JOSUA 23
23
Sa vakasoqoni ira vata na Isireli ko Josua, ka tukuna na ka sa cakava vei ira ko Jiova, 1-4; ka kaya me ra gumatua ni vakabauta na vosa ni Kalou, me ra vinaka kina, 5-11; kevaka era sega ni muri Jiova, era na ca kina, 12-16.
1Ia ni sa vakacegui ira na Isireli vakadede ko Jiova mai na nodra meca kecega sa vakavolivoliti ira, ka sa qai qase mai ko Josua; ka sa vuqa na nona yabaki: 2sa qai kacivi ira kecega na Isireli ko Josua, kei ira na nodra qase, kei ira na nodra turaga, kei ira na nodra mataveilewai, kei ira na nodra turaga lalai, a sa kaya vei ira, Au sa qase mai ka sa vuqa na noqu yabaki: 3kemuni sa raica na ka kecega ka cakava ko Jiova na nomuni Kalou kivei ira na matanitu kecega oqo e na vukumuni; ni sai Jiova na nomuni Kalou sa totaki kemuni. 4Raica, au sa vota oti vei kemuni na veimatanitu oqo sa vo, me nodra i votavota na nomuni veimataqali, sa tekivu mai Joritani, kei na veimatanitu kecega ka'u sa vakarusa, ka yaco ki na wasa levu, mai nai dromudromu ni siga.
5Ia ko Jiova na nomuni Kalou, ena vakasevi ira e matamuni, ka vakayaliyalitaki ira; ia kemuni na taukena na nodra vanua, me vaka ka kaya vei kemuni ko Jiova na nomuni Kalou. 6Ia mo ni kaukauwa sara mo ni vakabauta ka kitaka na ka kecega sa volai e nai vola ni vunau i Mosese, mo ni kakua ni vuki tani maikina ki nai matau se ki nai mawi; 7mo ni kakua ni la'ki tiko e na kedra maliwa na veimatanitu oqo, ko ira sa vo tiko vei kemuni; mo ni kakua talega ni cavuta na yaca ni nodra veikalou, se ia kina na bubului, se qaravi ira, se cuva vei ira: 8ia mo ni kabiti Jiova ga na nomuni Kalou, me vaka ko ni sa daukitaka ka yacova na siga oqo. 9Ni sa vakaseva tani ko Jiova mai na matamuni eso na matanitu levu ka kaukauwa: ia koi kemuni, sa sega e dua na tamata sa gumatua vei kemuni ka yacova na siga oqo. 10E le dua vei kemuni ena vakasava e le dua na udolu: ni sai Jiova ga na nomuni Kalou sa totaki kemuni, me vaka ka kaya vei kemuni ko koya. 11Mo ni qarauni kemuni vinaka, mo ni lomani Jiova na nomuni Kalou.
12Ia kevaka kemuni na vuki, ka kabita na vo ni veimatanitu oqo, ko ira sa vo tiko vei kemuni, ka ia na vakawati kei ira, ka veilakovi tiko kei ira: 13mo ni kila vakaidina ni na sega sara ni vakasevi ira tani mai vei kemuni na veimatanitu oqo ko Jiova na nomuni Kalou; era na lawa ga, kei nai cori vei kemuni, kei na kuita ki na sarisarimuni, kei na voto ni kau e na matamuni, ia kemuni na rusa laivi kina mai na dela ni vanua vinaka oqo, ko ya sa solia vei kemuni ko Jiova na nomuni Kalou.
14Ia raica, ka'u sa lako e na gauna oqo e na sala era lako kina na kai vuravura kecega, ia dou sa kila e na lomamuni taucoko kei na yalomuni taucoko, ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni; sa sega ni lutu e dua na ka oqori. 15Ia me vaka sa yaco vei kemuni na ka vinaka kecega ka vosataka vei kemuni ko Jiova na nomuni Kalou; ena vakayacora vakakina na ka kecega ko Jiova, me vakarusai kemuni mada kina mai na dela ni vanua vinaka oqo, ka solia vei kemuni ko Jiova na nomuni Kalou. 16Ni kemuni sa vakacataka na veiyalayalati i Jiova na nomuni Kalou, o koya sa vakarota vei kemuni, ka la'ki qarava na kalou tani, ka cuva vei ira, ena qai waqa mai na cudru i Jiova vei kemuni, ia kemuni na rusa tani vakusakusa mai na vanua vinaka sa solia vei kemuni ko koya.
Currently Selected:
JOSUA 23: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
