MAIKA 6
6
A Kalou, ni sa lewai ira na Juta ni ra cala, sa tukuna vei ira na cakacaka sa vinaka vua, 1-8. Sa vunauci ira e na vuku ni nodra i valavala sa sega ni dodonu, 9-12, kei na nodra dauqarava na kalou lasu, 13-16.
1Dou rogoca mada na ka sa kaya ko Jiova, Tu cake mada, mo ia na veilewai e matadra na veiulu-ni-vanua, me ra rogoca talega na domomu na veiulu-ni-koro.
2Dou rogoca, na veiulu-ni-vanua, na ka e veiletitaka ko Jiova, oi kemudou talega, na yavu kaukauwa kei vuravura: ni sa dua na ka e veiletitaka ko Jiova kei ira na nona tamata, io, ena ia na veilewai ko koya kei ira na Isireli. 3A cava ka'u sa cakava vei iko na noqu tamata? ia a cava ka'u sa vakaocataki iko kina? tukuni au mai. 4Ni'u a kauti iko cake mai na vanua ko Ijipita, ka'u a vakabulai iko mai na vale ni bobula; ka talai iratou ko Mosese, kei Eroni, kei Miriama, me liutaki iko. 5Kemudou na noqu tamata, dou vakananuma mada na ka sa kerea ko Pelaki na tui Moapi, kei na ka sa kaya vua ko Pelami na luve i Piori; kei na ka mai Sitimi ka yaco sara ki Kilikali; mo dou kila kina nai valavala dodonu i Jiova. 6Ai soro cava me'u toro rawa kina vei Jiova? ka cuva kina e na matai koya na Kalou cecere? me'u torovi koya kei nai soro kama, e na luve ni pulumokau eso e yabaki yadua? 7Ena vinakata beka ko Jiova me vakaudolu na sipi tagane, se me vakaoba na uciwai waiwai? me'u vakacabora beka na noqu ulumatua mei soro ni noqu talaidredre, na vua ni yagoqu mei bulubulu ni valavala ca ni yaloqu? 8Sa vakatakila oti vei iko, na tamata, na ka e vinaka: ia ka cava tale sa taroga maivei iko ko Jiova, mo caka dodonu ga, ka mo vinakata na yalololoma, ka mo yalomalumalumu talega ni drau lako vata kaya na nomu Kalou?
9Sa kaci ki na koro ko Jiova, ia ko koya sa vuku ena kila na yacamuni; dou nanuma na kuita, kei koya sa lesia. 10Sa tiko li e nona vale na tamata ca, nai yau ni ca, kei nai vakarau lasu ko ya ka ka vakasisila? 11Me'u sa tamata dodonu li ni sa tiko vei au nai vakarau ni bibi sa sega ni dodonu, kei na taga vatu lasu? 12O ira na tamata vutuniyau era sa vutu ni valavala kaukauwa, ko ira talega na lewena era sa vosa lasu, io, na yamedra talega e gusudra sa dauveivakaisini.
13Io koi au, ka'u na yaviti iko vakararawa sara, ka vakalalataki iko e na vuku ni nomu i valavala ca. 14O iko, ko na kana, ka sega ni mamau; ni na bibi na lomamu; ko na toki, ka sega ni drotaka rawa; ia na ka ko sa drotaka ka'u na solia ki nai seleiwau. 15Ko na kaburaka na sila, ka sega ni tamusuka; ko na butuka na olive, ia ko na sega ni lumuti iko e na kena waiwai; kei na vua ni vaini, ia ko na sega ni gunuva na kena waini. 16Ni sa dauvakabau na ka sa lesia ko Omirai, kei nai valavala kecega ni mataqali i Eapi, dou sa muria talega na nodra i vakavuvuli; me'u kitaki kemudou kina mo dou lala sara, ka mo dou vakasiusiutaki: ia na kedrai rogorogo ca na noqu tamata ena baleti kemudou.
Currently Selected:
MAIKA 6: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
