NAI VAKATAKILA I JONI 20
20
Sa vesu ko Setani, 1-3. Sa yaco nai matai ni tu cake tale mai na mate, 4-6. Sa sere tale ko Setani, a sa levu na ka sa kitaka, a sa qai biu sara ki na bukawaqa, 7-10. Sa tukuni na siga ni lewa, 11-15.
1Ia ka'u a raica e dua na agilose sa lako sobu mai lomalagi, sa taura e na ligana nai dola kei bulubulu sa sega ni vakabotona ka dua na sinucodo levu. 2A sa laki taura na gata levu, a gata makawa, o koya oqo na Tevoro, kei Setani, a sa vesuki koya me oti mada e dua na udolu na yabaki, 3a sa biuti koya ki bulubulu sa sega ni vakabotona, a sa sogolati koya eloma, a sa dregata nai sogo vei koya, me kakua ni temaki ira tale na veivanua ko koya, ka me oti mada na yabaki e dua na udolu: ia ni sa oti oqo, ena qai sereki vakalailai tale.
4Ia ka'u a raica eso nai tikotiko-vakaturaga, ka ra tiko kina eso, a sa soli vei ira me ia na veilewai: au a raica na yalodra talega e tamusuki na uludra ni ra sa vakatusai Jisu, e na vuku talega ni vosa ni Kalou, o ira era sa sega ni vakarokoroko vua na manumanu, se vua na nona matakau, a sa sega talega ni volai nai vakatakilakila e na yadredra, se na ligadra: a ra sa bula ka lewa vata kei Karisito ka dua na udolu na yabaki. 5Ia na kena vo ni mate era sa sega ni bula tale ka me oti mada na yabaki e dua na udolu. Oqo nai matai ni bula tale mai na mate. 6Sa kalougataka ka yalosavasava ko koya sa vakaturi cake e nai matai ni bula tale mai na mate: ena sega ni kaukauwa vei ira nai karua ni mate, ia era na bete ni Kalou kei Karisito, ka ra na lewa vata kaya ka dua na udolu na yabaki.
7IA ni na sa oti e dua na udolu na yabaki, ena qai sereki tale ko Setani mai na vale-ni-veivesu sa tiko kina, 8ena qai lako tani yani ko koya me temaki ira na veivanua era sa tiko e na yasa i vuravura e va, ko Koki kei Mekoki, me vakasoqoni ira vata me ra vala: a kedrai wiliwili sa vaka na mata ni nuku ni matasawa. 9Ia era a lakova na raraba kei vuravura, ka vakavolivolita na nodra koro na tamata yalododonu, kei na koro daulomani, me buku na druadrua: a sa lutu sobu mai lomalagi na bukawaqa, ka kani ira. 10Ia sa biu na tevoro sa temaki ira ki na drano bukawaqa sa vakasulifure, sa tiko kina na manumanu kei na parofita vakailasu; ia eratou na vakararawataki e na siga kei na bogi ka sega ni mudu.
11IA ka'u a raica e dua nai tikotiko-vakaturaga e levu ka vulavula, kei koya talega sa tiko kina, a sa dro tani mai vua ko vuravura kei lomalagi; a sa sega na vanua e kune me rau tiko kina. 12Ia ka'u a raici ira era a mate, na tamata lalai kei na turaga, era sa tu e na mata ni Kalou; a sa tevuki nai vola eso: e dua tani tale nai vola sa tevuki, ai vola ni bula: ia na mate era sa lewai mai na ka sa volai e nai vola, me vaka na nodra i valavala. 13Ia na wasawasa sa soli ira na mate era sa tiko kina, o mate talega kei bulu erau sa soli ira na mate era sa tiko kina; a sa lewai ko ira na tamata yadua me vaka na nodra i valavala. 14Ia ko mate kei bulu talega erau sa biu ruarua ki na drano bukawaqa. Sai koya oqo nai karua ni mate, io na drano bukawaqa. 15Ia sa biu ki na drano bukawaqa ko koya yadua sa sega ni volai e nai vola ni bula.
Currently Selected:
NAI VAKATAKILA I JONI 20: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
