NA VOSA VAKAIBALEBALE 5
5
Ai vakaro me vuli vuku, 1,2. E ca sara nai valavala ni yalewa ca; era rusa ko ira era vakarorogo kina, 3-14. A ka yaga nai valavala malua, 15-21; ia na tamata ca, sa daucoriti e na nonai valavala ca, 22,23.
1Na luvequ, mo vakarorogo ki na noqu vuku,
Vakalakala daligamu ki na noqu yalomatua:
2Mo vakabauta kina na lomavuku,
Ia me tu ga e na tebenigusumu na vosa vuku.
3Ni sa titiri na oni mai na tebenigusu ni yalewa dua tani, a sa kamikamica sara na gusuna ka segai na waiwai:
4Ia sa gaga na kenai otioti me vaka na duva gaga,
Ka sa gata me vaka nai seleiwau batirua.
5Sa lako sobu ki na mate na yavana;
Sa yacova nai bulubulu na nonai lakolako.
6De ko vakasamataka na sala ni bula,
Sa veilakoyaki na nonai valavala, e dredre mo kila.
7Dou rogoci au mada, ragone,
Ka kakua ni lako tani mai na vosa ni gusuqu,
8Mo muria ga na sala tani mo drau veiyawaki kaya,
Mo kakua ni torova na katuba ni nona vale:
9De ko solia vei ira na tani na kemui rogorogo vinaka,
Kei na nomu veiyabaki vei ira sa sega ni loloma:
10De mamau ko ira na tani e na nomu i yau;
Ka tiko e na vale ni kai tani na ka ko oca kina;
11Ia ko qai vutugu maimuri,
Ni sa kani oti na lewemu kei na yagomu.
12Ka kaya,
Ulei! ni'u a cata na veivakatavulici,
Ka beca na vunau na lomaqu;
13Ka sa sega talega ni vakarogoca na domodra era vakavulici au,
Ia vei ira era vunauci au ka'u a bese ni vakalakala daligaqu!
14Sa vo e lailai me'u cakava na ka ca kecega
E na kedra maliwa na lewe ni lotu kei nai soqosoqo.
15Mo gunu wai mai na nomu keli-wai,
Kei na wai drodro mai na nomu mata-ni-wai.
16Me sa dui dave voli yani na nomu i vurevure,
Kei na veiuciwai e na saqata ni koro.
17Me nomu duaduaga,
Ka sega ni nomudou vata kei ira na kai tani.
18Me kalougata na nomu i vurevure;
Ia mo marautaki koya sa watimu ni ko sa cauravou.
19Me sa vaka na teira dauloloma ko koya, kei na me yalewa kila sa matavinaka;
Mo mamau ga e na sucuna e na veigauna kecega;
Mo marau tikoga e na nona loloma.
20Na luvequ a cava ko via marautaka kina na yalewa tani,
Mo mokota kina na lomaserena na tani?
21Ni sa tu e na mata i Jiova nai valavala ni tamata,
Ka sa daunanuma kecega na nonai lakolako.
22Ena lauti koya na tamata ca na nona caka cala,
Ia e nai vau ni nonai valavala ca ena vesu kina ko koya:
23Ena mate ga ko koya ka sega ni vakavulici;
Ia e na vuku ni nona lialia levu ena lako sese ga.
Currently Selected:
NA VOSA VAKAIBALEBALE 5: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
