NA VOSA VAKAIBALEBALE 30
30
Sa tukuna ko Akuri na ka e vakabauta, 1-6, kei na nona masu, 7-9. Nai tabatamata ca e va, kei na ka e va sa sega ni mamau rawa, 10-16. Sa tabu ni beci ira na qase, 17. E va na ka e dredre ni kilai, 18-20; ka va na ka sa dredre ni vosoti, ka va na ka sa vuku, 21-28; ka va na ka sa matavinaka, 29-31. Me kua na veicudruvi kei na veileti, 32,33.
1Na vosa i Akuri, na luve i Jake, na parofisai ka vosataka ko koya vei Icieli, io vei rau ko Icieli kei Ukali.
2E dina ni'u sa lialia ka ra yalomatua na tamata kecega,
Ka sa sega vei au na vuku vakatamata: 3Au a sega ni vuli vuku,
Ka'u sa lecavi koya talega na Yalosavasava. 4Ko cei sa cabe cake ki lomalagi, se lako sobu mai?
Ko cei sa kumuna na cagi ki ligana?
Ko cei sa vauca na wai e nai sulu?
Ko cei sa lesia kecega nai yalayala kei vuravura?
Ko cei na yacana, ko cei talega na yaca i koya na luvena, kevaka ko sa kila? 5A nona vosa kecega na Kalou sa savasava:
Nai sasabai ko koya vei ira kecega era vakararavi vua: 6Mo kakua ni vakaikuritaka na nona vosa,
De vunauci iko ko koya, ka ko sa kune kina mo tamata lasulasu. 7E rua na ka ka'u sa kerea vei kemuni;
Mo ni kakua ni bureitaka vei au ni'u sa bula tiko: 8Mo ni kauta tani vakayawa vei au na ka lasu kei na vosa lasu:
Mo ni kakua ni soli au me'u dravudravua se me'u vutuniyau;
Ni vakani au e na kakana sa rauti au: 9De'u mamau, ka lasutaki kemuni, ka kaya, Ko cei ko Jiova?
Se'u dravudravua, ka butako,
Ka cavuta wale na yaca ni noqu Kalou. 10Kakua ni beitaka na tamata e na ca vua na nona turaga,
De vatonaki iko ko koya, ka ko sa vakacalai kina. 11Sa dua na mataqali sa vatonaka na tamadra,
Ka sega ni vosavakalougatataka na tinadra. 12Sa dua na mataqali sa nanumi ira ni ra savasava,
Ia sa sega ni sava tani na nodra dukadukali. 13Sa dua na mataqali, a ka vakaidina na nodra mata viavialevu!
Ka sa cecere na dakudaku-ni-matadra. 14Sa dua na mataqali sa vaka nai seleiwau na batidra, ka vaka nai sele na bati ni galegaledra,
Me ra kani ira laivi kina na yalomalumalumu mai dela i vuravura, kei ira na dravudravua maivei ira na tamata. 15Sa rua na luvena yalewa na aluka, a rau dau kerekere, Solia mai, solia mai.
E tolu na ka sa sega ni mamau rawa,
Io, e va sa sega ni kaya, Sa rauta: 16Nai bulubulu; kei na kete yava;
Na qele sa sega ni mamau e na wai;
Kei na bukawaqa sa sega ni kaya,
Sa rauta. 17Na mata sa vakalialiai tamana,
Ka sa beca me talairawarawa vei tinana,
Ena covuta na reveni ni uciwai,
Ka kania na luve ni ikeli. 18E tolu na ka e veivakurabuitaki vei au,
Io, e va ka'u sa sega ni kila: 19Na kenai vukavuka ni ikeli mai lomalagi;
Na kenai dolodolo ni gata e na dela ni vatu;
Na we ni waqa e loma ni wasawasa;
Kei nai valavala ni tagane vua na goneyalewa. 20Sa vakaoqo na nonai valavala na yalewa dautagane;
Sa kana, ka qusia na gusuna,
Ka kaya, Au sa sega ni kitaka na ka ca. 21E tolu na ka sa yavavala kina ko vuravura,
Io, e va sa sega ni vosota rawa: 22Na tamata wale ni sa buli me turaga; Kei na tamata lialia ni sa mamau e na kakana;
23Na yalewa vakasisila ni sa vakawati;
Kei na vada sa veitaravi kei na nona marama. 24E va na ka e vuravura sa lalai,
Ka sa vuku vakalevu sara: 25A kadi na yavusa sa sega ni kaukauwa,
Ia era vakarautaka na kedra e na vula i katakata; 26A koni na yavusa sa sega so ni kaukauwa,
Ia sa cakava na nodra vale e na qara vatu; 27Sa sega na nodra tui na vodre,
Ia era sa lako kece yani vakamataivalu; 28A sare sa qasi voli e na ligana,
Ia sa tiko e na nodra vale na tui. 29E tolu na ka sa totoka na nodra i lakolako,
Io, e va sa lako vakatotoka voli: 30Na laioni, o koya sa kaukauwa vei ira kecega na manumanu,
A sa sega ni lesu tani e na vukuna e dua; 31Na ose ni valu; kei na me tagane;
Kei na tui, sa sega ni yaga me vorati. 32Kevaka ko sa caka vakalialia ni ko sa vakalevulevui iko,
Se ko sa nanuma na ka ca,
Mo tabonaka na gusumu e na ligamu: 33Ni sa rawa na pata ni sa vakayavalati na wai-ni-sucu,
A sa tubu na dra ni sa laukini na ucu:
A sa tubu na veileti ni sa levu na cudru.
Currently Selected:
NA VOSA VAKAIBALEBALE 30: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
