NA SAME 115
115
Sa lewa na Kalou, 1-3, ka sa ka wale na matakau, 4-8, o koya oqo me da vakararavi kina vua na Kalou, 9-11, ka vakavinavinaka, 12-18.
1Kemuni Jiova, me kakua vei keimami, me kakua vei keimami,
Me ia ki na yacamuni ga na vakavinavinaka,
E na vuku ni nomuni loloma, kei na nomuni yalodina.
2E na cava me ra kaya na veimatanitu,
Sa evei na nodra Kalou?
3Ia na noda Kalou sa tiko mai lomalagi:
Sa cakava oti na ka kecega sa vinakata ko koya.
4Ia na nodra matakau na siliva kei na koula,
Na cakacaka ni liga ni tamata.
5Era sa vakagusuna, ia era sa sega ni vosa rawa;
Era sa vakamatana, ia era sa sega ni rai rawa;
6Era sa vakadaligana, ia era sa sega ni rogo rawa:
Era sa vakaucuna, ia era sa sega ni boi rawa;
7Era sa vakaligana, ia era sa sega ni tara ka rawa;
Era sa vakayavana, ia era sega ni lako rawa:
Ka ra sa sega talega ni cavuta rawa na vosa e na nodra i tagitagi.
8O ira era cakava era sa tautauvata kei ira;
Kei ira kece talega era sa vakararavi vei ira.
9I Isireli, mo vakararavi vei Jiova:
O koya ga na nodra i vukevuke kei na nodra i sasabai.
10Na mataqali i Eroni, dou vakararavi vei Jiova:
O koya ga na nodra i vukevuke kei na nodra i sasabai.
11Oi kemudou sa rerevaki Jiova, dou vakararavi vei Jiova:
O koya ga na nodra i vukevuke kei na nodra i sasabai.
12Sa daunanumi keda ko Jiova: ena vakalougatataki keda:
Ena vakalougatataka na mataqali i Isireli;
Ena vakalougatataka na mataqali i Eroni.
13Ena vakalougatataki ira era sa rerevaki Jiova,
Ko ira na lalai kei ira na lelevu.
14Ena vakalewevuqataki kemudou tiko ko Jiova,
Oi kemudou kei ira na luvemudou.
15Sa vakalougatataki kemudou ko Jiova
O koya ka bulia na lomalagi kei vuravura.
16Na lomalagi io na lomalagi sa nei Jiova:
Ia sa solia na vuravura ko koya me nodra na luve ni tamata.
17Era sa sega ni vakavinavinaka rawa vei Jiova ko ira na mate,
Se ko ira era lako sobu ki na vanua era galu kina.
18Ia koi keda ga, eda na vakavinavinaka vei Jiova
Mai na gauna oqo ka sega ni mudu.
Dou ia vei Jiova na vakavinavinaka.
Currently Selected:
NA SAME 115: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
