SAKARAIA 8
8
Ena lomani tale ko Jerusalemi, 1-6. O ira na bobula era na kau tale mai, 7-17. Sa tukuni nai valavala ni siga ni lolo e vinakata na Kalou; kei na kena lewe vuqa ni tamata ena lotu mai, 18-23.
1A sa yaco tale vei au na vosa i Jiova ni lewe vuqa, ka vaka,
2Sa kaya vakaoqo ko Jiova ni lewe vuqa; Au a vuvu e na vuku i Saioni e na vuvu levu, io, au a vuvu e na vukuna e na cudru levu.
3Sa kaya vakaoqo ko Jiova; Au sa qai lesu mai ki Saioni, ia ka'u na tiko ga e na loma i Jerusalemi: ena vakatokai talega ko Jerusalemi, me koro daudina; kei na ulu-ni-vanua i Jiova ni lewe vuqa, me ulu-ni-vanua tabu.
4Sa kaya vakaoqo ko Jiova ni lewe vuqa; Ena tiko tale e na saqata mai Jerusalemi na tagane qase kei na yalewa qase ia era na dui vakaititoko voli e na vuku ni ra sa qase sara: 5ia na saqata ni koro ena oso e na gonetagane kei na goneyalewa era qito voli e na kena saqata.
6Sa kaya vakaoqo ko Jiova ni lewe vuqa; Kevaka ena ka ni veivakurabui ki na matadra na kena vo ni mataqali oqo e na gauna ko ya, ena sa ka ni veivakurabui talega beka ki mataqu? sa kaya ko Jiova ni lewe vuqa.
7Sa kaya vakaoqo ko Jiova ni lewe vuqa; Raica, au na vakabulai ira na noqu tamata mai na vanua e cadra kina na siga, kei na vanua e dromu kina na siga; 8ia ka'u na kauti ira mai, ka ra na tiko e loma i Jerusalemi: ka ra na vakabau me noqu tamata, ia koi au, ka'u na nodra Kalou, e na yalodina kei na yalododonu.
9Sa kaya vakaoqo ko Jiova ni lewe vuqa; Me kaukauwa na ligamudou, oi kemudou sa rogoca e na gauna oqo na vosa oqo mai na gusudra na parofita, sa ra tukuna e na siga ka tauyavutaki kina na vale i Jiova ni lewe vuqa, io, na vale tabu me sa tara rawa. 10Ia eliu, ni sa bera ni yaco na gauna ko ya, sa sega na kenai voli na tamata, se na kenai voli na manumanu; ia sa sega ga na vakacegu vua sa curu yani se vua sa curu mai e na vuku ni meca: ni'u a vakavuna na nodra dui veimecaki kece na tamata yadua. 11Ia e na gauna oqo ena sega ni vaka e na gauna eliu na noqu i valavala ki na kena vo ni mataqali oqo, sa kaya ko Jiova ni lewe vuqa. 12Ni na yaco na gauna ni sautu: na vaini ena vua tiko, ia na qele ena vuataka na vuana, ko lomalagi talega ena solia na kena tegu; ia ka'u na solia vei ira na kena vo ni mataqali oqo me ra taukena na ka kecega oqo. 13Ia ena yaco, me vaka dou a vu ni veivakarusai vei ira na veimatanitu, oi kemudou na mataqali i Juta, kei na mataqali i Isireli; au na vakabulai kemudou, ka dou na yaco vaka talega kina, mo dou vu ni veivakalougatataki; dou kakua ni rere, me kaukauwa ga na ligamudou.
14Ni sa kaya vakaoqo ko Jiova ni lewe vuqa; Me vaka ka'u a nakita me'u cudruvi kemudou, ni ra sa vakacudrui au ko ira na nomudou qase, sa kaya ko Jiova ni lewe vuqa, ia ka'u a sega ni veivutuni: 15sa vaka talega kina ka'u sa nakita e na gauna oqo me'u caka vinaka ki Jerusalemi kei Juta: dou kakua ni rere. 16Oqo na ka mo dou cakava; Dou dui vosa dina yadua vua na kai nona; ka mo dou ia e na nomudou veimatamata-ni-koro na lewa dina kei na lewa ni veivinakati; 17ia mo dou kakua ni dui nanuma ca e na lomamudou vua na kai nona; ka mo dou kakua ni vinakata na bubului vakailasu: ni ka'u sa cata na ka kecega oqo sa kaya ko Jiova. 18A sa yaco vei au na vosa i Jiova ni lewe vuqa, ka vaka,
19Sa kaya vakaoqo ko Jiova ni lewe vuqa; A lolo e nai kava ni vula, kei na lolo e nai kalima, kei na lolo e nai kavitu, kei na lolo e nai katini ni vula, ena ka ni reki ga vei ira na mataqali i Juta, io, ena ka ni marau, ka so levu vinaka; ia mo dou vinakata ga na ka dina kei na veilomani. 20Sa kaya vakaoqo ko Jiova ni lewe vuqa; Ena lako mai na veimataqali, kei na lewe ni veikoro e vuqa; 21ka ra na lako mai na lewe ni koro e dua ki na lewe ni koro e dua, ka kaya, Me da mai lako kusarawa me kere loloma vei Jiova, ia me da qaravi Jiova ni lewe vuqa: au na lako talega koi au. 22Io, ena lako mai na veimataqali e vuqa kei na veimatanitu kaukauwa, me mai qaravi Jiova ni lewe vuqa e Jerusalemi, ka me kere loloma vei Jiova. 23Sa kaya vakaoqo ko Jiova ni lewe vuqa; E na gauna ko ya, era na mai taura na tutu ni nonai sulu e dua na Jiu, e lewe tini na tamata era duivosavosa mai na veivanua kecega, ka kaya, Keitou na lako vata kei kemudou: ni keitou sa rogoca sa tiko vata kei kemudou na Kalou.
Currently Selected:
SAKARAIA 8: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
