JOSUA 4
4
Sa kau yani mai na Joritani e tinikarua na vatu, ka vakaturi mai Kilikali, me kenai vakananumi ni ra lakova na Joritani e na qele mamaca ko ira kecega na Isireli.
1Ia ni ra sa lakova oti na Joritani na matanitu taucoko, sa qai vosa vei Josua ko Jiova, ka kaya, 2Mo lesia e le tinikarua na tamata maivei ira na tamata, me tauyadua mai na veimataqali, 3ka vakaroti ira, ka vakaoqo, Dou kauta yani eke, e tinikarua na vatu, mai na loma ni Joritani, mai na tikina ka tu dei kina na yavadra na bete, ka kauta vata kei kemudou ki na tai kadua, ka virinoca e na tikina dou na moce kina e na bogi oqo. 4A sa kaciva e le tinikarua na tamata ko Josua, ko ira ka lesia eliu ko koya mai vei ira na Isireli, me yadua na tamata mai na veimataqali: 5a sa kaya vei ira ko Josua, Ni liutaka na kato i Jiova na nomuni Kalou, ki loma ni Joritani, ka taura cake na tamata yadua e dua na vatu me nonai colacola, me vaka nai wiliwili ni nodra veimataqali na Isireli: 6mei vakatakilakila vei kemuni oqo, ni ra na taroga na luvemuni e na gauna maimuri, ka kaya, A cava na kenai balebale ni veivatu oqo vei kemuni? 7kemuni na qai kaya vei ira, Sa muduki na wai ni Joritani e na mata ni kato ni veiyalayalati i Jiova: ni sa colati e na Joritani, ka sa muduki na wai ni Joritani: ia na veivatu oqo sa kenai vakananumi vei ira na Isireli e na gauna kecega.
8A sa kitaka vakaoqo ko ira na Isireli me vaka ka vakarota ko Josua, ka ra kauta e tinikarua na vatu mai na loma ni Joritani, me vaka ka kaya ko Jiova kivei Josua, me vaka nai wiliwili ni nodra veimataqali na Isireli, ka ra a kauta ki na tai kadua, ki na tikina era moce kina, ka virinoca maikeri. 9Ia sa binia cake talega ko Josua e tinikarua na vatu e na loma ni Joritani, e na tikina ka tu kina na yavadra na bete ka colata na kato ni veiyalayalati: a sa tu maikina ka yacova na siga oqo.
10A sa tu e na loma ni Joritani ko ira na bete ka colata na kato, me oti mada eliu na ka kece ka vakarota vei Josua ko Jiova me tukuna vei ira na tamata, me vaka na ka kecega ka kaya ko Mosese vei Josua: a ra sa lako vakatotolo na tamata ki tai kadua. 11Ia ni sa oti na tamata kecega ki tai kadua, sa qai colata ki tai kadua na kato i Jiova, ko ira na bete, me liutaki ira na tamata.
12Ia ko ira na mataqali i Rupeni, kei ira na mataqali i Kata, kei na dua na kena wase ni mataqali i Manasa, era sa lako vakaiyaragi ka liutaki ira na Isireli, me vaka ka vosa vei ira ko Mosese: 13era le vasagavulu beka na udolu sa vakaiyaragi ki nai valu, ka lako e na mata i Jiova ki tai kadua, ki na vanua cecelevu mai Jeriko, me ra vala.
14E na siga ko ya sa vakalevulevui Josua kina ko Jiova e na matadra kecega na Isireli, ka ra rerevaki koya, e na veisiga kecega sa bula kina ko koya, me vaka era a rerevaki Mosese.
15A sa vosa vei Josua ko Jiova, ka kaya, 16Mo vakaroti ira na bete era sa colata na kato ni vunau, me ra cabe cake mai na Joritani. 17A sa vakaroti ira na bete ko Josua, ka kaya, Dou cabe cake mai na Joritani. 18Ia ni ra sa cabe cake mai na loma ni Joritani ko ira na bete ka colata na kato ni veiyalayalati i Jiova, ka sa butuka na qele mamaca na qeteqete ni yavadra na bete, sa qai lesu tale mai na wai ni Joritani ki na kena tikina, ka sa vuabale na batina kecega, me vaka eliu.
19A ra cabe cake mai na Joritani na tamata e na kenai katini ni siga e nai matai ni vula, ka ra tiko mai Kilikali, mai na yasana vaka ki na tu-i-cake ki Jeriko. 20Ia na vatu e tinikarua ko ya, ka ra kauta mai na Joritani, sa binia ko Josua mai Kilikali. 21A sa vosa ko koya vei ira na Isireli, ka kaya, Ni ra na tarogi kemuni na luvemuni e na gauna maimuri, ka kaya, Mei cavai na veivatu oqo? 22kemuni na qai vakatakila vei ira na luvemuni, ka kaya, Sa lakova na Joritani oqo ko ira na Isireli e na qele mamaca. 23Ni sa vakadiva e matamuni ko Jiova na nomuni Kalou na wai ni Joritani, mo ni lako oti mada ki tai kadua, me vaka ka cakava ko Jiova na nomuni Kalou ki na Wasa Damudamu, ko ya ka vakadiva ko koya e matada me da lako oti mada ki tai kadua: 24me ra kila kina na lewe ni veivanua kecega, ni sa kaukauwa na liga i Jiova, ka mo ni rerevaki Jiova kina na nomuni Kalou e na veigauna kecega.
Currently Selected:
JOSUA 4: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
