NA SERE I SOLOMONI 2
2
1Koi au na rose ni Seroni,
Kei na viavia ni buca.
2Me vaka na viavia e na maliwa ni soni,
Sa vakakina na wekaqu e na kedra maliwa na goneyalewa.
3Me vaka na moli e na loma ni dua na kau ni veikau,
Sa vakakina ko koya ka'u sa lomana e na kedra maliwa na gonetagane.
Au a marau ni'u a tiko sobu e na yaloyalona,
Ka sa kamikamica na vuana ki na gusuqu.
4Sa kauti au ko koya ki na nona vale ni waini,
Ia na nona kuila sa vakarurugi au na loloma.
5Dou vakaukauwataki au e na keki vua ni vaini, vakacegui au e na moli:
Ni'u sa mate e na loloma.
6A ligana i mawi sa no e ruku ni uluqu,
Ka sa mokoti au na ligana i matau.
7Au sa vakaroti kemudou, na goneyalewa ni Jerusalemi,
E na vuku ni me kila, kei na teira yalewa ni veico,
Mo dou kakua ni yavalata, se vakayadrati koya ka'u sa lomana,
Ka me veitalia ga ko koya.
8A domo i koya ka'u sa lomana! raica, sa lako mai
Sa rika mai ko koya e na tokaitua, ka ladelade mai e dela ni koro!
9O koya ka'u sa lomana sa vaka na me kila se na teira tagane sa gone:
Raica, sa tu mai daku ni nodatou bai,
Sa rai mai na katuba,
Sa vakaraitaki koya mai nai sogo cicila.
10Sa vosa mai ko koya ka'u sa lomana, ka kaya vei au,
Mo cavu tu, na wekaqu, na noqu ka matavinaka, ka lako mai.
11Raica, sa oti yani na vula i liliwa,
Sa mudu na uca ka lako tani;
12Sa qai rairai mai na se ni kau e na vanua;
Sa qai yaco na kena vula sa tagi kina na manumanu vuka, Ia na domo ni ruve sa qai rogo tu e na noda vanua;
13Na vu ni lolo sa vuataka mai na vuana vou,
Kei na vaini kei na vuana vou
Sa boi vinaka mai.
Mo cavu tu, na wekaqu, na noqu ka matavinaka, ka lako mai.
14O iko noqu ruve, ka sa tiko e na qara ni uluvatu, e na yasana vuni ni cabecabe,
Me'u raica mada na matamu, me'u rogoca mada na domomu;
Ni ko sa domo vinaka, ka vatukai vinaka na matamu.
15Dou toboka mai na fokise, na fokise lalai, sa vakacacana na vaini:
Ni sa vou tu na vua ni noda vaini.
16Sa noqu ko koya ka'u sa lomana, koi au talega au sa nona ga:
Sa vakania na nona qele ni sipi e loma ni viavia.
17Ka yacova na kena kida na mataka, ka sa seavu yani na malamalawa,
Mo ni lesu mai, koi kemuni ka'u sa lomana, io mo ni vaka na me kila se na luve ni teira
E na ulu-ni-vanua ko Peceri.
Currently Selected:
NA SERE I SOLOMONI 2: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
