NA SAME 69
69
A masu sa ia e na gauna ni veivakacacani.
Vua na Domo-ni-sere e na Sosanimi. A Same i Tevita.
1Mo ni vakabulai au, na Kalou;
Ni sa mai luvuca na yaloqu na wai.
2Au sa lutudromu e na oruoru, sa sega kina na vanua me'u tu kina:
Au sa yaco ki na wai titobu, sa dromuci au kina na wai levu.
3Au sa oca e na tagi: sa mamaca na noqu i tilotilo:
Sa malumalumu na mataqu ni'u sa waraki koya tiko na noqu Kalou.
4Ko ira era sa cati au walega era lewe vuqa ka lailai na drau ni uluqu:
Era kaukauwa ko ira era sa via vakarusai au, ni ra sa noqu meca walega:
Au a qai vakasuka tale na ka ka'u a sega ni kovea.
5Kemuni na Kalou, ko ni sa kila na noqu lialia;
Ka sa sega ni vuni vei kemuni na noqu i valavala ca.
6Me ra kakua ni madua e na vukuqu ko ira era qaravi kemuni na Turaga ko Jiova ni lewe vuqa;
Na Kalou ni Isireli, me ra kakua ni vakamaduataki e na vukuqu ko ira era qarai kemuni.
7Ni'u sa vosavakacacataki e na vukumuni;
Sa luvu na mataqu e na madua.
8Au sa vaka na kai tani vei ira na taciqu,
Kei na vulagi vei ira na luve i tinaqu.
9Ni sa kani au sara na loloma katakata ki na nomuni vale:
Ka sa tau vei au na nodra vosa ca ko ira era sa vosavakacacataki kemuni.
10Ni'u a tagi, ka vakararawataka na yaloqu ni'u a lolo,
Ka'u a vosavakacacataki kina.
11Au a vakaisulutaki au talega e nai sulu taga;
Ia ka'u a vakaibole kina vei ira.
12Era dauvosavakacacataki au ko ira era sa dautiko e na matamata-ni-koro;
Ka ra sa serekalitaki au ko ira na daumateni.
13Ia koi au, Kemuni Jiova, au sa masu vei kemuni e na gauna ni vinakati:
Mo ni rogoci au, na Kalou, e na kena levu ni nomuni loloma,
Ni kemuni sa daudina ni ia na veivakabulai.
14Mo ni vueti au mai na lolobo, me'u kakua ni dromu kina;
Me'u vakabulai maivei ira era sa cati au, mai na wai titobu talega.
15Me kakua ni luvuci au na wai levu,
Ka me kakua ni tilomi au na wai titobu,
Me kakua talega ni sogolati au ki loma na gusu ni bulubulu.
16Mo ni rogoci au, Jiova; ni sa ka vinaka na nomuni loloma:
Mo ni golevi au mai me vaka na kena levu ni nomuni yalololoma.
17Ia mo ni kakua ni vunia na matamuni vua na nomuni tamata:
Ni'u sa vakararawataki: mo ni rogoci au kusarawa.
18Mo ni toro voleka mai ki na yaloqu, ka sereka:
Ni vakabulai au e na vukudra na noqu meca.
19O ni sa kila na ka ka'u sa vosacataki kina, kei na ka ka'u sa vakamaduataki kina, kei na ka ka'u sa vakarogocataki kina:
Era tiko kecega e matamuni na noqu meca.
20Sa vakamavoataka na yaloqu na vosa ca; ka'u sa bibi sara:
Ia ka'u sa rai voli me lomani au e dua, ka sa segai;
Me so talega me vakacegui au, ka sa sega e dua ka'u kunea.
21Era sa solia talega na ka gaga me qau kakana;
Kei na wai wiwi me'u gunuva ni'u a viagunu.
22Me kenai cori vei ira ga na nodra tepeli:
Kei na nodra tiko vinaka, me sa tudai.
23Me vakabutobutotaki na matadra, me ra kakua ni rai rawa;
Ia mo ni vakasautanininitaka tikoga na tolodra.
24Ni sovaraka vei ira na nomuni cudru,
Ia me tau vei ira na nomuni cudru waqawaqa.
25Me lala didi mai na nodra vale;
Ia me kakua e dua me tiko e nodra vale laca.
26Ni ra sa vakacacani koya ko ni sa yavita;
Ka vosavakararawataki ira ko ni sa vakamavoataka.
27Mo ni sauma na nodra i valavala tawa dodonu:
Me ra kakua talega ni vakadonui vei kemuni.
28Me ra bokoci laivi mai nai vola ni bula,
Ia me ra kakua ni volai vata kei ira na yalododonu.
29Ia koi au ka'u sa malumalumu ka rarawa:
Me vakatoroi au ki cake, na bula sa maivei kemuni na Kalou.
30Au na vakavinavinaka ki na yaca ni Kalou e na sere,
Ka vakalevulevui koya e na vakamolimoli.
31Ena vinaka na ka oqo vei Jiova, ka ca na pulumokau,
Se na pulumokau tagane sa vakaileu ka vaququ.
32Era na kunea na ka oqo na yalomalumalumu, ka reki:
Ena bula talega na lomamudou sa qarai koya na Kalou.
33Ni sa rogoci ira na dravudravua ko Jiova,
Ka sega ni beci ira na nona era sa vesuki.
34Me vakavinavinaka vua ko lomalagi kei vuravura,
Na wasawasa kei na ka kecega sa bula voli kina.
35Ni na vakabulai Saioni na Kalou, ka tara na veikoro i Juta;
Me ra tiko maikina, ka taukena.
36Era na taukena talega ko ira na nodra kawa na nona tamata:
Ka ra na tiko kina ko ira era sa lomana na yacana.
Currently Selected:
NA SAME 69: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
