NA SAME 94
94
Sa tagi vua na Kalou e na vuku ni valavala ni tamata ca, 1-7. Sa kilai ira na Kalou, ena cudruvi ira talega, 8-11. Era na kalougata ko ira sa vakanakuitataki ira na Kalou, 12-15. Ena totaki ira na nona ko Jiova, 16-23.
1I Jiova na Kalou, sa nomuni tavi na veisaumi;
Na Kalou, sa nomuni na veisaumi, mo ni vakatakilai kemuni mai.
2Mo ni vakalevui kemuni oi kemuni ka dau lewai vuravura:
Mo ni saumi ira mada na viavialevu.
3A cava na kena dede, Kemuni Jiova, ni ra reki tiko nai valavala ca?
Ia ka cava na kena dede ni ra reki tiko nai valavala ca?
4Era cavuta ka vosataka tiko na ka rarawa?
Era dokadokai ira tiko ko ira kecega nai valavala ca?
5Era sa tukilaka, Jiova, na nomuni tamata,
Ka vakararawataka na nomuni votavota.
6Era sa vakamatea na yada kei na vulagi,
Ka labati ira na gone e sega ni vakatamani.
7Era sa kaya ga, Ena sega ni raica ko Jiova,
Ena sega ni nanuma na Kalou i Jekope.
8Dou yalomatua mai na yalovakamanumanu vei ira na tamata;
Ia dou na vuku ninaica, koi kemudou na lialia?
9O koya sa tea na daligada, ena sega beka ni rogo rawa?
O koya sa bulia na matada, ena sega beka ni rai rawa?
10O koya sa vunauci ira na veimatanitu, ena sega beka ni vunauci kemudou?
O koya sa vakavulica na tamata me kila ka, ena sega beka ni kila ka ko koya?
11Sa kila ko Jiova na ka e vakanananu kina na tamata,
Ni sa ka walega.
12Sa kalougata, Jiova, na tamata ko ni sa vunauca,
Ka vakavulici koya e na nomuni vunau;
13Mo ni vakacegui koya kina mai na siga ni rarawa,
Ka me keli mada eliu na kedrai bulubulu nai valavala ca.
14Ni na sega ni biuta na nona tamata ko Jiova,
Ka na sega ni laivi ira na nonai votavota.
15Ia ena vuki na lewa me dodonu;
A ra na muria ko ira kecega na yalododonu.
16O cei ena tu cake mai me totaki au me'u vorati ira nai valavala ca?
O cei ena tu mai me vukei au me'u vorati ira na caka cala?
17Kevaka sa sega ni noqu i vukevuke ko Jiova,
Sa voleka ni tiko vagagalu na yaloqu.
18Ni'u a kaya, Sa tidara na yavaqu;
Sa qai tokoni au, Jiova, na nomuni loloma.
19Ni sa rui levu na noqu nanuma sa leqa kina na lomaqu,
Sa vakamarautaka na yaloqu na nomuni dauveivakacegui.
20Ena dua vata li kei kemuni nai tikotiko vakaturaga ni valavala ca,
O koya sa vakayacora na ka ca e na lawa?
21Era sa soqoni ira vata me ra vakacacana na yalona na yalododonu,
Ka vakacala na tamata sa sega ni cala.
22Ia sa noqu i drodro ko Jiova;
Kei na noqu Kalou na uluvatu ka'u sa vakaruru kina.
23Ia ena vakayacora vei ira na nodra cala,
Ka muduki ira e na nodra ca;
Io, ena muduki ira laivi ko Jiova na noda Kalou.
Currently Selected:
NA SAME 94: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
