NA VOSA VAKAIBALEBALE 4
4
Sa tukuna ko Solomoni ni sa vakavulici koya koi rau na nona qase, 1-4. Na ka eso ka vakavulici kina, 5-19. Sa qai ia tale ko koya na nonai vakavuvuli, 20-27.
1Dou rogoca, na luvequ, na nonai vakavuvuli na tamamudou,
Ia dou vakarorogo mo dou kila kina na vuku.
2Ni'u sa solia vei kemudou nai vakavuvuli vinaka,
Dou kakua ni biuta na noqu vunau.
3Ni'u a luvena dua bau ko tamaqu,
Au a nona gone ni toko ka sa vakamenemeneitaki au ko tinaqu.
4Sa vakavulici au ko koya, ka kaya vei au,
Me taura matua na noqu vosa na lomamu:
Mo vakabauta na noqu i vakaro mo bula.
5Mo rawata mada na vuku, mo rawata talega na yalomatua:
Kakua ni guilecava; mo kakua talega ni lesu tani mai na vosa ni gusuqu.
6Kakua ni biuti koya, ka na maroroi iko:
Mo lomani koya, ka na vakatawai iko ko koya.
7Sa ka levu duaduaga na vuku; mo rawata mada na vuku:
Ia e na ka kece ko sa rawata mo rawata vata kei na yalomatua.
8Mo taleitaki koya, ena vueti iko ki cake:
Ena vakavuna na nomu dokai, ni ko sa mokoti koya.
9Ena vakaisalataki iko e nai ukuuku talei:
Ena solia vei iko nai sala vakaiukuuku.
10Mo rogoca, na luvequ, ka vakabauta na noqu vosa;
Ena qai vuqa na yabaki ni nomu bula.
11Au a vakavulica vei iko na sala ni vuku;
Au sa tuberi iko e na sala dodonu.
12Ni ko sa lako tu, e na sega ni vakaleqaleqai na yavamu;
Ia ni ko sa cici tu ko na sega ni tarabe.
13Taura matua nai vakavuvuli; kakua ni laiva:
Mo vakabauti koya; ni sa nomu vu ni bula ko koya.
14Mo kakua ni lakova na nodra sala nai valavala ca,
Kakua talega ni muria na nodra i lakolako na tamata ca.
15Mo biuta ga, kakua ni torova;
Gole tani maikina, ka lako tani yani.
16Ni ra sa sega ni moce, kevaka era a sega ni cakava na ka ca;
A ra sa sega ni moce rawa, kevaka era sega ni ia mada na veivakacacani.
17Ni ra sa kania na madrai ni ca,
Ka gunuva na waini ni valavala kaukauwa.
18Ia na nodra sala na yalododonu sa vaka na rarama sa cila tu,
Sa levu cake tiko na kena rarama ka yacova na siga levu.
19Ia na nodra sala nai valavala ca sa vaka na butobuto:
Era sa sega ni kila na ka era sa tarabe kina.
20Na luvequ, mo vakarorogo ki na noqu vosa;
Mo vakatu daligamu ki na ka ka'u sa tukuna;
21Me ra kakua ni yali e matamu;
Mo tugana ga ki na vu ni yalomu.
22Sa vu ni bula vei ira era sa kunea,
Ka sa ka-ni-bula ki na yagodra taucoko.
23Mo vakatawa vakavinaka sara na yalomu;
Ni sa taka maikina nai vurevure ni bula.
24Biuta tani vei iko na gusu takelo,
Ia na tebenigusu vosaveve mo vakayawataka vei iko.
25Me rai vakadodonu yani na matamu,
Kei na dakudaku-ni-matamu me qaradonu ga ki liu.
26Mo lewa deivaka nai lakolako ni yavamu,
Ia na nomu sala kecega ena vakadodonutaki.
27Kakua ni ko gole tani ki nai matau se ki nai mawi:
Tarova na yavamu mai na ca.
Currently Selected:
NA VOSA VAKAIBALEBALE 4: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific