NA SAME 80
80
Sa tukuna vua na Kalou ni sa ca na nona lewe ni lotu ena vuku ni nodra meca, a sa masuti koya me vakabulai ira.
Vua na Domo-ni-sere e na Sosanimiituca. A Same i Esafa.
1Mo ni vaqara daligamuni mai, na nodra i vakatawa na Isireli,
Oi kemuni ko ni a tuberi ira na Josefa me vaka na qele ni sipi;
Oi kemuni ka tiko e na maliwa ni Jerupi, mo ni cila mai.
2E na mata i Ifireimi kei Penijamini kei Manasa mo ni uqeta na nomuni kaukauwa,
Ka mai vakabulai keimami.
3Mo ni vakalesui keimami tale, na Kalou,
Me cilavi keimami na matamuni; ia keimami na bula kina.
4I Jiova, na Kalou ni lewe vuqa,
A cava na kena dede ni kemuni na cudruva tiko na nodra masu na nomuni tamata?
5O ni sa vakani ira e na madrai wai ni mata;
Ka vagunuvi ira vakalevu e na wai ni matadra.
6O ni sa laivi keimami me ka e dauveiletitaki vei ira era voleka vei keimami:
Ka ra sa dredre vakataki ira ko ira na neimami meca.
7Kemuni na Kalou ni lewe vuqa, mo ni vakalesui keimami tale,
Me cilavi keimami na matamuni; ia keimami na bula kina.
8O ni a kauta mai e dua na vaini mai Ijipita:
O ni sa biuta tani na veimatanitu, ka qai tea.
9O ni a vakarautaka na kena vanua,
O ni a cakava me ti sobu na wakana, ka sa robota na vanua.
10Sa ruguya na veiulu-ni-vanua na kena yaloyalo,
Kei na tabana sa vaka na sitari levu.
11Sa teteva na waitui na tabana lelevu,
Kei na uciwai na tabana lalai.
12A cava ko ni sa qai basuka kina na kena bai,
A ra sa vetia tiko ko ira kecega era sa lako voli e na sala?
13Sa vakacacana na vuaka ni veikau,
Ka sa kana kina na manumanu kila ni vanua.
14Kemuni na Kalou ni lewe vuqa, keimami sa vakamamasu mo ni lesu mada mai:
Mo ni rai sobu mai lomalagi, ka raica, ka taleva na vaini oqo;
15Ka vakaruruga na ka sa tea na ligamuni matau,
Kei na luvemuni ko ni a vakaukauwataka me nomuni.
16Sa visa e na bukawaqa, sa ta sobu:
Era sa rusa ni sa vunauci ira na matamuni.
17Ia me tu na ligamuni vua na tamata sa lesia na ligamuni matau,
Vei koya na luve ni tamata ko ni sa vakaukauwataka me nomuni.
18Keimami na qai sega kina ni lesu tani vei kemuni:
Mo ni vakabulabulataki keimami, keimami na masuta kina na yacamuni.
19I Jiova na Kalou ni lewe vuqa, mo ni vakalesui keimami tale,
Me cilavi keimami na matamuni; ia keimami na bula kina.
Currently Selected:
NA SAME 80: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
