NA VOSA VAKAIBALEBALE 31
31
Ai vakavuvuli i Lemueli e nai valavala malua, 1-7; kei na loloma vei ira sa rarawa, 8,9. Ai valavala ni yalewa vinaka sara sa vakawati, 10-31.
1A vosa i Lemueli na tui, na parofisai ka vakavulica vua ko tinana.
2A cava, na luvequ? a cava, na luve ni ketequ?
Ia a cava, na luvequ ka'u a bubului kina. 3Kakua ni ko solia na nomu kaukauwa vei ira na yalewa,
Se na nomu i valavala ki na ka era rusa kina na tui. 4I Lemueli, sa sega ni kilikili kei ira na tui, sa sega ni kilikili kei ira na tui me ra gunu waini;
Se vei ira na luve ni tui me ra via gunu yaqona: 5De ra gunu, ka guilecava na vunau,
Ka kauta vakatani na lewa e na vukuna e dua sa vakararawataki. 6Solia na yaqona vua sa voleka ni mate,
Kei na waini vei ira sa bibi na lomadra. 7Me gunu ko koya, ka guilecava na nona dravudravua,
Ka sega ni nanuma tale na nona rarawa. 8Mo vosa e na vukudra na galu,
E na vukudra kece era sa lewai me mate: 9Mo vosa mada, mo lewa vakadodonu,
Mo totaki ira na malumalumu kei na dravudravua. 10Ko cei sa kunea rawa na yalewa sa vinaka sara?
Ni sai yau levu ko koya kai yau lailai na rupi. 11Sa vakararavi sara vua na yalo ni watina,
Ia sa sega kina ni yaga vua nai toki ni valu. 12Ena caka vinaka vua ka sega ni caka ca
E na veisiga kecega sa bula kina ko koya. 13Sa qara na vutika ni sipi, kei na lineni,
A sa makututaka na cakacaka ni ligana. 14Sa vaka na nodra waqa na tamata dauveivoli;
Sa kauta vakayawa mai na nona kakana. 15Sa sou e na mataka caca,
Ka sa solia vei ira na nona lewe ni vale na kedratou,
Kei na nodratou i tavi na nona vada. 16Sa nanuma e dua na were, ka volia:
Ia e na ka e rawa e na ligana sa tea na were-ni-vaini. 17Sa vauca na tolona e na kaukauwa,
Ka sa gu levu na ligana. 18Sa kunea ni sa vinaka na nona ka ni vovoli:
Sa sega ni boko e na bogi na nona cina. 19Sa dodoka na ligana ki nai vakawiri ni wa-ni-sulu,
Ka sa taura e na ligana nai tokatoka ni lineni. 20Sa dodoka yani na ligana me soli ka vei ira sa dravudravua;
Io, sa dodoka na ligana vei ira na luveniyali. 21Sa sega ni rerevaka na uca-vulavula de tauci iratou na nona lewe ni vale:
Ni sa taqa rua na nodratou i sulu kecega na nona lewe ni vale. 22Sa cakava nai tutuvi sa cula vakamatai me nona;
Na nonai sulu sa lineni matailalai ka lokaloka. 23Sa kilai mai na matamata-ni-koro na watina,
Ni sa tiko vata kei ira na qase ni vanua. 24Sa cakava nai sulu lineni vakamatailalai, ka sa volitaka;
Ka sa vakauta nai vau ni sulu vua na dauveivoli. 25Na nonai sulu na kaukauwa kei nai tovo vakamarama;
Ia ena reki ko koya e na gauna maimuri. 26Sa vosa vakavuku na gusuna;
Ia nai vakavuvuli ni loloma sa tiko e na yamena. 27Sa vakaraica vinaka na nodratou i valavala na nona lewe ni vale,
Ka sa sega ni kania na kakana ni vucesa. 28Eratou tubu cake na luvena, me vosavakalougatataki koya;
A watina talega, sa vakacaucautaki koya, ka kaya, 29Era lewe vuqa na yalewa era sai valavala vinaka,
Ia ko iko, ko sa uasivi cake vei ira kecega. 30A ka lasu na saweka, ka sega ni yaga na matavinaka:
Ia na yalewa sa rerevaki Jiova, ena vakacaucautaki: 31Solia vei koya na vua ni ligana;
Ia me vakacaucautaki ko koya mai na matamata-ni-koro e na vuku ni nona cakacaka.
Currently Selected:
NA VOSA VAKAIBALEBALE 31: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
