SAKARAIA 3
3
O Josua na bete levu, sa vakaraitaki mai mei vakatakarakara ni cakacaka ni Kalou mai Jerusalemi, me na vakataudeitaki tale, kevaka e talairawarawa, 1-7. O Karisito na Coke sa yalataki mai, 8-10.
1Ia sa vakatakilai Josua na bete levu vei au, sa wavu tu ko koya e na mata ni agilose i Jiova, ia ko Setani sa wavu tu ki ligana i matau me nona meca. 2A sa kaya vei Setani ko Jiova, Me vunauci iko, Setani, ko Jiova; io, me vunauci iko ko Jiova, o koya sa digitaki Jerusalemi: sa sega beka ni dua na tiki ni buka oqo sa kaliraki mai na bukawaqa?
3Ia ko Josua sa vakaisulu e nai sulu dukadukali, a sa wavu tu e na mata ni agilose. 4A sa kaya ko koya vei ira era wavu tu e matana, Dou luvata tani vua nai sulu dukadukali. A sa kaya vua, Raica, au sa vakaseavutaka tani vei iko na nomu caka cala, ia ka'u na vakaisulutaki iko e nai sulu vou. 5Au sa qai kaya, Me ra vakaisalataki koya e nai sala vakabete sa savasava. A ra sa vakaisalataki koya e nai sala vakabete sa savasava, ka vakaisulutaki koya e nai sulu. Ia na agilose i Jiova, sa wavu tu mai. 6A sa vakadinadina vei Josua na agilose i Jiova, ka vaka, 7Sa kaya vakaoqo ko Jiova ni lewe vuqa; Kevaka ko na muria na noqu sala, ka vakabauta na noqu i lesilesi, ko na qai lewa na noqu vale, ka vakatawa talega na noqu lomanibai, ia ka'u na solia vei iko na yasana mo lako voli vata kina kei ira era wavu tu oqo. 8Mo rogoca mada, Josua na bete levu, o iko, kei ira na nomu i tokani era tiko e matamu; (ni ra sai vakatakarakara ko ira oqo) ni sai au, raica, ka'u na kauti koya mai na noqu tamata na COKE. 9Ka raica, na vatu ka'u a viritaka e na mata i Josua; e na dua ga na vatu ena vitu na mata na: raica, oi au ka'u na ceuta na kenai ceuceu, sa kaya ko Jiova ni lewe vuqa, ia ka'u na kauta tani na caka cala ni vanua ko ya e na dua bauga na siga. 10E na siga ko ya, sa kaya ko Jiova ni lewe vuqa, dou na dui kaciva na kai nomudou, me mai tiko e na ruku ni vaini, kei na ruku ni lolo.
Currently Selected:
SAKARAIA 3: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
