AKEAI 2
2
Sa vagumatuataki ira e na vosa ni yalayala e levu ka talei, me tara na vale tabu, 1-9. Sa tukuna na ka ca ena yacovi ira kevaka era gucataka, 10-19. Sa ia na vosa ni veivakacegui vei Serupapeli, 20-23.
1E nai kavitu ni vula, e nai karuasagavulu ka dua ni siga ni vula, sa yaco na vosa i Jiova vei Akeai na parofita me tukuna, ka vaka, 2Mo vosa mada vei Serupapeli na luve i Sialitieli, na kovana e Juta, kei Josua na luve i Jiosataki, na bete levu, kei ira na tamata sa vo tiko, ka kaya,
3O cei vei kemudou sa bula tiko dou a raica na vale oqo e na kena lagilagi eliu? ka sa vakabeka evei na ka dou sa qai raica edaidai? sa sega li ni vaka na ka wale sara e na matamudou? 4Ia mo gumatua mada ga Serupapeli, sa kaya ko Jiova; mo gumatua talega, Josua na luve i Jiosataki, na bete levu; mo dou gumatua kece talega, na lewe ni vanua, sa kaya ko Jiova, ia dou ia na cakacaka, ni'u sa tiko vata kei kemudou, sa kaya ko Jiova ni lewe vuqa. 5Me vaka na noqu vosa ni veiyalayalati kei kemudou, ni dou a lako mai Ijipita, sa tiko ga kei kemudou na Yaloqu: dou kakua ni rere.
6Ni sa kaya vakaoqo ko Jiova ni lewe vuqa; Sa vakadua tale, sa vo e lailai, ka'u na qai vakayavalataki lomalagi, kei vuravura, kei na waitui, kei na vanua mamaca; 7ia ka'u na vakayavalataka na veimatanitu kecega, ena qai yaco mai na ka sa domoni e na veimatanitu kecega; ia ka'u na vakasinaita na vale oqo e nai ukuuku, sa kaya ko Jiova ni lewe vuqa. 8Sa noqu na siliva, ka sa noqu na koula, sa kaya ko Jiova ni lewe vuqa. 9Ena levu nai ukuuku ni vale oqo ki muri ka lailai nai ukuuku ni vale eliu, sa kaya ko Jiova ni lewe vuqa: ia e na yasana oqo ka'u na ia kina na veivinakati, sa kaya ko Jiova ni lewe vuqa.
10E nai karuasagavulu ka va ni siga e nai kaciwa ni vula, e nai karua ni yabaki i Taraiase, sa yaco na vosa i Jiova vei Akeai na parofita me tukuna, ka vaka, 11Sa kaya vakaoqo ko Jiova ni lewe vuqa; Mo tarogi ira mada na bete e na vuku ni vunau, ka kaya, 12Ke dua na tamata sa kauta na lewe ni manumanu mei soro tabu e na tutu ni nonai sulu, a sa tara e na tutu ni sulu na madrai, se na su, se na waini, se na waiwai, se dua na kakana, sa na tabu kina na ka oqori se segai? A ra sa kaya na bete, E segai. 13Sa qai kaya ko Akeai, Ke dua sa sega ni savasava e na vuku ni yago ni mate, me tara e dua na ka oqori, ena sega ni savasava li na ka ko ya? A ra sa kaya na bete, Ena sega ni savasava. 14Sa baci vosa tale ko Akeai, ka kaya, Sa vakakina ko ira na tamata oqo, ka sa vakakina na matanitu oqo e mataqu, sa kaya ko Jiova; sa vaka talega kina na cakacaka kecega ni ligadra; ia na ka era sa vakacabora maikea sa sega ni savasava. 15Ia oqo, dou vakananuma mada e na siga oqo ka yacova na gauna sa oti yani ni sa sega na veivatu e veitaqataqai e na vale tabu i Jiova: 16mai na veigauna ko ya, ni sa lako mai e dua ki nai binibini vau sila e ruasagavulu, ia ka sa qai tini ga: ni sa lako mai ki nai keli-waini me takiva e limasagavulu mai nai keli, sa qai ruasagavulu walega. 17Au a yaviti kemudou e na cagi todra, kei na bokata, kei na uca-cevata, e na cakacaka kece ni ligamudou; ia dou a sega ga ni lesu vei au, sa kaya ko Jiova.
18Dou vakananuma mada e na siga oqo, io nai karuasagavulu ka va ni siga e nai kaciwa ni vula ka yacova na gauna sa oti yani; io ki na siga sa tauyavutaki kina na vale tabu i Jiova, dou vakananuma kina. 19Sa vo li na sila e na lololo? ia na vaini, kei na lolo, kei na pomekaraneti, kei na olive, sa sega sara ni vua mai; Tekivu vata kei na siga oqo ka'u na vakalougatataki kemudou.
20Sa baci yaco tale na vosa i Jiova vei Akeai e nai karuasagavulu ka va ni siga ni vula, ka vaka, 21Mo kaya vei Serupapeli, na kovana e Juta, Au na vakayavalata na lomalagi kei vuravura; 22ia ka'u na vukica nai tikotiko vakaturaga ni veimatanitu, ka vakarusa na kaukauwa ni veimatanitu e na veivanua; ka vukica na qiqi-ni-valu, kei ira era vodo kina: a ra na dui bale sobu na ose kei ira era vodo kina, na tamata yadua e nai seleiwau ni wekana. 23E na siga ko ya, sa kaya ko Jiova ni lewe vuqa, au na kauti iko, Serupapeli na luve i Sialitieli, na noqu tamata, sa kaya ko Jiova, ia ka'u na cakava mo tautauvata kei na mama ni taba: ni sai iko ka'u sa digitaka, sa kaya ko Jiova ni lewe vuqa.
Currently Selected:
AKEAI 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific