NA SAME 63
63
Sa gadreva sara na Kalou ko Tevita, ka sa vakavinavinaka vua, 1-5. Ni sa vakararavi tiko vei koya, sa kila ni ra na ca na nona meca, 6-10, ka vinaka ga ko koya, 11.
A Same i Tevita, ni sa tiko e na veikau mai Juta.
1Oi kemuni na Kalou, ko ni sa noqu Kalou; ka'u na sou me'u qaravi kemuni:
Sa viagunu vei kemuni na yaloqu, sa gu ga vei kemuni na lewequ
E na vanua mamaca ka dauveivakaocataki, sa sega kina na wai;
2Me'u kunea na nomuni kaukauwa kei na nomuni ukuuku,
Me vaka ka'u a kunea e na nomuni vale tabu.
3Ni sa vinaka na nomuni loloma ka ca na bula,
Ena vakavinavinaka kina vei kemuni na tebenigusuqu.
4Ka'u na vosavinakataki kemuni vakaoqo ni'u sa bula tiko:
Ka'u na dodoka cake na ligaqu e na yacamuni.
5Ena mamau na yaloqu me vaka e na uto ni sui kei na uro,
Ena vakavinavinaka talega na tebenigusuqu ni sa reki tiko.
6Ni'u sa nanumi kemuni e na noqu i mocemoce,
Ka vakanananu vei kemuni e na veitiki ni bogi.
7Ni kemuni sa dauvukei au,
Ka'u na rekitaka kina na yaloyalo ni tabamuni.
8Sa gumatua na yaloqu ni'u muri kemuni:
Sa tokoni au na ligamuni matau.
9Ia ko ira era segata na yaloqu me ra vakarusa,
Era na lako sobu ki na tikina e ruku i vuravura,
10Era na bale e nai seleiwau:
Era na kedrai votavota na fokise.
11Ia na tui ena rekitaka na Kalou:
Era na marau tiko ko ira yadua sa bubului vua:
Ia ena vagagalutaki na gusudra na vosa lasu.
Currently Selected:
NA SAME 63: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
