NEUMI 3
3
Sa rusa vakaca sara ko Ninive.
1Ena ca na koro dauvakadave dra! na koro ka sinai sara e na veivakaisini, kei nai valavala vakasausa; sa sega ni mudu na daukovekove; 2a rorogo ni kuita, kei na vadugu ni yava ni qiqi-ni-valu, kei na ose e butubutu, kei na qiqi-ni-valu e ladelade tiko; 3na tamata e vodo ose tiko, kei nai seleiwau e makualiliva, kei na moto e veitibiyaki, kei na kedra lewe vuqa era vuetaki; ka dua nai binibini era moku mate; ia sa sega ni wili rawa na mate; era tarabe tu e na yagodra: 4ni sa ka levu na nona dautagane na yalewa matavinaka sa dautagane, na marama daucaka-mana lasu, ka dauvolitaka na veimatanitu e na nona dautagane, kei na veimataqali e na nona caka mana lasu. 5Raica, koi au ka'u sa nomu meca, sa kaya ko Jiova ni lewe vuqa; ia ka'u na cega cake na nomu i sulu ki matamu, ka vakaraitaka na nomu luvawale ki na veivanua, kei na nomu veivakamaduataki ki na veimatanitu. 6Ia ka'u na viritaka vei iko na ka vakasisila, ka cakava mo vakasisilataki, ka vakasesevotuni iko. 7Ia ko ira kece era raici iko era na drotaki iko, ka kaya, Sa rusa ko Ninive: ko cei me na tagicaki iko? me'u qarai ira maivei era na mai vakacegui iko?
8Sa vinaka li ko iko ka ca ko Noamoni, o koya ka koto e na maliwa ni veiuciwai, a wai ga ka volita, a nonai keli na uciwai, ka sa kena bai na wai? 9Ko Iciopea, kei Ijipita sa nona kaukauwa, ka sega ni wili rawa; ko Futi kei na kai Lupime era nomu i to. 10Ia sa vakabobulataki ga ko koya, sa lako tani vakabobula; a luvena lalai talega sa ra botobotolaki e na mua ni sala ni koro kecega: ia na nona tamata rogo sa ra vakawiri madigi kina, kei ira kece na nona tamata turaga sa ra vesuki e na sinucodo.
11O iko talega ko na mateni, ko na vunitaki; ko iko talega ko na qara e dua nai drodro mai na meca. 12A nomu koro ni valu kecega ena vaka na vu ni lolo sa vuavuai taumada: ke sa kurei, sa na lutu sara ki gusu i koya sa viakania. 13Raica, ko ira na nomu tamata e na nomu vanua sa ra yalewa ga, ena dolavi sara na matamata-ni-koro ni nomu vanua vei ira na nomu meca; ena kania na nomu bai na bukawaqa.
14Mo la'ki takiva na memu wai, me ganita ni sa buku na druadrua ni koro; vakaukauwataka na nomu bai ni valu: lako ki na tete, ka butuka na qele dregadregata, gumatuataka na lovo ni vatu-buli. 15Ia na bukawaqa maikea ena kati iko ena muduki iko tani nai seleiwau, ena kani iko sara me vaka na vodre dramidrami: dou lewe vuqa mai me vaka na vodre dramidrami, dou lewe vuqa mai me vaka na vodre. 16O sa vakalewevuqataki ira na nomu dauveivoli me ra lewe vuqa cake ka lailai na kalokalo ni lomalagi: na vodre dramidrami sa kabuacara mai, sa ra kaboasese tale. 17A nomu turaga era sa vaka na vodre, kei ira na nomu kapiteni era sa vaka na qele ni vodre lelevu, e tiko e na bai bula e na siga liliwa: ni sa cadra mai na mata-ni-siga sa qai dro, ka sa sega ni kilai na yasana sa tiko kina. 18Sa ra moce na nomu i vakatawa, na tui Asiria: sa ra koto sobu na nomu tamata qaqa: sa ra dui vakasevi ko ira na nomu tamata ki na veiulu-ni-vanua, ka sa sega e dua me vakasoqoni tale rawa. 19Sa sega ni malumu rawa na nomu ramusu; sa ka rarawa na nomu vue: o ira kece era rogoca na kemui rogorogo era na cobo e na vukumu: ni ko cei li ka sega ni yaco tiko kina na nomu ca?
Currently Selected:
NEUMI 3: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific