NA VOSA VAKAIBALEBALE 8
8
A kenai rogorogo vinaka ko vuku, kei na kena yaga, 1-11. A kenai valavala e vuravura, 12-21. Sa ka mailiu sara ko koya, 22-31. A nonai vakaro vinaka, 32-36.
1Sa daukaci ko vuku, se segai?
Ka dautabalaka na domona ko yalomatua?
2Sa tu e na dela ni tikina cecere, e na bati ni sala
E na kena basoga ni sala:
3E na matamata-ni-koro, e nai curucuru ki na koro,
E na mata ni katuba, sa dauvunau ko koya, ka kaya;
4Au sa kaci vei kemudou;
Ia ka'u sa vosa yani vei kemudou, na luve ni tamata
5Koi kemudou ka sega ni vuku, dou kila mada na vuku:
Kei kemudou na lialia, dou yalomatua mai.
6Dou rogoca ni'u na vosataka na ka vinaka;
Ia na tebenigusuqu ni sa dalaga, ena tukuna na ka dodonu:
7Ni na vosataka na ka dina na gusuqu;
Ia na ca sa ka vakasisila ki na tebenigusuqu.
8Sa dodonu kecega na vosa ni gusuqu;
Sa sega kina na ka vereverea se takelo:
9Sa macala kecega vua sa yalomatua,
Ka dodonu vei ira era kunea na lomavuku.
10Dou vinakata na noqu i vakavuvuli, ka cata na siliva;
Kei na vuku, ka cata na koula talei;
11Ni sa vinaka na vuku ka ca na rupi;
Ia na ka kecega e daudomoni sa sega ni vakatauvatani kaya rawa.
12Koi au ko vuku, keirau sa tiko kei yaloqaseqase,
Ka'u sa daukunea ka kila na ka e dauveinanuyaki.
13Oqo na rerevaki Jiova me cata na ka ca:
Na qaciqacia, kei na viavialevu, kei na sala ca,
Kei na gusu vosaveve, ka'u sa cata.
14Sa noqu nai vakavuvuli, kei na vuku dina:
Koi au na yalomatua; sa tu vei au na kaukauwa.
15Sai au ga era buli kina na tui,
Ka ra lewa vakadodonu kina ko ira na turaga ni lewa:
16Sai au ga era ia kina na lewa na turaga,
Kei ira na tamata turaga, io, ko ira kecega na turaga ni lewa e vuravura.
17Au sa lomani ira era sa lomani au;
Ia ko ira era sa qarai au taudonu era na kunei au.
18Sa tiko vata kei au nai yau kei na vakarokoroko;
Io nai yau veiqati kei na ka dodonu.
19A ka ka'u sa vakavuna sa vinaka ka ca na koula, io sa ca na koula talei sara
Ia na ka ka tubu e na vukuqu sa vinaka ka ca na siliva dina.
20Au sa liu tiko e na sala ni valavala dodonu,
E loma ni sala ni lewa dodonu:
21Me'u lewa me ra taukena na ka dina ko ira era sa lomani au;
Ia ka'u na vakasinaita na nodra kato kamunaga.
22Sa buli au ko Jiova ni sa vakatekivu na nona cakacaka,
Sa liu koi au ka muri na nona cakacaka eliu.
23Au a lesi mailiu sara, mai nai vakatekivu,
Ni sa sega ko vuravura.
24Ni sa sega na wai titobu, ka'u a sucu,
Ni sa sega nai vurevure e levu kina na wai.
25Ni sa sega ni tauyavutaki na veiulu-ni-vanua,
Ni sa sega na veiulu-ni-koro ka'u a sucu:
26Ni sa bera ni bulia ko koya na vuravura kei na vanua,
Kei na kuvu-ni-soso kei vuravura.
27Ni sa vakarautaka na lomalagi, ka'u a tiko maikina:
Ni sa vakavolivolita na dela ni wai titobu:
28Ni sa vakataudeitaka na o maicake:
Ni sa vakaukauwataka nai vurevure ni wasawasa:
29Ni sa yalana na wasawasa
Me kakua ni sivia na nona vosa na kena wai:
Ni sa lesia na yavu kei vuravura;
30Au a qai tiko kaya me matai daucakacaka:
Ka'u a nona ka e daurekitaki e na veisiga,
Ka'u a marau tiko e matana;
31Ka rekitaka na nona veivanua e vuravura sa tawa rawa;
Ia ka'u a daumarautaki ira na luve ni tamata.
32Dou qai vakarorogo kina kivei au, ragone:
Ni ra sa kalougata ko ira era sa muria na noqu sala:
33Dou rogoca nai vakavuvuli, mo dou vuku,
Dou kakua ga ni besetaka.
34Sa kalougata na tamata sa rogoci au,
Ka sa vakatawa e na veisiga e na noqu veimatamata-ni-koro,
Ka wawa tiko mai na duru ni noqu katuba.
35Ni sa kunea na bula ko koya sa kunei au;
Ena vinakati koya talega ko Jiova.
36Ia ko koya sa cala vei au sa vakacacana na yalona
Ko ira kecega era cati au, era sa vinakata na mate.
Currently Selected:
NA VOSA VAKAIBALEBALE 8: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
