NA TIKO MAI NA LEKUTU 3
3
O iratou na luve i Eroni, 1-4. Sa lesi na luve i Livai me ra qaravi Eroni kei ira na luvena, 5-13. Era sa wili na luve i Livai, 14-20. A kedrai wiliwili, kei na nodra i tavi, na luve i Kerisoni, 21-26. Kei na luve i Koaca, 27-32. Kei na luve i Mirari, 33-37. A tikina, kei nai tavi, i Mosese kei Eroni, 38. Erai sosomi ni ulumatua na luve i Livai, 40-43. Sa wili ko ira na kena vo, 44-51.
1Ko ira oqo nai tubutubu i Eroni kei Mosese, e na siga ka vosa kina vei Mosese ko Jiova mai na ulu-ni-vanua ko Saineai. 2Ia oqo na yacadratou na luve i Eroni; ko Netapi na ulumatua, kei Epaiu, ko Eliesa, kei Icama. 3Oqo na yacadratou na luve i Eroni, eratou sa lumuti me bete, ko iratou ka vakatabui me ratou bete.
4Ia ko Netapi kei Epaiu, erau a mate e na mata i Jiova, ni rau a cabora na bukawaqa tani e na mata i Jiova, mai na lekutu loaloa mai Saineai; a sa sega na luvedrau: ia ko Eliesa kei Icama erau a cakacaka vakabete e na mata i Eroni na tamadrau.
5A sa vosa vei Mosese ko Jiova, ka kaya, 6Mo kauta mai na mataqali i Livai, ka vakatura e na mata i Eroni na bete, me ra qaravi koya. 7Ka me ra qarava na nona cakacaka, kei na cakacaka ni soqosoqo taucoko, e na mata ni vale ni veitavaki, me ra kitaka na cakacaka ni vale ni Kalou. 8Ia me ra maroroya nai yaya kecega ni vale ni veitavaki, kei na cakacaka ni Isireli, me kitaka na cakacaka ni vale ni Kalou. 9Ia mo soli ira na Livai kivei Eroni kei rau na luvena: era sa soli sara vua, maivei ira na Isireli. 10Ia mo lesi Eroni kei rau na luvena, me ratou qarauna na nodratou cakacaka vakabete: ia na tamata tani sa toro kina me sa vakamatei.
11A sa vosa vei Mosese ko Jiova, ka kaya, 12Ia koi au, raica, au sa kauti ira na Livai maivei ira na Isireli, mei sosomi kei na ulumatua kece sa sucu eliu vei ira na Isireli: era na qai noqu na Livai; 13ni sa noqu ko ira kece na ulumatua: au a vakatabuya me noqu na ulumatua kecega nei Isireli, na tamata kei na manumanu, e na siga ka'u a yavita kina na ulumatua kecega mai na vanua ko Ijipita: era sa noqu ga: Koi au ko Jiova.
14A sa vosa vei Mosese ko Jiova mai na lekutu loaloa mai Saineai, ka kaya, 15Mo wiliki ira na Livai, me vaka na veivuvale ni nodra qase, e na nodra veimataqali: a tagane kecega sa vula dua ka toro cake mo wilika. 16A sa wiliki ira ko Mosese, me vaka na vosa i Jiova, me vaka sa vakaroti ko koya. 17Ia ko iratou oqo na luve i Livai vaka na yacadratou; ko Kerisoni, kei Koaca, kei Mirari. 18Ia oqo na yacadrau na luve i Kerisoni e na nodrau mataqali; ko Lipini, kei Semeai. 19Kei na luve i Koaca e na nodratou veimataqali; ko Amirami, kei Isiari, ko Epironi, kei Usieli. 20Kei na luve i Mirari e na nodrau mataqali; ko Mali, kei Musi. O ira oqo na nodra veimataqali na Livai vaka na veivuvale ni nodra qase.
21Sa tubu maivei Kerisoni na nodra mataqali na luve i Lipini, kei na nodra mataqali na luve i Semeai: oi rau oqo na nodrau mataqali na luve i Kerisoni. 22O ira sa wili maivei ira, e na kedrai wiliwili na tagane kecega, o ira sa vula dua ka levu cake, io ko ira sa wili maivei ira, era sa le vitu na udolu ka lima na drau. 23A nodra mataqali na luve i Kerisoni era na tiko vaka ki ra, e taudaku ni vale ni Kalou. 24Ia na turaga ni vale ni nodra qase na luve i Kerisoni ko Eliasafi na luve i Laeli. 25Ia na nodra i tavi na luve i Kerisoni e na vale ni veitavaki na vale ni Kalou, na vale tabu kei nai ubi, kei nai ubi e cake, kei nai sogo ni vale ni veitavaki, 26kei nai sulu sa kena bai ni rara, kei nai sogo ni rara sa vakabai, ko ya sa volita na vale ni Kalou kei nai cabocabo-ni-soro, kei na kena dali kecega sa yaga kina.
27Ia sa tubu maivei Koaca na nodra mataqali na luve i Amirami, kei na nodra mataqali na luve i Isiari, kei na nodra mataqali na luve i Epironi, kei na nodra mataqali na luve i Usieli: o ira oqo na veimataqali ni luve i Koaca. 28Na kedrai wiliwili na tagane kecega, era vula dua ka toro cake, era walu na udolu ka ono na drau, era qarava tiko na vale tabu. 29Na nodra veimataqali na luve i Koaca, me ra tiko mai na yasa ni vale ni Kalou sa donuya na ceva. 30Ia na turaga ni vale ni nodra qase na veimataqali ni luve i Koaca, ko Elisafani na luve i Usieli. 31Ia sa nodra i tavi na kato ni vunau, kei na tepeli, kei nai tutu-ni-cina, kei nai cabocabo ruarua, kei nai yaya ni vale tabu era dauia kina na cakacaka, kei na kenai sogo, kei na kenai valavala kecega. 32Ia ko Eliesa na luve i Eroni na bete ena turaga vei ira na nodra turaga na Livai, me vakaraici ira era qarava tiko na vale tabu.
33Sa tubu maivei Mirari na nodra mataqali na luve i Mali, kei na nodra mataqali na luve i Musi: oi rau oqo na mataqali i Mirari. 34Ia ko ira sa wili maivei ira, ko ya na kedrai wiliwili na tagane kecega, era vula dua ka toro cake, era le ono na udolu ka rua na drau. 35Ia na turaga ni vale ni nodra qase na mataqali i Mirari ko Surieli na luve i Epaieli: o ira oqo era na tiko mai na yasa ni vale ni Kalou sa donuya na tokalau. 36Ia na cakacaka era qarava na luve i Mirari, na papa ni vale ni Kalou, kei na kenai kolokolo, kei na kena duru, kei na kena qara, kei na kenai yaya kecega, kei na ka kecega sa yaga kina, 37kei na duru sa volita na rara sa vakabai, kei na kedra qara, kei na kedrai vakadei, kei na kedra dali.
38Ia ko ira era tiko ki na mata ni vale ni Kalou vaka ki na tu-i-cake, io ki na mata ni vale ni veitavaki vaka ki na isiti, ko Mosese, kei Eroni kei rau na luvena, me qarava tiko na cakacaka ni vale tabu, e na vukudra na Isireli; ia na tamata tani sa toro kina ena vakamatei.
39O ira kecega na Livai sa wili, erau a wilika ko Mosese kei Eroni me vaka sa vakarota ko Jiova, e na nodra veimataqali, na tagane kecega sa vula dua ka toro cake, era sa ruasagavulu ka rua na udolu.
40A sa kaya vei Mosese ko Jiova, Mo wilika na ulumatua kecega ni Isireli era tagane, era vula dua ka toro cake, ka wilika na yacadra. 41Ia mo kauti ira na Livai me noqu (koi au ko Jiova) me kedrai sosomi na ulumatua kece vei ira na Isireli; kei na nodra manumanu na Livai, mei sosomi kei na ulumatua kece ni nodra manumanu na Isireli. 42A sa wilika na ulumatua kecega vei ira na Isireli ko Mosese, me vaka ka vakarota vua ko Jiova. 43Ia ko ira kecega na ulumatua era tagane, na sa wili na yacadra, o ira era vula dua ka toro cake, ko ira sa wili vei ira, era le ruasagavulu ka rua na udolu ka rua na drau ka vitusagavulu ka tolu.
44A sa vosa vei Mosese ko Jiova, ka kaya, 45Mo kauti ira na Livai mei sosomi kei na ulumatua vei ira na Isireli, kei na nodra manumanu na Livai mei sosomi kei na nodra manumanu: a ra na noqu na Livai: koi au ko Jiova. 46Ia e na vukudra era na voli, ko ira na lewe rua na drau ka vitusagavulu ka tolu maivei ira na nodra ulumatua na Isireli, era sa sivia na kedrai wiliwili na Livai; 47mo kauta maivei ira yadua e lima na sikeli; me vaka na sikeli ni vale tabu mo kauta: (e dua na sikeli sa tautauvata kei na kera e ruasagavulu:) 48ia nai lavo ko ya, sa ra voli kina ko ira sa sivia na kenai wiliwili, mo solia vei Eroni kei rau na luvena. 49A sa kauta ko Mosese nai lavo sa voli kina ko ira sa sivia na kedrai wiliwili era sa volia na Livai: 50sa taura ko koya nai lavo maivei ira na nodra ulumatua na Isireli; sa dua na udolu ka tolu na drau ka onosagavulu ka lima na sikeli, me vaka na sikeli ni vale tabu: 51ia nai lavo era sa voli kina sa solia ko Mosese kivei Eroni kei rau na luvena, me vaka na vosa i Jiova, me vaka ka vakarota vei Mosese ko Jiova.
Currently Selected:
NA TIKO MAI NA LEKUTU 3: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific