MACIU 4
4
Sa dauveretaki Jisu na tevoro, 111. Sa laki tiko ki Kapenaumi ko Jisu, 1216. Sa dauvunau ko Jisu; a sa kacivi Pita, kei Adriu, kei Jemesa, kei Joni, me ratou nonai talatala, 1722. Sa veilakoyaki ko Jisu me vunau ka vakabulai ira na mate, 2325.
1Sa qai kauti Jisu cake na Yalo Tabu ki na veikau, me dauveretaki koya na tevoro.
2Ia ni sa lolo ko koya e na siga e vasagavulu kei na bogi e vasagavulu, sa qai viakana. 3A sa lako mai vei koya na dauvere, ka kaya, Kevaka ko sa Luve ni Kalou, mo kaya mada me vuki mei buli madrai na veivatu oqo. 4A sa vosa ko koya, ka kaya, Sa volai, Ena sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.
5Sa qai kauti koya na tevoro ki na koro tabu, ka vakatikori koya ki dela ni vale ni soro, 6a sa kaya vua, Kevaka ko sa Luve ni Kalou, mo rika sobu: ni sa volai,
Ena vakaroti ira na nona agilose ko koya e na vukumu:
Ia era na keveti iko e na ligadra,
De dua na siga sa tavutu kina na yavamu ki na vatu.
7Sa kaya vua ko Jisu, Sa volai talega, Mo kakua ni vakatovolei Jiova na nomu Kalou.
8Sa kauti koya tale na tevoro ki na dua na ulu-ni-vanua cecere sara, a sa vakaraitaka vei koya na matanitu kecega e vuravura, kei na kedrai ukuuku; 9a sa kaya vua, A ka kecega oqori kau na solia vei iko, kevaka ko na cuva sobu ka vakarokoroko vei au. 10Sa qai kaya vua ko Jisu, Mo lako tani, Setani, ni sa volai, Mo vakarokoroko vei Jiova na nomu Kalou, ia mo qaravi koya duaduaga.
11Sa qai biuti koya na tevoro, ka raica, sa lako mai eso na agilose ka qaravi koya.
12Ia ni sa rogoca ko Jisu sa biu ki na vale ni veivesu ko Joni, sa lako tale ki Kalili; 13a sa biuti Nasareci, ka sa laki tiko vakadua ki Kapenaumi, o koya sa tu e na baravi, e nai yalayala kei Sepuloni kei Nafitalai: 14me vakayacori kina na vosa sa tukuna ko Aisea na parofita, ka kaya,
15A vanua ko Sepuloni, kei na vanua ko Nafitalai,
E na yasayasa ni wai, e na tai kadua ni Joritani, ko Kalili ni veimatanitu tani,
16Ko ira na tamata ka tiko e na butobuto,
Era sa raica na rarama levu;
Ia vei ira ka tiko e na vanua ni mate kei na kena yaloyalo
Sa cabe cake na rarama.
17Mai na gauna ko ya sa vakatekivu kina ko Jisu me dauvunau, ka kaya, Dou veivutuni! ni sa voleka na matanitu vakalomalagi.
18A sa lako voli ko Jisu e na baravi mai Kalili, a sa raica e le rua erau veitacini, ko Saimoni sa vakatokai ko Pita, kei Adriu na tacina, erau sa viritaka na lawa ki wai: ni rau sa gonedau. 19A sa kaya vei rau ko koya, Drau muri au mai, kau na qisi kemudrau mo drau gonedau ni tamata. 20A rau sa biuta sara tu na nodrau lawa, ka muri koya 21A sa lako tani maikea ko koya vaka ki liu, a sa raica e le rua tale erau veitacini, ko Jemesa na luve i Sepete, kei Joni na tacina, eratou sa toka vata kei Sepete na tamadrau mai waqa, a rau sa oneva na nodratou lawa; a sa kacivi rau ko koya. 22A rau sa biuta sara tu na waqa kei na tamadrau, ka muri koya.
23A sa veilakoyaki voli e Kalili taucoko ko Jisu, a sa vakatavuvuli e na nodra veivale ni lotu, a sa vunautaka nai tukutuku-vinaka ni matanitu, a sa vakabulai ira na tamata mai na mate kecega, kei na malumalumu kecega. 24A sa rogovaki yani na kenai rogorogo ki Siria taucoko: a sa kau vua ko ira kecega sa tauvi-mate, era sa tauvi e na mate tani eso kei na yaluma, kei ira sa curumi ira na tevoro, kei ira sa tauvi-lialia, kei ira sa tauvi-paralasi; a sa vakabulai ira ko koya. 25A ra sa lewe vuqa sara sa muri koya mai Kalili, kei Tikapoli, kei Jerusalemi, kei Jutia, kei na tai kadua ni Joritani.
Currently Selected:
MACIU 4: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
