JOSUA 5
5
Sa rere ko ira na kai Kenani, 1. Sa ia tale na veicilivi, 2-9. Sa ia na kana vata ni lako-sivia, 10. Sa cegu ni tau na mana, 11,12. Sa rairai vei Josua na Turaga ni valu i Jiova, 13-15.
1Ia ko ira kecega na nodra tui na Amoraiti sa tiko e na tai ni Joritani vaka ki ra, kei ira kece na nodra tui na kai Kenani sa tiko voleka ki na waitui, ni ra sa rogoca sa vakadiva ko Jiova na wai ni Joritani e matadra na Isireli, me keimami lako mada ki tai kadua, sa qai waicala na yalodra, ka sa yali na nodra lomadei, e na vuku i keimami na Isireli.
2E na gauna ko ya sa kaya kivei Josua ko Jiova, Mo cakava eso nai sele vatu, ka cilivi ira tale na Isireli. 3A sa cakava ko Josua eso nai sele vatu, ka cilivi ira na Isireli mai Kipa-araloci. 4Ia sa vakaoqo na ka sa kitaka kina na veicili ko Josua: Ko ira kece na tagane ka lako tani mai Ijipita, ka ra yaga e nai valu, era mate mai na vanua liwa e na sala ni ra lako tani mai Ijipita: 5Ia ko ira kecega na tamata ka lako yani, era sa cilivi oti: ia ko ira kecega na tamata ka sucu mai na vanua liwa e na sala ni ra sa lako tani mai Ijipita, era sega ni cilivi. 6Ni sa yabaki vasagavulu na nodra lako voli na Isireli mai na vanua liwa, a ra mate kece mada na tamata era sa tamata i valu ka lako tani mai Ijipita, ni ra sa sega ni vakarorogo ki na vosa i Jiova: ia sa bubului kina vei ira ko Jiova me ra kakua sara ni raica na vanua, ka bubului kina ko Jiova vei ira na nodra qase me solia vei keda, e dua na vanua sa dave kina na oni kei na wai-ni-sucu. 7Ia sa vakatuburi ira na luvedra ko koya me kedrai sosomi, ko ira oqo sa ciliva ko Josua; ni ra sa sega ni cili, era sa sega ni cilivi ira e na gaunisala. 8Ia ni ra sa cili oti na tamata kece, era tiko vakadua e nodra tikina e nai tikotiko, ka me ra bula mada. 9A sa kaya vei Josua ko Jiova, Au sa vakaotia vei kemudou e na siga edaidai na veivakalialiai e na vuku i Ijipita. A sa vakatokai na tikina ko ya ko Kilikali [Na veiqiqi], ka yacova na siga edaidai.
10A ra tiko mai Kilikali ko ira na Isireli, ka cakava na kana vata ni lako-sivia, e na kenai katinikava ni siga ni vula, e na yakavi, mai na vanua cecelevu mai Jeriko.
11A ra kania eso na vuata ni vanua ko ya e na siga sa tarava na kana vata ni lako-sivia, io na keki sa sega ni vakalevenitaki, kei na sila tavu, e na siga dina ko ya. 12A sa mudu na mana e na siga sa tarava na siga era kania kina na vuata ni vanua: a sa sega tale na mana vei ira na Isireli, a ra kania ga na vuata ni vanua ko Kenani e na yabaki ko ya.
13Ia ni sa tiko voleka ki Jeriko ko Josua, sa ta cake ko koya, ka rai yani ka raica, sa tu donui koya e dua na tamata, sa ucu tu e ligana na nonai seleiwau: a sa toro vua ko Josua, ka taroga vua, O sa totaki keimami, se ko totaki ira na neimami meca? 14A sa kaya ko koya, E segai; ia ka'u sa lako mai oqo me'u sa Turaga ga ni valu i Jiova. A sa cuva vakatoboicu ki na qele ko Josua, ka vakarokoroko, ka kaya vua, A cava e kaya na noqu Turaga vua na nonai talatala? 15A sa kaya vei Josua na Turaga ni valu i Jiova, Luvata na nomu i vava mai na yavamu, ni sa qele tabu na tikina ko sa tu kina. A sa kitaka vakakina ko Josua.
Currently Selected:
JOSUA 5: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
