NEUMI 1
1
1Na vosa ni parofisai bibi ka baleti Ninive. Oqo nai vola ni raivotu i Neumi na kai Elikosi.
2Sa Kalou vuvu ko Jiova, a sa ia na veisausaumi; sa ia na veisausaumi ko Jiova, ka sa ka levu na nona cudru; ena ia na veisausaumi ko Jiova vei ira sa cati koya, io, sa binia ko koya na cudru me tau vei ira na nona meca. 3Sa daubera ni cudru ko Jiova, ka sa levu na nona kaukauwa, ia ena sega sara ni vakadonui ira na tamata ca: sa dua na sala i Jiova e na covulaca kei na cava, ia sa kena kuvu-ni-soso ni yavana na o. 4Sa vunauca na wasawasa, ka sa di mai, ia na uciwai kecega sa vakadiva talega: sa malai ko Pasani, kei Kameli, ia na se ni kau mai Lepanoni sa malai. 5Na veiulu-ni-vanua sa sautaninini e na vukuna, na veiulu-ni-koro talega sa waicala, sa tavuki talega na vanua e matana, io ko vuravura, kei ira kecega era tiko kina. 6Ko cei me tiko rawa e na mata ni nona cudru? ia ko cei me vosota rawa ni sa waqawaqa na nona cudru? a nona cudru sa sovaraki yani me vaka na bukawaqa, ia na uluvatu sa talaraka sobu ko koya.
7Sa yalovinaka ko Jiova, sai vakaruru kaukauwa e na siga ni rarawa: ka sa kilai ira era vakararavi vua. 8Ia e na dobui levu ena vakaotia sara yani na kenai tikotiko, ia ena muri ira na nona meca na butobuto. 9A vere cava dou sa bukia kei Jiova? ena vakayacora sara ko koya na kenai vakataotioti, ena sega ni tubu vakarua na ka rarawa. 10Ia ke ra coko veidre me vaka na soni, ka mateni sara e na waini, era na vakayavuni ga me vaka na vu-ni-sila e mamaca sara. 11Sa lako maivei iko ko koya sa nanuma tiko na ca vei Jiova, e dua sa vakavuvulitaka na ca. 12Sa vosa vakaoqo ko Jiova; Ke ra kaukauwa sara, ka lewe vuqa, era na tamusuki sobu ga, ka na lako tani yani ko koya. E dina ka'u a vakararawataki iko, ia ka'u na sega ni vakararawataki iko tale. 13Ni'u na qai musuka tani vei iko na nonai vua, ka cavuka na kemui vesu.
14Sa vakarota e na vukumu ko Jiova, me kakua sara ni tubu tale e dua na nomu kawa: ka'u na muduka tani mai na nomu bure kalou na matakau ceuceu kei na matakau e vakawaicalataki; ka'u na cakava na nomu i bulubulu; ni ko sa velavela.
15Raica e na ulu-ni-vanua na yava i koya sa kauta mai nai rogorogo vinaka, sa vakarogoya voli na sautu! Ko iko Juta, mo ia na nomu so levu tabu, vakayacora na nomu bubului: ni na sega tale ni lako voli yani vei iko na tamata ca; sa muduki laivi sara ko koya.
Currently Selected:
NEUMI 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific