NA SAME 59
59
Sa masuta na Kalou ko Tevita me vakabulai koya mai na nona meca, 1,2. A nodra i valavala na nona meca, 3-7. Era na cudruvi, 8-15. Sa vakavinavinaka ko koya vua na Kalou, 16,17.
Vua na Domo-ni-sere; Ali-tasikici. A Same i Tevita, ni sa talaki ko Saula, a ra sa vakatawa na vale me ra vakamatei koya.
1Mo ni vakabulai au, na noqu Kalou, mai vei ira na noqu meca:
Mo ni vakarurugi au maivei ira era sa tu cake kivei au.
2Vakabulai au maivei ira na daucaka cala,
Ka vakabulai au mai na tamata dauveivakamatei.
3Ni ra sa lawavaka na yaloqu:
Era sa soqoni vata na qaqa me veivala kei au;
Ka segai, Jiova, e na vuku ni noqu talaidredre, se na noqu i valavala ca.
4Era sa cici ka vakarautaki ira, ka segai e na vuku ni noqu caka cala:
Mo ni yadra mo ni vukei au, ka vakaraica.
5Ia koi kemuni, Jiova, na Kalou ni lewe vuqa, na Kalou ni Isireli,
Mo ni yadra me cudruvi ira kece na veimatanitu:
Mo ni kakua ni vosoti ira na caka cala era sa dautalaidredre. Sela.
6Era daulesu mai kei na yakavi; era osooso me vaka na koli,
Ka vakavolivolita na koro.
7Raica, era sa dausova vosa e na gusudra:
Sa tiko nai seleiwau e na tebenigusudra:
Ni ra sa kaya tiko, O cei sa rogoca?
8Ia koi kemuni, Jiova, ko ni na dredrevaki ira;
Ko ni na vakalialiai ira kecega na veimatanitu.
9E na vuku ni nomuni kaukauwa,
ka'u na qaravi kemuni kina:
Ni sa noqu vale ni valu cecere na Kalou.
10Ena liutaki au na noqu Kalou dauyalololoma:
Ena vakaraitaka vei au na Kalou na ka sa na yacovi ira na noqu meca.
11Mo ni kakua ni vakamatei ira, de ra guilecava ko ira na noqu tamata:
Mo ni vakasevi ira e nomuni kaukauwa; ka vakamalumalumutaki ira sobu;
Kemuni na Turaga na neimami sasabai.
12E na vuku ni ca ni gusudra kei na vosa ni tebenigusudra,
Me ra tauri ga e na nodra viavialevu:
E na vuku talega ni ruru kei na lasu era vosataka.
13Mo ni vakarusai ira e na nomuni cudru, ni vakarusai ira, me ra yali sara:
Ka me ra kila ni sa lewa na Kalou vei ira na Jekope
Ka yacova nai yalayala kei vuravura. Sela.
14Me ra qai lesu mai kei na yakavi; ka osooso me vaka na koli,
Ka vakavolivolita na koro.
15Me ra qara voli na kedra, Ia kevaka era sega ni mamau, me ra ia tiko kei na bogi.
16Ia koi au, ka'u na seretaka na nomuni kaukauwa;
Io, ka'u na seretaka vakadomoilevu na nomuni loloma kei na mataka:
Ni kemuni sa noqu vale ni valu cecere
Kei na noqu i drodro e na siga ka'u sa rarawa kina.
17Au na sere vei kemuni na noqu kaukauwa;
Ni sa noqu vale ni valu cecere na Kalou, na noqu Kalou dauyalololoma.
Currently Selected:
NA SAME 59: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
