NA SAME 148
148
Me ia na vakavinavinaka vei Jiova.
1Dou ia vei Jiova na vakavinavinaka.
Dou vakavinavinaka vei Jiova mai na lomalagi:
Dou vakavinavinaka vua mai na vanua cecere.
2Dou vakavinavinaka vua, na nona agilose kecega:
Dou vakavinavinaka vua, na nonai valu kecega.
3Drau vakavinavinaka vua, na mata-ni-siga kei na vula:
Dou vakavinavinaka vua, na kalokalo kecega sa serau tu.
4Dou vakavinavinaka vua, na lomalagi e cake sara,
Kei na wai sa sivia na lomalagi.
5Me ra ia na vakavinavinaka ki na yaca i Jiova:
Ni sa vakarota ko koya, ka ra sa buli mai.
6Ka sa vakataudeitaki ira ko koya me ra yacova na veigauna kecega:
Sa lesia ko koya na kedrai yalayala me ra sega ni sivia rawa.
7Dou vakavinavinaka vei Jiova mai vuravura,
Na tavuto, kei na ka kecega e na wai titobu:
8Na bukawaqa, kei na uca-cevata; na uca-vulavula, kei na kabukabu;
Na cagi liwa, ka vakayacora tiko na nona vosa;
9Na ulu-ni-vanua, kei na ulu-ni-koro kecega;
A kau dauvua, kei na sitari kecega:
10A manumanu kila, kei na manumanu lasa kecega;
Na ka sa qasi voli; kei na manumanu vuka:
11Na tui kei vuravura, kei na lewe ni veivanua kecega;
Na turaga, kei na turaga ni lewa kecega kei vuravura:
12Na cauravou, kei na goneyalewa;
Na tamata qase, kei na gone:
13Me ra ia na vakavinavinaka ki na yaca i Jiova:
Ni sa ka talei duaduaga na yacana; Sa sivia na vuravura kei na lomalagi na nona lagilagi.
14A sa vueta cake ko koya na nodra totoka na nona tamata,
Na nodra vakavinavinaka na nona tamata yalosavasava kecega;
Io na nodra na Isireli, a matanitu sa voleka vua.
Dou ia vei Jiova na vakavinavinaka.
Currently Selected:
NA SAME 148: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific