli, kei ira na kai Jerusalemi. 20A sa vakaraitaka vei au ko Jiova e le va na matai. 21Au a qai kaya, A cava era sa mai cakava ko iratou oqo? A sa kaya ko koya, Oqo nai leu sa dui vakasevi ira na Juta, ka sa sega kina e dua na tamata me ta cake rawa; ia ko iratou oqo sa lako mai me ratou vakasavi tani, me viritaka sobu na nodratou i leu na veimatanitu, eratou sa laveta cake na nodratou i leu ki na vanua ko Juta me ratou vakasava.
Currently Selected:
SAKARAIA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific