NAI VAKATAKILA I JONI 8
8
E lewe vitu na agilose sa taura na davui, a sa le va sa uvuca, 1-13.
1Ia ni sa cecega oti ko koya nai kavitu ni drega, sa vakanomodi ko lomalagi ka oti e dua na afanaua.
2Au sa raica na agilose e le vitu eratou sa tu e na mata ni Kalou; a sa soli vei iratou e vitu na davui. 3A sa dua tani tale na agilose sa lako mai ka laki tu e na mata ni cabocabo-ni-soro, a sa taura na miqa koula; a sa soli vakalevu vua na ka boivinaka, me cabora vata kei na masumasu ni tamata yalosavasava kecega e nai cabocabo-ni-soro koula sa tu e na mata ni tikotiko-vakaturaga. 4Ia sa kuvu cake vata na kubou ni ka boivinaka, kei na masumasu ni tamata yalosavasava, mai na ligana na agilose ki na mata ni Kalou. 5A sa kauta na miqa na agilose, ka vakasinaita e na bukawaqa ni cabocabo-ni-soro, ka biuta ki vuravura: ka sa tubu na makudru ni vosa, kei na kurukuru, kei na livaliva, kei na tavuki ni vanua.
6Ia ko iratou na agilose e le vitu, eratou sa taura na davui e vitu, eratou sa vakarautaki iratou me ratou uvuca.
7O KOYA na kenai matai sa uvuca, ka sa qai muri mai na uca-cevata sa veiwaki vata kei na bukawaqa kei na dra, a sa biu ki vuravura: a sa vakamai kina nai katolu ni wase kei vuravura, kei nai katolu ni wase ni kau, a sa vakamai kecega na co drokadroka.
8SA qai uvuca nai karua ni agilose, a sa vaka e dua na ulu-ni-vanua levu sa caudre tu e na bukawaqa; sa biu ki na wasawasa a sa vuki kina me dra nai katolu ni wase ni wasawasa; 9a sa mate kina nai katolu ni wase ni ka kecega sa bula e na wasawasa; a sa vakarusai talega nai katolu ni wase ni veiwaqa.
10SA qai uvuca nai katolu ni agilose, a sa dua na kalokalo levu sa lutu mai lomalagi, a sa caudre me vaka na cina, a sa lutu ki nai katolu ni wase ni veiuciwai, kei na veivurevure-ni-wai; 11ia na yaca ni kalokalo ko Gagaduvaduva; a sa gaga kina nai ka tolu ni wase ni wai; a sa le vuqa kina na tamata sa mate e na wai ni ra sa vakagagataki.
12A SA uvuca nai kava ni agilose, a sa yaviti kina nai katolu ni tiki ni mata-ni-siga, kei nai katolu ni tiki ni vula, kei nai katolu ni wase ni veikalokalo: ia nai katolu ni kena wase vei ira sa vakabutobutotaki a sa sega talega ni rarama nai katolu ni wase ni siga, ka sa vaka talega kina na bogi.
13Ia ka'u a raica, ka rogoca e dua na ikeli sa vuka e na maliwa kei lomalagi, a sa kaya e na domo levu, E ca, e ca, e ca, vei ira sa tiko e vuravura, e na vuku ni domo ni nodratou davui na agilose e le tolu, o koya sa bera ni uvu!
Currently Selected:
NAI VAKATAKILA I JONI 8: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
