NA TIKO MAI NA LEKUTU 4
4
A nodra yabaki na Livai me ra qarava kina na vale i sulu ni veitavaki, 1-3. A nodra i kaukau na luve i Koaca, 4-15. Ai tavi i Eliesa, 16. A nodra i kaukau na luve i Kerisoni, 21-28. A nodra i kaukau na luve i Mirari, 29-33. A kedrai wiliwili na luve i Koaca, 34-37; kei na luve i Kerisoni, 38-41; kei na luve i Mirari, 42-49.
1A sa vosa vei Mosese kei Eroni ko Jiova, ka kaya, 2Mo drau wilika na luve i Koaca maivei ira na Livai, e na nodra veimataqali, me vaka na veivuvale ni nodra qase, 3ko ira era sa yabaki tolusagavulu, ka toro cake me yacovi ira sa yabaki limasagavulu, o ira kece era sa yaga e na cakacaka ni vale ni veitavaki.
4Oqo na nodra i tavi na luve i Koaca e na vale ni veitavaki: na ka tabu sara. 5Ia ni sa vakarau lako nai vavakoso, me qai curu ko Eroni kei na luvena, ka luvata nai sogo, ka ubia kina na kato ni vunau: 6ka tevuka ki delana na kuli ni babale sai ubi e cake, ka me dua nai ubi pelu taucoko me kenai ubi, ka daramaka na kenai vua. 7Ia me ra tevuka e dua nai ubi pelu ki dela ni tepeli ni madrai dauraici, ka viritu kina na kena dari, kei nai taki, kei na sedre, kei na bilo me kenai livilivi: ia na madrai dauraici me sa tutu ga kina: 8me ra qai tevuka e cake e dua nai ubi kulakula, ka ubia talega e na kuli ni babale, ka daramaka kina na kenai vua. 9Me ra qai kauta e dua nai ubi pelu, ka ubia nai tutu-ni-cina, kei na kena veicina, kei nai koti-ni-cina, kei na dari ni de-ni-cina, kei na kena bilo kecega ni waiwai, era kitaka kina na kena cakacaka: 10ia me ra qai solega vata kei na kenai yaya kecega ki na dua nai sole kuli ni babale, ka savenaka ki nai vua. 11Ia me ra tevuka e dua nai ubi pelu ki dela ni cabocabo sa koula, ka ubia e nai ubi kuli ni babale, ka daramaka na kenai vua: 12me ra qai kauta nai yaya kecega ni cakacaka era cakacaka kina e na vale tabu, ka viria ki na dua nai sole pelu, ka ubia e nai ubi kuli ni babale, ka savenaka ki nai vua. 13Me ra qai kauta tani na dravusa mai nai cabocabo-ni-soro, ka tevuka kina nai ubi lokaloka: 14ia me ra viritu kina na kenai yaya kecega, era dauqarava kina, io na dari ni de-ni-buka, na qila ni lewe ni manumanu, kei nai sivi, kei na peseni, nai yaya kecega ni cabocabo-ni-soro; me ra qai ubia kece e na dua nai ubi kuli ni babale, ka daramaka na kenai vua. 15Ia ni ratou sa ubia oti na vale tabu, kei nai yaya kecega ni vale tabu, ko Eroni kei na luvena ni sa vakarau lako nai vavakoso; me ra qai toro mai na luve i Koaca me ra colata yani: ia me ra kakua ni tara e dua na ka tabu, de ra mate. Oqo na nodra i colacola na luve i Koaca mai na vale ni veitavaki.
16Ia nai tavi i Eliesa, na luve i Eroni na bete, na waiwai ni cina, kei na kau boi vinaka me vakamai, kei nai madrali laukana sa caka tikoga, kei na waiwai mei lumu, me vakaraica talega na vale ni kalou taucoko, kei na ka kecega sa tu kina, e na vale tabu, kei na kenai yaya.
17A sa vosa vei Mosese kei Eroni ko Jiova, ka kaya, 18Drau kakua ni muduka tani na veimataqali ni nodra veivuvale na luve i Koaca maivei ira na Livai: 19ia drau kitaka vakaoqo vei ira, me ra bula ga, me ra kakua ni mate, ni ra sa torova na ka tabu sara: Me curu mada ko Eroni kei rau na luvena, ka lesia na nodra i tavi yadua kei na nodra i kaukau: 20ia me ra kakua sara ni curu kina me raica ni sa ubi tiko na ka tabu, de ra mate.
21A sa vosa vei Mosese ko Jiova, ka kaya, 22Mo wilika talega na luve i Kerisoni, me vakaveivuvale ni nodra qase, ka vakamataqali; 23ko ira sa tolusagavulu na nodra yabaki ka levu cake, ka yacovi ira sa limasagavulu na nodra yabaki, mo wiliki ira; ko ira kece sa yaga e na cakacaka e na vale ni veitavaki. 24Oqo na nodra i tavi na nodra veimataqali na luve i Kerisoni, me ra veiqaravi, ka me ra colacola: 25ia era na colata nai sulu ni vale ni kalou, kei na vale ni veitavaki, na kenai ubi, kei na kuli ni babale sai ubi e cake kei nai sogo ni vale ni veitavaki, 26kei nai sulu sa bai ni rara, kei nai sogo ni katuba ni rara sa vakabai, ko ya sa volita na vale ni Kalou kei nai cabocabo-ni-soro, kei na kedra dali, kei nai yaya kecega sa caka kina na nodra cakacaka, kei na ka kecega sa caka kina, me nodra i tavi. 27Me lewa ko Eroni kei rau na luvena na nodra i tavi kecega na luve i Kerisoni, e na nodra i colacola kecega, kei na nodra cakacaka kecega: ia dou lewa vei ira na nodra i colacola kecega me ra qarava. 28Oqo na nodra i tavi na nodra veimataqali na luve i Kerisoni e na vale ni veitavaki; ia me lewa na nodra cakacaka ko Icama na luve i Eroni na bete.
29Ko ira na luve i Mirari, mo wiliki ira vakamataqali, ka vakaveivuvale ni nodra qase: 30ko ira sa yabaki tolusagavulu ka toro cake, ka yacovi ira sa yabaki limasagavulu, mo wiliki ira, ko ira kecega sa vakaitavi e na cakacaka ni vale ni veitavaki. 31Ia oqo sa nodra i tavi, e na cakacaka kecega e na vale ni veitavaki: me ra colata na papa ni vale ni Kalou, kei na kenai kolokolo, kei na kena duru, kei na kena qara, 32kei na duru ni bai sa volia na rara, kei na kedra qara, kei na kedrai vakadei, kei na kedra dali, kei na kedrai yaya kecega, kei na kedrai valavala kecega: ia dou cavuta na yaca ni yaya sa nodra i tavi me ra colata. 33Oqo na nodra i tavi na nodra veimataqali na luve i Mirari, io na nodra i tavi kecega e na vale ni veitavaki, ka me lewa ko Icama na luve i Eroni na bete.
34Ia ko Mosese kei Eroni kei ira na turaga ni soqosoqo, era sa wiliki ira na tagane maivei ira na luve i Koaca vakamataqali, ka vakaveivuvale ni nodra qase, 35O ira sa yabaki tolusagavulu ka toro cake, ka yacovi ira sa yabaki limasagavulu, o ira kecega sa yaga e na cakacaka, ki na vale ni veitavaki: 36ia ko ira sa wili vei ira, e na nodra veimataqali, era sa le rua na udolu ka vitu na drau ka limasagavulu. 37O ira oqo sa wili e na nodra veimataqali na luve i Koaca, ko ira kecega sa cakacaka e na vale ni veitavaki, o ira sa wilika ko Mosese kei Eroni me vaka na vosa i Jiova vei Mosese.
38Ia ko ira sa wili vei ira na luve i Kerisoni, vakamataqali, ka vakaveivuvale ni nodra qase, 39ko ira sa yabaki tolusagavulu ka toro cake, ka yacovi ira sa yabaki limasagavulu, ko ira kecega sa yaga e na cakacaka, ki na vale ni veitavaki, 40io ko ira sa wili vei ira, e na nodra veimataqali, ka vakaveivuvale ni nodra qase, era sa le rua na udolu ka ono na drau ka tolusagavulu. 41O ira oqo sa wili e na nodra veimataqali na luve i Kerisoni, ko ira kecega sa cakacaka e na vale ni veitavaki, o ira sa wilika ko Mosese kei Eroni me vaka nai vakaro i Jiova.
42Ia ko ira sa wili vei ira na nodra veimataqali na luve i Mirari, vakamataqali, ka vakaveivuvale ni nodra qase, 43ko ira sa yabaki tolusagavulu se toro cake, ka yacovi ira sa yabaki limasagavulu, ko ira kecega sa yaga e na cakacaka, ki na vale ni veitavaki, 44io ko ira sa wili vei ira e na nodra veimataqali, era sa le tolu na udolu ka rua na drau. 45O ira oqo sa wili e na nodra veimataqali na luve i Mirari, ko ira sa wilika ko Mosese kei Eroni me vaka na vosa i Jiova e na gusu i Mosese.
46Ko ira kecega sa wili vei ira na Livai, ko ira sa wilika ko Mosese kei Eroni kei ira na turaga ni Isireli, e na nodra veimataqali, ka vakaveivuvale ni nodra qase, 47ko ira sa yabaki tolusagavulu se toro cake, ka yacovi ira sa yabaki limasagavulu, ko ira kecega sa la'ki qarava na cakacaka, ka qarava na colacola, e na vale ni veitavaki, 48io ko ira sa wili vei ira, era sa le walu na udolu ka lima na drau ka walusagavulu. 49Era sa wili ni sa lewa ko Mosese, me vaka na vosa i Jiova, ko ira yadua me vaka na nona cakacaka, kei na nonai colacola: ia sa wiliki ira vakaoqo ko Mosese, me vaka nai vakaro i Jiova vei Mosese.
Currently Selected:
NA TIKO MAI NA LEKUTU 4: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific