MALAKAI 2
2
Sa vunauci ira vakaukauwa na bete ni ra sa sega ni muria na veiyalayalati ni Kalou kei ira, 1-10. Sa vunauci ira na lewe ni vanua ni ra dauqaravi ira na kalou lasu, 11-13, ka ia na veibutakoci, 14-16, ka dauvosavakacacataki koya na Kalou, 17.
1Ia koi kemudou mada na bete, sa baleti kemudou nai vakaro oqo. 2Kevaka dou sa bese ni vakarogoca, ia kevaka dou sa bese ni vakasara ki na lomamudou, mo dou vakarokorokotaka na yacaqu, sa kaya ko Jiova ni lewe vuqa, ka'u na vakayacora sara na cudru ko ya kivei kemudou, ka vakacataka na ka dou sa vakalougatataki kina: io, ka'u sa vakacataka oti na ka oqo, ni dou sa sega ni vakasara ki na lomamudou. 3Raica, au na vakacacana nai tei vei kemudou, ka'u na kaburaka talega na de-ni-manumanu ki na matamudou, io, na de-ni-manumanu ni nomudou i soro tabu; dou na kau tani vata kaya talega. 4Dou na qai kila ni'u a solia nai vakaro oqo vei kemudou, me dei na noqu veiyalayalati kei Livai, sa kaya ko Jiova ni lewe vuqa.
5Sa ia kei koya na noqu veiyalayalatitaka na bula kei na veivinakati; ia ka'u a solia vua e na vuku ni rere sa rerevaki au kina, ni sa rerevaka sara talega na yacaqu. 6Sa tiko e na gusuna na vunau daudina, ka sa sega ni kune e na tebenigusuna e dua na ka ca: sa lako vata kei au ko koya e na veivinakati kei na yalododonu, a ra sa lewe vuqa sa saumaka tani ko koya mai na nodra caka cala. 7Ia sa dodonu me tiko e na gusuna na bete na vuku, ka me tarogi ga mai na gusuna na vunau: ni sai talatala i Jiova ni lewe vuqa ko koya.
8Ia koi kemudou, dou a lesu tani mai na sala; dou a vakatarabetaki ira na lewe vuqa e na vunau; dou a vakacacana na veiyalayalati kei Livai, sa kaya ko Jiova ni lewe vuqa. 9Ia koi au talega, ka'u a cakava mo dou beci ka vakawaletaki e matadra na tamata kecega, me vaka ni dou a sega ni vakabauta na noqu sala, ka sa kauta vakatani na vunau ni dou sa digitaka na mata ni tamata.
10Sa dua bau ga na tamada kecega, se segai? sa dua bau ga na Kalou sa buli keda, se segai? a cava eda sa dui cakacaka vakailasu kina vua na kai noda, ni da vakacacana na veiyalayalati sa ia kei ira na noda qase?
11Sa ra cakacaka vakailasu na Juta, ia e dua na ka vakasisila sa caka e Isireli kei Jerusalemi; ni ra sa vakacacana na Juta na ka e tabu me nei Jiova, na ka sa lomana ko koya, ka sa vakawati kei na luvena na kalou tani. 12Ena muduka tani ko Jiova na tamata ko ya sa cakava na ka oqo, se ko koya na dauyadra se ko koya na daurogo, mai na veivale laca i Jekope, se ko koya sa vakacabora nai madrali vei Jiova ni lewe vuqa. 13Ia na ka oqo dou sa baci cakava vakarua, ka sa ubia nai cabocabo-ni-soro i Jiova e na wai ni mata, e na tagi, kei na tagi qoqolou, ka sa sega kina ni goleva tiko nai madrali ko koya, se vakadonuya e na yalovinaka mai na ligamudou.
14Ia dou sa kaya, E na vuku ni cava? Ni sai vakadinadina ko Jiova vei kemudrau kei na watimu ni ko a cauravou, o koya ko sa cakacaka vakailasu vua, ia ka sa nomu i tokani ko koya, kei na watimu ko a veiyalayalati kaya. 15Ia sa sega beka ni cakava ko koya na lewe dua bauga? Ia ka tiko ga vua na vo ni yalo. Ia ka cava me lewe dua bauga kina? Ni sa qara ko Koya na kawa tabu. O koya oqo dou qarauna kina na yalomudou, ia me kakua ni cakacaka vakailasu kina e dua vua ka watina ni sa cauravou. 16Ni'u sa cata na veibiu, sa kaya ko Jiova, na Kalou ni Isireli, kei na nona ubia na nonai sulu na tamata e nai valavala kaukauwa, sa kaya ko Jiova ni lewe vuqa: O koya oqo mo dou qarauna kina na yalomudou, mo dou kakua ni cakacaka vakailasu.
17Dou a vakaocataki Jiova e na nomudou vosa. Ia dou sa kaya, Keitou a vakaocataki koya li e na cava? Ni dou sa kaya, O ira kece era caka ca era sa vinaka e na mata i Jiova, ka sa rekitaki ira talega ko koya; se ni dou kaya, Sa evei li na Kalou ka lewa vakadodonu?
Currently Selected:
MALAKAI 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific