NA VOSA VAKAIBALEBALE 23
23
1Ni drau sa tiko mo kana vata kei na turaga,
Mo nanuma matua na ka sa tu e matamu; 2Ka kauta nai sele ki na nomu i tilotilo,
Kevaka ko sa tamata daugarogaro: 3Kakua ni ko garova na nona kakana vinaka:
Ni sa kakana ni veivakaisini. 4Mo kakua ni vakaceguocataki iko mo vutuniyau:
Mo kua ni vakararavi ki na nomu vuku. 5A cava beka ko sa wanonova kina na ka sa sega?
Ni sa cakava vakaidina na tabana nai yau;
Ka vuka tani me vaka na ikeli vaka ki lomalagi. 6Kakua ni ko kania na nona madrai sa mata buroburoga,
Kakua talega ni ko garova na nona kakana vinaka: 7Ia me vaka na vakanananu ni lomana, sa vakakina ko koya:
Sa kaya vei iko, Mo kana ka gunu:
Ia sa sega ni lomana dina vei iko: 8A tiki ni kakana ko sa kania ko na luaraka tale,
Ka vakayalia na nomu vosa vinaka. 9Mo kakua ni vosa e daligana na lialia:
Ni na beca na nomu i vakavuvuli vuku. 10Mo kakua ni kisira tani nai yalayala makawa ni vanua;
Ia mo kakua ni curuma na nodra veiwere na luveniyali: 11Ni sa wekadra ko Koya sa Kaukauwa;
Sai koya ena veilewai kei iko ka na totaki ira. 12Mo vagolea na lomamu ki nai vakavuvuli,
Kei na daligamu ki na vosa vuku. 13Mo kakua ni tarova na kuita mai vua na gone;
Ia ni ko sa warolaki koya, ena sega ni mate kina. 14Mo warolaki koya,
Ia ko na vakabula kina na yalona mai eli. 15Na luvequ, kevaka ena vuku na lomamu,
Ena reki dina na yaloqu: 16Io ena reki na noqu i ivi,
Ni sa vosataka na ka dodonu na gusumu. 17Me kakua ni vuvutaki ira nai valavala ca na lomamu;
Ia mo rerevaki Jiova tiko e na siga taucoko ka bogi: 18Ni sa dua dina kina na kenai sau;
Ia na ka ko sa nuitaka ena sega ni muduki tani. 19Mo vakarorogo, na luvequ, mo vuku,
Ka tubera na lomamu e na sala. 20Mo kakua ni tiko kei ira era daugunu waini,
Kei ira era daukusikusima: 21Ni rau na vakadravudravuataki na daumateni kei na daukana:
Ia na tamata sa daumoce ena vakaisulu e nai sulu sa kadresudresu. 22Mo vakarorogo vua drau sa veitamani dina kaya,
Kakua talega ni ko beci tinamu ni sa qase mai. 23Mo volia na dina, ka kakua ni volitaka;
Na vuku talega, kei nai vakavuvuli, kei na yalomatua. 24Ena reki vakalevu na tamana na yalododonu:
Ko koya erau veitamani dina kei na gone vuku ena levu kina na nona marau: 25Erau na reki ko tamamu kei tinamu,
Io ena ladelade ko koya ka vakasucumi iko. 26Na luvequ, mo solia na lomamu kivei au,
Ia me vakabauta ga na noqu sala na matamu. 27Ni sai keli titobu na yalewa dautagane;
Ka sai keli qiqo na yalewa i valavala ca. 28Sa lawa koto talega ko koya me vaka na daubutako,
Ka sa vakalewevuqataki ira na tamata dautalaidredre. 29Ko cei sa vakaulei? ko cei sa rarawa? ko cei sa veileti?
Ko cei sa dauvosabalavu? ko cei sa mavoa wale?
Ko cei sa damudamu na matana? 30Ko ira era gunu waini tiko vakadede;
Ko ira era la'ki qara na waini sa veiwaki vata. 31Kakua ni ko qoroya na waini ni sa damudamu,
Ni sa roka vinaka mai e na bilo,
Ka vinaka na kena gunuvi. 32Sa oti, sa kata me vaka na gata,
Ka sa kata me vaka na gata dauveikata. 33A matamu ena kunei ira na yalewa tani,
Ia na lomamu ena cavuta na ka vakatani. 34Io ko na vaka ga e dua sa koto e loma ni wasawasa,
Se dua sa davo tu e na dela ni vana: 35Ko na kaya, Era a vacuki au, ia ka'u sa sega ni rarawa kina;
Era sa mokuti au, ka'u a sega ga ni kila:
Ka'u na yadra li ninaica? ka'u na baci qara tale.
Currently Selected:
NA VOSA VAKAIBALEBALE 23: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
