SAKARAIA 7
7
Ko ira sa vakabobulataki era sa taroga na siga ni lolo eso, 1-3. Sa vunauca ko Sakaraia na nodra lolo vakaca, 4-7. Sa tukuni ni sa vu ni nodra vakabobulataki na nodra i valavala ca, 8-14.
1Ia e nai kava ni yabaki i Taraiase na tui, sa yaco na vosa i Jiova vei Sakaraia e nai kava ni siga e nai kaciwa ni vula, ko ya ko Kisiliu; 2ia ko ira na kai Peceli era sa talai rau ko Saresa kei Rekemi-meleki, kei na nodrau tamata, me ra vakamamasu vei Jiova, 3ka vosa talega vei ira na bete era tiko e na vale i Jiova ni lewe vuqa, kei ira na parofita, ka kaya, Me keitou ia tiko li na tagi e nai kalima ni vula, ka tawasei keitou, me vaka na ka keitou sa dui cakava e na veiyabaki e vuqa oqo?
4Sa qai yaco vei au na vosa i Jiova ni lewe vuqa, ka vaka, 5Mo kaya vei ira kece na lewe ni vanua, kei ira na bete, ka vaka, Ni dou a lolo ka tagi e nai kalima ni vula kei na kenai kavitu, e na yabaki e vitusagavulu ko ya, dou sa lolo li vei au, io vei au? 6Ia ni dou a kana, ka ni dou a gunu talega, dou sa sega li ni kana ka gunu me yaga walega vei kemudou? 7Sa sega li ni kena vosa oqo ka vunautaka ko Jiova e na gusudra na parofita eliu, ni sa tawa tiko ka sa sautu ko Jerusalemi, kei na kena veikoro e vakavolivolita, ka ni sa tawa tiko na yasayasa vakaceva kei na buca?
8A sa yaco na vosa i Jiova vei Sakaraia, ka vaka, 9Sa kaya vakaoqo ko Jiova ni lewe vuqa, Dou ia ga na veilewai dodonu, ka mo dou dui ia nai valavala vakayalovinaka ka loloma vua na kai nona: 10ia dou kakua ni vakasaurarataka na yada, kei na luveniyali, kei na kai tani, kei na dravudravua; ia mo dou kakua ni dui nanuma ca e na lomamudou vua na kai nona.
11A ra sa bese ga ni vakarorogo, ka ra vuki vakanadaku, ka ra sogota na daligadra, me ra kakua ni rogoca. 12Io, era sa vakaukauwataka na lomadra me vaka na vatu qiwa, me ra kakua ni rogoca na vunau, se na vosa sa solia ko Jiova ni lewe vuqa e na nona Yalo Tabu vei ira na parofita eliu me ra tukuna: ka sa yaco kina na cudru levu maivei Jiova ni lewe vuqa. 13A sa yaco, me vaka ni sa kaci ko koya, ka ra bese ni rogoca; sa ra kaci vaka talega kina ko ira, ia ka'u a bese ga ni rogoca, sa kaya ko Jiova ni lewe vuqa: 14ia ka'u a caginataki ira tani yani ki na veimatanitu kece era a sega ni kila: ia sa lala laivi tu na vanua, me sega ni veilakovi, ni ra sa vakavuna na kena lala tu na vanua sa vinakati sara.
Currently Selected:
SAKARAIA 7: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
