JOSUA 24
24
Sa vakasoqona vata na veimataqali ki Sikemi ko Josua, 1. Sa tukuna vei ira ko Josua na cakacaka loloma ni Kalou vei ira, mai na gauna i Eparaama ka yaco ki na nona gauna, 2-13; a sa vakaroti ira matua ko Josua me ra qaravi Jiova ga, ka sa veiyalayalati kei ira e na siga ko ya mai Sikemi, 14-28. Sa ciba ko Josua, 29,30. Era sa qaravi Jiova ko ira na Isireli, 31. Sa bulu na sui i Josefa, 32. Sa ciba ko Eliesa, 33.
1A sa vakasoqoni ira vata ko Josua na veimataqali kecega ni Isireli ki Sikemi, ka kacivi ira mai na nodra qase na Isireli, kei ira na nodra turaga, kei ira na nodra mataveilewai, kei ira na nodra turaga lalai; a ra sa mai vakaraitaki ira e na mata ni Kalou.
2A sa kaya ko Josua kivei ira na tamata kecega, Sa vosa vakaoqo ko Jiova na Kalou i Isireli, Sa ra tiko na nomuni qase eliu mai tai kadua ni Uciwai, io ko Tira, na tama i Eparaama, kei na tama i Neori: ia era a qarava na kalou tani eso: 3ia ka'u a kauti Eparaama na tamamudou mai tai kadua ni Uciwai, ka kauti koya voli e na vanua ko Kenani taucoko, ka vakalewevuqataka na nona kawa, ka soli Aisake vua: 4ia ka'u a soli Jekope kei Iso vei Aisake, ia ka'u a solia vei Iso na ulu-ni-vanua ko Sia, me taukena: ia era a lako sobu ki Ijipita ko Jekope kei ira na luvena: 5ia ka'u a talai Mosese kei Eroni, ia ka'u a vakararawataki Ijipita, me vaka na ka ka'u a cakava e na kedra maliwa, ka sa oti ka'u a qai kauti kemuni maikina: 6ia ka'u a kauti ira na nomuni qase mai Ijipita: ia kemuni a lako mai ki na waitui; a ra sa vakasavi ira na nomuni qase ko ira na kai Ijipita, e na qiqi-ni-valu, kei ira na tamata sa vodo ose, ka yaco ki na Wasa Damudamu: 7ia ni ra sa tagi vei Jiova, sa qai vakayacora na butobuto ko koya e na kemuni maliwa kei ira na kai Ijipita, a sa vakauta vei ira na wasawasa, ka luvuci ira, ka sa raica na matamuni na ka ka'u a kitaka vei ira na kai Ijipita: ia kemuni a tiko vakadede mai na vanua liwa: 8ia ka'u a kauti kemuni ki na nodra vanua na Amoraiti era a tiko mai tai kadua ni Joritani; a ra sa veivala kei kemuni: ia ka'u a soli ira ki na ligamuni, mo ni taukena kina na nodra vanua; ia ka'u a vakarusai ira mai na matamuni. 9Sa qai tu ko Pelaki na luve i Sipori, na tui Moapi, ka veivala kei ira na Isireli, ka sa talaki me kacivi Pelami na luve i Piori me vatonaki kemuni mo ni ca: 10ia ka'u a bese ni rogoci Pelami; ka sa vosavakalougatataki kemuni tikoga ko koya: ia ka'u a vakabulai kemuni mai na ligana. 11Ia dou a lakova na Joritani, ka lako mai ki Jeriko, a ra veivala kei kemuni nai taukei kei Jeriko, ko ira na Amoraiti, kei na Perisaiti, kei na kai Kenani, kei ira na Itaiti, kei na Kakesaiti, ko ira na Aivaiti, kei na Jepusaiti; ia ka'u a soli ira ki na ligamuni. 12Ia ka'u a vakatala e dua na lagotavuivui rerevaki me liu vei kemuni, koya sa vakasavi rau mai na matamuni, na nodra tui na Amoraiti e le rua: sa sega e na nomuni seleiwau se na nomuni dakai. 13Ia ka'u sa solia vei kemuni e dua na vanua kemuni a sega ni oca kina, kei na veikoro kemuni a sega ni tara, ka kemuni a sega ni tara, ka kemuni sa tiko ga kina; kemuni sa kana mai na veivaivaini kei na veiolive kemuni a sega ni tea.
14Ia oqo, mo ni rerevaki Jiova, ka qaravi koya e na yalododonu ka vakaidina: ka biuta tani na veikalou era qarava na nomuni qase mai tai kadua ni Uciwai, mai Ijipita talega; ia mo ni qaravi Jiova. 15Ia kevaka sa ca vei kemuni mo ni qaravi Jiova, mo ni digitaki koya edaidai kemuni na qarava; se na veikalou ka ra qarava na nomuni qase mai tai kadua ni Uciwai, se na nodra veikalou na Amoraiti, kemuni sa tiko e na nodra vanua: ia koi au kei ira na noqu lewe-ni-vale, keitou na qaravi Jiova.
16A ra sa vosa mai na tamata, ka kaya, Me yawa sara vei keimami me keimami laivi Jiova me la'ki qarava na kalou tani eso; 17ni sai Jiova ga na noda Kalou, ka kauti keda cake kei ira na noda qase mai na vanua ko Ijipita, mai na vale ni bobula, ka sa kitaka nai vakatakilakila levu oqori e matada, ka maroroi keda e na sala kecega eda a lako kina, e na kedra maliwa talega na lewe ni veivanua eda a lako kina: 18ka sa vakaseva tani ko Jiova na tamata kecega mai vei keda, na Amoraiti era a tiko e na vanua: o koya oqo keimami talega, keimami na qaravi Jiova; ni sa neimami Kalou ko koya.
19A sa kaya vei ira na tamata ko Josua, Kemuni sa sega ni qaravi Jiova rawa: ni sa Kalou yalosavasava ko koya; sa Kalou vuvu ko koya; ena cudruva na nomuni talaidredre, kei na nomuni valavala ca: 20kevaka ko ni sa laivi Jiova, ka qarava na veikalou ni kai tani, ena qai vuki ko koya ka vakacacani kemuni, ka vakarusai kemuni, ni sa caka vinaka oti vei kemuni.
21A ra sa kaya vei Josua ko ira na tamata, E segai; keimami na qaravi Jiova ga.
22A sa kaya vei ira na tamata ko Josua, Ko ni sa tukuni kemuni edaidai ni kemuni sa digitaki Jiova, mo ni qaravi koya. A ra sa kaya, Sa vakakina.
23Ia oqo, mo ni biuta tani na veikalou ni kai tani sa tu vei kemuni, ka vagolea na lomamuni vei Jiova na Kalou i Isireli.
24A ra sa kaya vei Josua ko ira na tamata, Keimami na qaravi Jiova na noda Kalou, ia keimami na vakarorogo ki na nona vosa.
25A sa ia e dua na veiyalayalati kei ira ko Josua e na siga ko ya, a sa solia vei ira e dua na vunau kei nai lesilesi mai Sikemi. 26A sa vola na vosa oqo e nai vola ni vunau ni Kalou ko Josua, ka sa kauta e dua na vatu levu, ka vakaduria cake e ruku ni dua na oki, ka tu mai na vale tabu i Jiova. 27A sa kaya vei ira na tamata kecega ko Josua, Raica, na vatu oqo ena kenai vakadinadina vei keda: ni sa rogoca na vosa kecega i Jiova sa vosataka ko koya vei keda: ia ena kenai vakadinadina vei kemuni, de ko ni sa cakitaka na nomuni Kalou. 28A sa vakatalai ira na tamata ko Josua, na tamata yadua ki na nonai votavota.
29Ia ni sa oti na veika oqo, sa ciba ko Josua na luve i Nuni, nai talatala i Jiova, ni sa dua na drau ka mani tini na nona yabaki: 30Ka ra sa buluta e nai yalayala ni nonai votavota mai Timinaca-sera, ko ya mai na ulu-ni-vanua ko Ifireimi, e na yasa ni ulu-ni-vanua cecere ko Keasi vaka ki na tokalau.
31A ra sa qaravi Jiova ko ira na Isireli e na gauna kecega i Josua, kei na nodra gauna kecega na qase era bula tiko ni sa mate ko Josua, era a kila talega na cakacaka kecega i Jiova, ka kitaka e na vukudra na Isireli.
32Ia na sui i Josefa, era a kauta cake mai Ijipita ko ira na Isireli, era sa buluta mai Sikemi, e na tiki ni vanua sa volia ko Jekope, e na dua na drau na tiki ni siliva, vei ira na luve i Amori na tama i Sikemi: a yaco mei votavota vei ira na luve i Josefa.
33A sa ciba ko Eliesa na luve i Eroni; a ra sa buluta e na vanua cecere nei Finiase na luvena, o koya ka soli vua mai na ulu-ni-vanua ko Ifireimi.
Currently Selected:
JOSUA 24: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
