NA VOSA VAKAIBALEBALE 7
7
Ai vakaro me vuku na cauravou, me kakua ni muria na yalewa ca, 1-5. Sa tukuna nai valavala ni yalewa dautagane, 6-23. Sa ia tale nai vakaro, 24-27.
1Na luvequ, mo muria na noqu vosa,
Ka tugana ki yalomu na noqu vunau.
2Mo muria na noqu i vakaro, mo bula;
Kei na noqu vunau me vaka na loa ni matamu.
3Vauca ki nai qaqalo ni ligamu,
Vola sara ki na lomamu.
4Mo kaya ki na vuku
Ko iko na ganequ;
Ka vakatoka na yalomatua me wekamu yalewa:
5Me rau maroroi iko mai na yalewa tani,
Mai vua na kai tani sa vosa vakaveicavilaki.
6Ni'u a rai yani mai nai sogo cicila,
Mai na katuba ni noqu vale.
7Ka'u a raici ira na yalowai,
Ka'u a kunea e na kedra maliwa na cauravou,
E dua vei ira sa sega ni vakayalo,
8Ka sa lako voli yani e na sala ka volekata na nona tikina na yalewa;
Ka sa muria na sala ki nona vale,
9Ni sa yakavi sobu, e na yakavi bogi,
Ni sa bogi loaloa ka butobuto mai:
10Ka raica, sa rau sota kaya e dua na yalewa,
Sa vakaisulu e nai sulu ni yalewa dautagane, a sa qaseqase na yalona.
11Sa daudomolevu ko koya, ka yalokaukauwa,
Ka sa sega ni tiko dei na yavana e nona vale:
12Oqo sa tiko e tautuba, oqo sa tiko e na saqata ni koro,
Sa wawa tiko e na tutu ni sala kecega.
13Sa tauri koya, ka reguca,
Ka sa vaqaqataka na matana vua, ka kaya,
14Sa tu vei au nai madrali ni veivinakati;
E na siga edaidai ka'u sa ia oti na noqu bubului:
15O koya ka'u a lako mai kina me'u tavaki iko,
Me'u qarai iko matua; ia ka'u sa qai kunei iko.
16Au sa vakaiukuukutaka oti na noqu i kotokoto e nai tutuvi sa cula vakamatai.
Kei na ka sa ceuti, kei na lineni matailalai ka veivolavolai ni Ijipita:
17Au sa vakaisaluakitaka na noqu i davodavo
E na mura, kei na yasi, kei na sinamoni.
18Daru mai la'ki vakamarautaki vata mada e na loloma me mataka:
Me daru veivakacegui sara e na veilomani:
19Ni sa yali mai vale na watiqu,
Sa la'ki lako vakayawa ko koya:
20Sa kauta vata kaya e dua na taga i lavo,
Ena lako tale mai ki neitou e na siga ga ka lokuci.
21E na nona vosa kamikamica tiko sa rawai koya,
Ena vosa veicavilaki ni gusuna sa gumatua vua:
22Sa la'ki muri koya sara,
Me vaka na pulumokau ni sa la'ki vakamatei, Se vaka na lialia ni sa la'ki vesuki e nai vesu kau;
23Ka me qai laubasikataka na yatena na gasau;
Me vaka na manumanu sa kusarawa yani ki nai cori, Ka sa sega ni kila ni sa ka me mate kina.
24O koya dou mai rogoci au mada, ragone,
Ka vakarorogo ki na vosa ni gusuqu.
25Me kakua ni lesu tani na yalomu ki na nonai valavala,
Kakua ni lako sese voli e na nona sala;
26Ni sa vakabalei ira oti na lewe vuqa:
Io, sa vakamatei ira na kaukauwa e lewe vuqa sara.
27A nona vale na sala ki nai bulubulu,
Sa lako sobu ki na loma ni vanua ni mate.
Currently Selected:
NA VOSA VAKAIBALEBALE 7: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
