MAIKA 7
7
Ko Maika, ni sa tagicaka na vanua, sa vakararavi vua na Kalou, 1-10. Sa vakacegui e na vosa ni yalayala eso, 11-17. Sa vakacaucautaka na loloma levu ni Kalou, 18-20.
1Isa koi au! ni'u sa vaka na tamata ni sa kumuni oti na vuata e na vula i katakata, ka vaka na tamata ni sa tomitomiki oti na vua-ni-vaini: sa sega nai soso vua ni vaini me'u kania: se na lolo taumada, ko ya sa gadreva tiko na yaloqu. 2Sa yali sara mai na vanua na tamata yalololoma: ia na tamata yalododonu sa sega ga vei ira na tamata: o ira kece era lawavaka ga na dra; era dui vakasava na wekana ki na lawa. 3Me ra qacoya sara e na ligadra ruarua na nodra caka ca. Sa taroga ko koya sa turaga, kei koya talega na turaga ni lewa, na kedrau i sau; ia ko koya sa turaga levu cake sa tukuna sara na gagadre ca ni yalona: ka ra sa bukia vata vakakina. 4O koya sa uasivi sara vei ira e na vinaka sa vaka ga na soni: o koya sa yalododonu sara vei ira sa bai wa-vakavotona: a kedra siga na nomu i vakatawa, io, na siga ni nomu cudruvi, sa toro mai; ena yaco ga oqo na nodra vakidroataki. 5Kakua ni dou vakadinata e dua nai tokani, kakua ni vakararavi vua na wekamu dina: mo qarauna ga nai sogo ni gusumu mai vua sa koto e na lomaseremu. 6Ni sa qai beci tamana na gonetagane, sa veimecaki koi rau na veitinani yalewa, kei rau na veivugoni yalewa; era sa nona meca na tamata ko ira na nona lewe ni vale.
7Ia koi au, ka'u na rai ga vei Jiova; ka'u na waraki koya na Kalou, na noqu i vakabula: ena rogoci au na noqu Kalou.
8Kakua ni ko reki, ko iko na noqu meca, ni'u sa ca: ke'u sa bale, ka'u na tu cake tale; ke'u sa tiko e na butobuto, ena noqu rarama ko Jiova. 9Na cudru i Jiova ka'u na vosota ga, ni'u sai valavala ca vua, me na ia mada ko koya na veitotaki e na vukuqu, ka cudruvaki au: ena kauti au yani ki na rarama, au na raica na nona cakacaka dodonu. 10Ena qai kunea ko koya sa noqu meca, ena luvu talega e na madua ko koya ka kaya vei au, Sa evei ko Jiova na nomu Kalou? ena raici koya na mataqu: ena qai buturaki sobu ko koya me vaka na lolobo e na saqata.
11A siga ena viri tale kina na nomu bai, e na siga ko ya ena vakayawataki na kenai loku. 12E na siga ko ya ena lako mai vei iko ko ira mai Asiria ka yacovi Ijipita, mai Ijipita talega ka yacova na Uciwai, mai na wasawasa e dua ki na wasawasa tani, mai na ulu-ni-vanua e dua ki na ulu-ni-vanua tani. 13Ia na vanua, ena lala sara ga e na vukudra era tiko kina, sa kenai sau ni nodra i valavala.
14Mo ni vakatawai ira na nomuni tamata e na nomuni titoko, io, na qele ni sipi sa nomuni votavota, ka sa tiko duaduaga mai na veikau, e na loma i Kameli: me ra kana voli tale mai Pasani kei Kiliati, me vaka e na gauna eliu.
15Me vaka e na gauna dou a lako mai kina mai na vanua ko Ijipita, ka'u na vakatakila vei ira na ka e veivakurabuitaki. 16Ena raica ko ira na veimatanitu, ka ra na maduataka kece na nodra kaukauwa: era na tabonaka na gusudra e na ligadra, ena didivara mai na daligadra. 17Era na dramica na kuvu-ni-soso me vaka na gata, me vaka na ka sa qasi voli e na vanua era na lako ninini mai na nodra qara vuni: era na rerevaki Jiova na noda Kalou, io, era na rere talega e na vukumudou.
18O cei na Kalou me tautauvata kei kemuni, ka bokoca na caka cala, ka sa buluta na nodra talaidredre na kena vo ni nonai votavota? ka sa sega ni cudru tiko me sega ni mudu, ni sa vinakata ko koya me yalololoma. 19Ena mai lomani keda tale ko koya; ena butuka sobu na noda caka cala; io, ko ni na biuta ki na wasa titobu na nodra i valavala ca kecega. 20O na vakayacora na ka dina vei Jekope, kei na yalololoma vei Eparaama, na ka ko a bubului kina vei ira na neimami qase mai na gauna eliu.
Currently Selected:
MAIKA 7: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific