NA SAME 68
68
A vakavinavinaka e na vuku ni cakacaka loloma ni Kalou.
Vua na Domo-ni-sere. A Same i Tevita.
1Me tu cake na Kalou, me ra dui vakubutaki ko ira na nona meca:
Me ra veidroyaki e matana ko ira era sa cati koya.
2Me vaka sa cagina tani nai kubou, mo ni lewa me ra vaka talega kina ko ira:
Me vaka sa waicala na drega ni vola e na mata ni bukawaqa,
Me ra rusa laivi vakakina ko ira nai valavala ca e na mata ni Kalou.
3Ia me ra marau ga na yalododonu; me ra reki e na mata ni Kalou:
Io, me ra ladelade e na marau.
4Dou sere vua na Kalou, dou seretaka na yacana:
Dou vakavinavinaka vua sa vodo lako e na lomalagi,
Na yacana ko Ja, ka mo dou tavarekireki e matana.
5A tamadra na luveniyali, kei koya sa lewa e na vukudra na yada,
Na Kalou e na nonai tikotiko tabu.
6Sa qisi ira na Kalou era tiko taudua me ra tiko vakamataqali:
Sa kauti ira ki tautuba era vesuki e na sinucodo:
A ra sa tiko ga e na vanua dausiga na tamata be.
7Kemuni na Kalou, ni ko a liutaki ira na nomuni tamata,
Ni kemuni a lako vakaturaga e loma ni veikau; Sela:
8Sa tavuki na vanua,
Ka sa tau na lomalagi e na mata ni Kalou: Io, ko Saineai sa yavala e na mata ni Kalou, na Kalou ni Isireli.
9Oi kemuni, na Kalou, ko ni a vakatauca mai na uca levu,
Ko ni a vakaukauwataka kina na nomuni votavota, ni sa ceguoca.
10Era a tiko maikina na nomuni soqosoqo:
E na nomuni yalololoma, na Kalou, ko ni a vakarautaka na ka me nodra na dravudravua.
11Sa solia na vosa na Turaga:
Ka ra lewe vuqa sara era dautukuna voli.
12A nodra turaga na mataivalu era sa dui dro sara:
Ia na yalewa ka tiko ga e vale sa vota nai toki ni valu.
13Kevaka dou a koto e na maliwa ni kuro,
Dou na vaka ga na taba ni ruve sa botani e na siliva,
Kei na lawena e na koula dromodromoa.
14Ena vaka na uca-vulavula mai Salimoni,
Ni sa vakasevi ira maikina na tui ko Koya sa Kaukauwa.
15A ulu-ni-vanua ni Kalou sa vaka na ulu-ni-vanua ko Pasani;
Na ulu-ni-vanua cecere sa vaka na ulu-ni-vanua ko Pasani.
16A cava dou sa rai kivi kina koi kemudou na ulu-ni-vanua cecere,
Ki na ulu-ni-vanua sa vinakata na Kalou me tiko kina?
Io, ko Jiova ena tiko kina ka sega ni mudu.
17A qiqi-vakaturaga ni Kalou sa rua na oba, ia na nona agilose sa udolu vakavuqa sara:
Sa tiko na Turaga e na kedra maliwa, me vaka mai Saineai, e na tikina tabu.
18O ni a lako ki cake, o ni sa vakabobulataki ira na bobula era lewe vuqa;
O ni sa rawata nai solisoli me nodra na tamata;
Io, me nodra na dautalaidredre, me sa tiko vata kei ira ko Jiova na Kalou.
19Me vakacaucautaki na Turaga o koya sa colata na nodai colacola e na veisiga,
Io, na Kalou na nodai vakabula: Sela:
20A noda Kalou na Kalou sa dauia na veivakabulai;
Ka sa nei Jiova na Turaga na noda i drodro mai na mate.
21Ia na Kalou, ena vuetaka na uludra na nona meca,
Kei na buradelana vakaulu ni tamata sa kitaka tiko na talaidredre.
22Sa kaya na Turaga, Au na kauta tale mai Pasani,
Au na kauti ira tale na noqu tamata mai na loma ni wasawasa:
23Me lomoci kina na yavamu e na dra ni nomu meca,
Kei na yamedra na nomu koli e na ka ko ya.
24Era sa kunea oti, na Kalou, na nomuni lakolako;
Io, na nomuni lakolako, na noqu Kalou, na noqu Tui, e na vale tabu.
25Era sa liu ko ira na dausere, a ra sa muri tiko na dauqiriqiri;
Sa tiko e na kedra maliwa na goneyalewa era dauqiri tibereli.
26Dou vakavinavinaka vua na Kalou e nai soqosoqo,
Io, vei koya na Turaga, oi kemudou sa tubu maivei Isireli.
27Sa tiko maikea ko ira na Penijamini ka lailai kei na nodra turaga,
Kei na nodra turaga na Juta kei na nodra i vavakoso,
Kei na nodra turaga na Sepuloni, kei na nodra turaga na Nafitalai.
28Sa vakarota na nomu Kalou mo kaukauwa:
Kemuni na Kalou, mo ni vakaukauwataka na ka ko ni sa cakava e na vuku i keimami.
29E na vuku ni nomuni vale mai Jerusalemi
Era na kauta mai nai solisoli vei kemuni ko ira na tui.
30Mo ni vunauci ira na manumanu ni veigasau;
Na qele ni pulumokau tagane ni veimatanitu, kei na luvedra;
Me ra vakamalumalumu mada kina ko ira yadua ka soro e na tiki ni siliva:
Sa vakasevi ira ko koya era vinakata nai valu.
31Era na lako mai Ijipita na turaga;
Ena dodoka vakasauri na ligana ko Iciopea vua na Kalou.
32Dou sere vua na Kalou, na veimatanitu e vuravura;
Dou vakacaucautaki koya na Turaga; Sela:
33Vei koya sa vodo tu e na dela ni lomalagi e cake sara, io na lomalagi ka tu mailiu;
Raica, sa tabalaka na domona, io, na domona kaukauwa.
34Dou tukuna ni sa kaukauwa na Kalou:
Sa nodra turaga levu na Isireli,
Ka sa tiko mai lomalagi na nona kaukauwa.
35Kemuni na Kalou, ko ni sa rerevaki mai na nomuni veiyasana tabu:
Na Kalou ni Isireli sai koya ga sa dausolia na kaukauwa kei na qaqa vei ira na nona tamata.
Me vakacaucautaki na Kalou.
Currently Selected:
NA SAME 68: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
