MALAKAI 1
1
Sa vunauci ira na Isireli ko Malakai ni ra sega ni loloma vua na Kalou, 1-5, ka ni ra sa beci koya kei na nona cakacaka, 6-14.
1Na vosa ni parofisai bibi maivei Jiova vei ira na Isireli ka tukuna ko Malakai.
2Au a lomani kemudou, sa kaya ko Jiova. Ia dou sa kaya, Ko a lomani keitou vakaevei? Ko Iso, na tuaka i Jekope, se segai? sa kaya ko Jiova: ia ka'u a lomani Jekope, 3ia ko Iso, ka'u a cata, ka cakava na nona ulu-ni-vanua me lala sara, kei na nonai votavota me nodra na koli kila ni veikau. 4Ni ra kaya ko ira na Itomi, Eda sa vakadravudravuataki, ia eda na la'ki tara tale na veikoro lala; sa kaya vakaoqo ko Jiova ni lewe vuqa, Era na tara, ia koi au, ka'u na talaraka sobu; ka ra na vakatokai, Na vanua dauca, kei, Na mataqali sa na cudruva tikoga ko Jiova ka sega ni mudu. 5Ia na matamudou ena raica, ka dou na kaya, Me vakacaucautaki ko Jiova e na veiyalayala ni Isireli.
6Sa vakarokorokotaki tamana na gone; ka sa vakakina na tamata vua na nona turaga: ia ke'u sa tamamudou koi au, ko cei sa vakarokorokotaki au? ia ke'u sa turaga koi au, ko cei sa rerevaki au? sa taroga ko Jiova ni lewe vuqa vei kemudou, na bete, ka sa beca na yacaqu. Ia dou sa kaya, Keitou sa beca vakaevei na yacamuni? 7Ni dou sa vakacabora e na noqu i cabocabo-ni-soro na kakana sa sega ni savasava; ia dou sa kaya, keitou sa vosavakacacataki kemuni vakaevei? Ni dou sa kaya, Na tepeli i Jiova sa ka wale sara. 8Ni dou sa vakacabora na ka mataboko mei soro, sa sega li ni ca? ka ni dou sa vakacabora na lokiloki kei na tauvi mate, sa na sega li ni ca? Mo cabora mada oqori vua na nomu kovana; ka na vinakati iko beka, se vakadonui iko ko koya? sa kaya ko Jiova ni lewe vuqa.
9Ia oqo, ka'u masuti kemudou mo dou kerekere mada vua na Kalou, me lomani keda mai: sai kemudou ga e vuna na ka oqori: me na vakadonui kemudou li ko koya? sa kaya ko Jiova ni lewe vuqa. 10Ke dua mada vei kemudou ena via sogota na katuba! mo dou kua mada ni vakawaqa wale na buka e na noqu i cabocabo-ni-soro. Au sa sega sara ni vinakati kemudou, sa kaya ko Jiova ni lewe vuqa, ia ka'u na sega talega ni vakadonuya mai na ligamudou e dua nai madrali. 11Io, mai nai cadracadra ni mata-ni-siga ka yacova na kenai dromudromu ena vakalevulevui na yacaqu vei ira na lewe ni veivanua; ia e na veiyasana kecega ena vakacabori ki na yacaqu nai madrali boi vinaka, io, nai madrali savasava: ni na vakalevulevui na yacaqu vei ira na lewe ni veivanua, sa kaya ko Jiova ni lewe vuqa.
12Ia dou a vosavakacacataka na ka ko ya, ni dou a kaya, Na tepeli i Jiova, sa sega ni ka tabu; ia na vuana, na kena kakana, sa ka wale sara. 13Dou a kaya talega, Raica, sa dua na ka ni veivakaocataki! dou a beca vakakina, sa kaya ko Jiova ni lewe vuqa; ia dou a kauta mai na ka e dresulaki, kei na lokiloki, kei na tauvi mate; io, na ka oqo dou a kauta mai mei madrali: me'u vakadonuya li na ka oqo mai na ligamudou? sa kaya ko Jiova. 14Ia me cudruvi ga na dauveivakaisini ko ya sa dua na tagane e na nona qele ni manumanu, ka sa bubului, ka vakacabora e dua na ka ca vua na Turaga: ni'u sa dua na Tui levu koi au, sa kaya ko Jiova ni lewe vuqa, ia na yacaqu sa ka rerevaki e na veimatanitu.
Currently Selected:
MALAKAI 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific