MACIU 3
3
Sa dauvunau mai Jutia ko Joni na dauveipapitaiso, a sa papitaisotaki ira na lewe vuqa, 112. Sa papitaisotaki Jisu ko koya, 1317.
1Ia e na gauna ko ya sa lako mai ko Joni na dauveipapitaiso, ka dauvunau e loma ni vanua mai Jutia, 2ka kaya, Dou veivutuni! ni sa voleka na matanitu vakalomalagi. 3O koya oqo sa vosa kina ko Aisea na parofita, ka kaya,
A domona e dua sa kacikaci e loma ni vanua,
Dou caramaka na sala i Jiova,
Cakava me dodonu na nona salatu.
4Ia ko Joni oqo sa vakaisulu e nai sulu vuti ni kameli, ka vau na tolona e na wa kuli-ni-manumanu; ka sa kena kakana na vodre kei na oni ni veikau.
5A sa lako mai vua ko ira mai Jerusalemi, kei Jutia taucoko, kei na yasana taucoko sa voleka ki na Joritani, 6a sa papitaisotaki ira ko koya e na Joritani, ni ra sa vakatusa tiko na nodra i valavala ca.
7Ia ni sa raica ko koya era sa lewe vuqa na Farisi kei nai tokani i Setoki, era sa lako mai ki na nona papitaiso, sa kaya vei ira, Oi kemudou na kawa ni gata, ko cei sa vakasalataki kemudou mo dou dro tani mai na cudru sa lako tiko mai? 8o koya mo dou vuataka na vua e kilikili kei na veivutuni: 9ia dou kakua ni nanuma mo dou kaya e na lomamudou, A tama i keimami ko Eparaama: niu sa kaya vei kemudou, e rawarawa vua na Kalou me vakatubura na veivatu oqo me ra luve i Eparaama. 10Ia na matau sa no edaidai e na vu ni kau; ka sa ta laivi kina na kau kecega sa sega ni vuataka na vua vinaka, a sa biu ki na bukawaqa. 11E dina kau sa papitaisotaki kemudou e na wai ni dou sa qai veivutuni: ia ko koya ena muri au mai sa levu cake vei keirau, ia na nonai vava kau sa sega ni yaga meu kauta: ena papitaisotaki kemudou ko koya e na Yalo Tabu kei na bukawaqa: 12a sa tu e ligana na nonai sivi ni sila, ka na vakasavasavataka sara ko koya na sila ni nona rara, ka binia vata na nona sila ki na lololo; ka na vakama ko koya na qana e na bukawaqa e sega ni bokoci rawa.
13Sa qai lako mai Kalili ko Jisu ki na Joritani vei Joni, me papitaisotaki vua. 14A sa via tarova ko Joni, ka kaya, Sa yaga vei au mo ni papitaisotaki au, ia koi kemuni o ni sa lako li mai vei au? 15A sa vosa ko Jisu, ka kaya vua, Mo vosota mada edaidai; ni sa kilikili kei keda me da vakabauta vakaoqo nai valavala dodonu kecega. Sa qai vosota ko koya. 16Ia ko Jisu, ni sa papitaisotaki oti, sa cabe sara mai na wai: ka raica, sa qai wase rua vua na lomalagi, a sa raica ko koya na Yalo ni Kalou ni sa lako sobu mai me vaka na ruve, ka sa mai ro toka vua: 17ka raica, sa dua na domo mai lomalagi, sa kaya, O koya oqo na noqu Gone ni toko, au sa dauvinakata vakalevu.
Currently Selected:
MACIU 3: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific