SAKARAIA 14
14
Sa ia tiko ko Sakaraia na parofisai eso, e bale ki na nodra cudruvi na nona meca na Mesaia kei na nona tamata, kei na nodra veivakalougatataki era qaravi koya, 1-21.
1Raica, sa lako mai na siga i Jiova, ena qai votai kina na kemui toki ni valu e na kemu maliwa. 2Ni'u na vakasoqona kece na veimatanitu ki Jerusalemi, me ra kaba; ena rawa talega na koro, ka na vakayanaki na veivale, ia na yalewa era na vakacacani; ena vakabobulataki talega e dua na kena wase ni koro, ia na kena vo ni tamata era na sega ni muduki tani mai na koro.
3Ena qai lako yani ko Jiova, me veivala kei na veimatanitu ko ya, me vaka sa vala kina ko koya e na siga ni valu. 4Ia e na siga ko ya ena tu na yavana e dela ni ulu-ni-vanua ni veiolive, ko ya sa donui Jerusalemi mai na isiti, ia ena kavida rua eloma na ulu-ni-vanua ni veiolive vaka ki na isiti, vaka ki na wesiti talega, me dua kina na buca levu sara; ni na sudra yani e dua na tiki ni ulu-ni-vanua vaka ki na noca, ka dua na tikina vaka ki na sauca. 5Ia dou na dro ki na buca e na noqu ulu-ni-vanua ko ya, ni na yaco sara ki Esali na buca ni ulu-ni-vanua, io, dou na dro, me vaka dou a dro tani kina ni sa tavuki na vanua e na gauna i Usaia na tui Juta: ena qai lako mai ko Jiova na noqu Kalou, io, koi kemuni kei ira kece na nomuni yalosavasava.
6Ia ena yaco e na siga ko ya, ena sega kina na rarama e talei, na butobuto loaloa ga. 7Ena qai yaco e dua na siga, (sa kilai ga vei Jiova,) ena sega ni siga ena sega talega ni bogi; ia ena yaco, ni sa yakavi, ena qai rarama mai. 8Ia e na siga ko ya, ena dave yani na wai bula mai Jerusalemi, e dua na kena wase ki na wasawasa ki na isiti, ka dua na kena wase ki na wasawasa ki na wesiti; e na vula i katakata kei na vula i liliwa ena vaka tu kina. 9Ia ena kilai ko Jiova ni sa tui ni vuravura kecega: e na siga ko ya ena sai Jiova duaduaga, kei na yacana duaduaga. 10Ena vuki na vanua kecega me tautauvata kei na buca mai Kipa ka yacovi Rimoni e na yasayasa ki na ceva mai Jerusalemi: ia ena cecere, ka tawa e na kenai tikotiko, mai na matamata-ni-koro i Penijamini ka yaco ki na matamata-ni-koro makawa, ka yacova sara na matamata-ni-koro e na tutu ni koro; mai na vale-cecere talega i Ananeli ka yaco ki na nonai keli-waini na tui. 11A ra na tiko ga kina, ka na sega ni ia tale na veivakarusai, ena tiko vakacegu ga ko Jerusalemi.
12Ia na mate levu oqo ena vakayacora ko Jiova ki na veimataqali kece erai valu ki Jerusalemi; ena vuca ga yani na lewedra ni ra wavu tu e na yavadra, a matadra talega ena vuca laivi e na dreke-ni-matadra, a yamedra talega ena vuca sara e na gusudra. 13Ia e na siga ko ya, ena vakidroataki ira vakalevu ko Jiova; ka ra na dui taura yadua na liga ni kai nona, ena dui dulaka talega na liga ni tamata ki na liga ni kai nona. 14Ia ko ira talega na Juta era na vala mai Jerusalemi; ena kumuni vata talega na nodra i yau na veimatanitu kecega e tiko vakavolivolita, na koula, kei na siliva, kei nai sulu, na ka levu sara. 15Ia na kedra mate levu na ose, kei na meule, na kameli, kei na asa, kei na manumanu kece era tiko e nai valu oqo, ena vaka na mate levu ko ya.
16Ia ko ira kece yadua sa vo vei ira na veimatanitu kecega sa mai kabai Jerusalemi, era na lako cake e na veiyabaki me ra mai soro vua na Tui, ko Jiova ni lewe vuqa, me ra mai cakava talega na so levu ni vale vakacevaceva. 17Ia ko ira yadua vei ira na veimatanitu e vuravura sa na sega ni lako cake ki Jerusalemi me soro vua na Tui, ko Jiova ni lewe vuqa, ena sega ni tau vei ira na uca. 18Ia ke sa sega ni lako cake na matanitu ko Ijipita, se sa yaco kina, ena sega talega ni tau vei ira na uca; ena tauvi ira na mate levu, ena yavita kina ko Jiova na lewe ni veimatanitu era sa sega ni lako cake me ra ia na so levu ni vale vakacevaceva. 19Ena vakaoqo na nona cudruvi ko Ijipita, kei na nodra cudruvi na lewe ni veimatanitu kecega era sa sega ni lako cake me ra cakava na so levu ni vale vakacevaceva.
20E na siga ko ya ena ceuti ki nai qiriqiri kaukamea ni ose, SA TABU ME NEI JIOVA; ia na kuro e na vale i Jiova ena vaka na bilo e na mata ni cabocabo-ni-soro. 21Io, na kuro kece e Jerusalemi kei Juta ena tabu me nei Jiova ni lewe vuqa: ia ko ira kece era vakacaboi soro era na lako mai, ka kauta eso me ia kina na vakasasaqa, ia ena sega tale ni tiko e dua na kai Kenani e na vale i Jiova ni lewe vuqa e na siga ko ya.
Currently Selected:
SAKARAIA 14: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific