NA VOSA VAKAIBALEBALE 20
20
1A dauveivakalialiai na waini, a daucudru na yaqona:
Ia ko ira kece era vakacalai kina era sa sega ni vuku.
2Sa vaka na tagi ni laioni na cudru ni tui:
Ko koya sa vakacudrui koya sa caka ca ki na yalona dina.
3Sa ka ena dokai kina na tamata ni sa cegu mai na veileti:
Ia na yalolialia era na dui via kauwai kina.
4Ni sa liliwa, ena sega ni via cuki were na vucesa;
O koya ena vosai kena e na vula i katakata, ka na sega ga.
5Sa wai titobu na lewa e na loma ni tamata;
Ia na tamata vuku ena takiva mai.
6Era lewe vuqa na tamata era na dui tukuna yadua na nodra yalovinaka:
Ia ko cei me kunea rawa e dua na tamata lomadina.
7Sa muria na nona yalodina na yalododonu:
Era sa kalougata na luvena era taravi koya.
8A tui sa tiko e nai tikotiko ni veilewai
Sa vakaseva tani e na matana na ka ca kecega.
9O cei me kaya rawa, Au sa vakasavasavataka na yaloqu,
Au sa savasava mai na noqu i valavala ca?
10Ai vakabibi lasu, kei nai vakarau lasu,
Sa cata sara ruarua ko Jiova.
11Ia na gone sa kilai e na nonai valavala,
Se savasava ka dodonu na nona cakacaka, se segai.
12A daliga rogo, kei na mata rai,
Sa bulia ruarua ko Jiova.
13Kakua ni ko vinakata na moce, de ko dravudravua mai;
Me yadra mada na matamu, ko na qai vakamamautaki e na kakana.
14Sa ka ca, sa ka ca, e kaya ko koya sa via volia:
Ia ni sa lako tani yani, sa qai vakacaucautaka.
15Sa tu na koula, kei na rupi e vuqa;
Ia sa ka talei duaduaga na tebenigusu vuku.
16Mo kauta na nonai sulu sa ia na veiyalayalati e na vuku ni kai tani:
Ka mo kauta na nonai vakadinadina e na vukuna na yalewa tani.
17Sa kamikamica vua na tamata na kakana ni lasu;
Ia emuri ena sinai na gusuna e na laqere.
18A ka e nakiti sa vakataudeitaki e na bose:
Ia ni sa lewai vinaka mada, mo qai ia nai valu.
19O koya sa lako voli ka daukakase sa tukuna na ka e tabu ni tukuni:
Ia mo kakua kina ni veiriti kaya sa vosaveicavilaki.
20O koya sa rukaki tamana se tinana,
Ena bokoci na nona cina me butobuto loaloa sara.
21Ai yau sa na taukeni vakusarawa beka e nai vakatekivu;
Ia na kenai otioti ena sega ni kalougata.
22Mo kakua ni kaya, Au na sauma na ca;
Mo waraki Jiova ga, ka na vakabulai iko.
23A ka ca sara vei Jiova nai vakabibi lasu:
Ia nai vakarau ni bibi lasu sa sega ni vinaka.
24Sa vu maivei Jiova na nonai lakolako na tamata;
Ia mo qai kila vakaevei na tamata na nona sala?
25Sa tacori na tamata ni sa kania na ka tabu,
Ni bubului oti, ka qai taroga emuri.
26A tui vuku sa vakasevi ira na tamata ca,
Ka butuki ira e ruku ni yava ni qiqi ni sila.
27Na yalo ni tamata sa cina i Jiova,
Sa cinava na tikina kece e lomana.
28A yalololoma kei na yalodina nai vakabula ni tui:
Ia nai tutu ni nonai tikotiko vakaturaga na yalololoma.
29Sa nodra ka ni lagilagi na cauravou ni ra sa kaukauwa:
Kei na nodra i ukuuku na qase na ulu sika.
30A vue e loaloa nai sava ni ca,
Ia na kuita sa kenai sava ni loma ni tamata.
Currently Selected:
NA VOSA VAKAIBALEBALE 20: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
