NEUMI 2
2
Ai valu ni Kalou e rerevaki ka daugumatua vei Ninive.
1Sa lako cake mai kivei iko ko koya na dauveivakarusai: vakatawa na koro vakabai, yadrava na sala, vauca matua na tolomu, vakaukauwataki iko mo kaukauwa sara. 2Ni sa vakasuka mai ko Jiova na nodra lagilagi na Jekope, me vaka na nodra lagilagi na Isireli: ni ra a vakacacani ira ko ira na dauvakacaca, ka ra sa vakarusa na taba ni nodra vaini. 3Sa vakadamudamutaki nai sasabai ni nona tamata qaqa, era sa vakaisulu e nai sulu kulakula ko ira na tamata i valu; sa vakaiyaragi e nai sele-takelo makumakualiliva e na qiqi-ni-valu e na siga sa vakarau kina ko koya, ia na moto ena kabei vakaidina. 4Sa lako vakaivalu tu na qiqi-ni-valu e na gaunisala, sa veiciciyaki e na salatu: sa ra na rairai vaka na cina, sa vaka na liva na kedra cici.
5Sa nanumi ira mai ko koya na nona qaqa: era sa toqi tu e na nodra lako: sa ra kusarawa yani ki na bai ni koro, a sa vakarautaki mai na suva. 6Sa basuki mai nai sogo ni uciwai, ia na vale levu sa luvu laivi yani. 7Sa vakabobulataki ko Usapi, sa kau cake yani, ia na nona vada sa ra liutaki koya ka tagi lako me vaka na ruve, ka tavia tiko na lomaseredra. 8Ia ko Ninive sa vaka na drano wai mai na gauna eliu sara; ia era dro ga. Dou tu mada! Dou tu mada! era na kaci; ka na sega e rai ki muri.
9Dou tokitaka na siliva, tokitaka na koula: ni sa sega ni oti rawa nai yau e bini tu, sa levu sara nai yaya domoni kecega. 10Sa lala, sa lala didi, sa lala didi sara: ia na yalodra sa waicala, ka sa dui veiyaviti na durudra, sa yaluma kece sara talega na tolodra, ia sa ceacea sara na matadra kecega.
11Sa evei na nodra i tikotiko na laioni, kei na nodra i kanakana na luve ni laioni, na yasana ka lako voli kina na laioni, na laioni yalewa, kei na luve ni laioni, ka sa sega e dua me vakarerea? 12Na laioni, ka daudresulaka na kedra na luvena, ka cova na kedra na nona laioni yalewa, ka vakasinaita na nodra qara e na ka sa dresulaka, kei na nodra i kotokoto e na ka e cova.
13Raica, koi au na nomu meca, sa kaya ko Jiova ni lewe vuqa, ia ka'u na vakama na nona qiqi-ni-valu me kubou; ia ena kani ira na nomu luve ni laioni, nai seleiwau: ka'u na muduka tani talega mai vanua na ka ko sa dresulaka, ena sega talega ni rogoci tale na domodra na nomu i talaki.
Currently Selected:
NEUMI 2: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
